Volodymyr Zelenskyy: జెలెన్‌స్కీ సంచలన ఆరోపణ: రష్యా ఇంటెలిజెన్స్‌ సాయంతోనే ఇరాన్‌ పశ్చిమాసియా లక్ష్యం!

Volodymyr Zelenskyy: పశ్చిమాసియా ప్రాంతంలో ఉద్రిక్తతలు రోజురోజుకూ తీవ్రమవుతున్న నేపథ్యంలో ఉక్రెయిన్‌ అధ్యక్షుడు వోలోడిమిర్‌ జెలెన్‌స్కీ సంచలనాత్మక ఆరోపణలు చేశారు. అమెరికా-ఇజ్రాయెల్‌లతో ఇరాన్‌ జరుపుతున్న యుద్ధంలో రష్యా తన ఇంటెలిజెన్స్‌ సేవలు అందిస్తోందని ఆయన ఆరోపించారు. ఈ విషయంపై తన వద్ద ఖచ్చితమైన ఆధారాలు ఉన్నాయని స్పష్టం చేశారు.

ఎక్స్‌ (ట్విట్టర్‌)లో పోస్టు చేస్తూ జెలెన్‌స్కీ ఇలా వ్యాఖ్యానించారు: “ఇరాన్‌ ప్రభుత్వానికి రష్యా ఇంటెలిజెన్స్‌ మద్దతు అందిస్తోంది. దీనికి మా వద్ద స్పష్టమైన ఆధారాలు ఉన్నాయి. ఇది విధ్వంసకర చర్య. వెంటనే ఆపాలి. లేకపోతే పరిస్థితి మరింత దిగజారుతుంది.” అనేక దేశాలు ప్రస్తుత సంక్షోభాన్ని అరికట్టడానికి తీవ్ర ప్రయత్నాలు చేస్తున్నాయని ఆయన చెప్పారు.

యుద్ధం కారణంగా అంతర్జాతీయ మార్కెట్లు ప్రతికూలంగా మారాయని, పలు దేశాల్లో ఇంధన సరఫరా వ్యవస్థల్లో గందరగోళం నెలకొందని జెలెన్‌స్కీ హెచ్చరించారు. ఇరాన్‌ పాలనను నిలబెట్టుకోవడానికి అమెరికా, ఇజ్రాయెల్‌ లక్ష్యాలపై లక్ష్యపూర్వక దాడులు చేయడంలో రష్యా సహాయపడుతోందని తప్పుబట్టారు. దీంతో యుద్ధం మరిన్ని రోజులు కొనసాగే ప్రమాదం ఉందని, వెంటనే అంతర్జాతీయ సమాజం స్పందించాలని డిమాండ్‌ చేశారు.

యుద్ధం మొదలైనప్పటి నుంచి ఇరాన్‌కు రష్యా వ్యూహాత్మక మద్దతు అందిస్తోందని వివిధ మీడియా కథనాలు వెలువడ్డాయి. మాస్కో సాయంతోనే ఇరాన్‌ అమెరికా యుద్ధ విమానాలు, యుద్ధ నౌకలు, సైనిక స్థావరాలపై కచ్చితమైన దాడులు చేయగలుగుతోందని ఆ వార్తలు చెబుతున్నాయి. ఇప్పుడు జెలెన్‌స్కీ కూడా ఇదే విషయాన్ని బయటపెట్టడం గమనార్హం.

అయితే ఈ ఆరోపణలపై రష్యా, ఇరాన్‌ అధికారులు ఇంకా ఎలాంటి స్పందన ఇవ్వలేదు. ఇంతలోనే రష్యా విదేశాంగ మంత్రి సెర్గీ లావ్రోవ్‌, ఇరాన్‌ విదేశాంగ మంత్రి అబ్బాస్‌ అరాగ్చీలు చర్చలు జరిపారు. ఈ సందర్భంగా ఇరాన్‌లోని బుషెహర్‌ అణు కేంద్రంతో సహా ఆ దేశ మౌలిక సదుపాయాలపై అమెరికా-ఇజ్రాయెల్‌ దాడులు ఎంత మాత్రం ఆమోదయోగ్యం కావని లావ్రోవ్‌ స్పష్టం చేశారు.