Election Commission of India: బెంగాల్ ఎన్నికల ముందు కీలక నిర్ణయం – చీఫ్ సెక్రటరీపై చర్య తీసుకున్న ఈసీ

Election Commission of India: పశ్చిమ బెంగాల్ అసెంబ్లీ ఎన్నికల షెడ్యూల్ ప్రకటించిన కొద్ది గంటల్లోనే ఎన్నికల సంఘం (ఈసీ) రాష్ట్ర ఉన్నతాధికారులపై తీవ్ర చర్యలు తీసుకుంది. రాష్ట్ర ముఖ్య కార్యదర్శి (చీఫ్ సెక్రటరీ) నందిని చక్రవర్తిని ఆ పదవి నుంచి తొలగిస్తూ ఈసీ ఆదేశాలు జారీ చేసింది. ఆ స్థానంలో 1993 బ్యాచ్ ఐఏఎస్ అధికారి దుష్యంత్ నరియాలను నియమించింది.

అదేవిధంగా హోం శాఖ ప్రధాన కార్యదర్శి (ప్రిన్సిపల్ సెక్రటరీ, హోం అండ్ హిల్ అఫైర్స్) జగదీశ్ ప్రసాద్ మీనాపై కూడా ఈసీ వేటు వేసింది. ఆ పదవిలో 1997 బ్యాచ్ ఐఏఎస్ అధికారిణి సంఘమిత్ర ఘోష్‌ను నియమించాలని రాష్ట్ర ప్రభుత్వానికి లేఖ రాసింది.

ఎన్నికల ప్రక్రియ పూర్తయ్యే వరకు నందిని చక్రవర్తి, జగదీశ్ ప్రసాద్ మీనాలకు ఎలాంటి ఎన్నికల సంబంధిత విధులు అప్పగించవద్దని ఈసీ స్పష్టంగా ఆదేశించింది. ‘‘అసెంబ్లీ ఎన్నికలు ముగిసే వరకు ఎన్నికలకు సంబంధించిన ఏ విధుల్లోనూ ఈ అధికారులు పాల్గొనకూడదు’’ అని ఈసీ తన లేఖలో పేర్కొంది. ఎన్నికల సన్నద్ధతను సమీక్షించిన తర్వాత వీరిద్దరినీ విధుల నుంచి దూరంగా ఉంచాలని నిర్ణయించినట్లు తెలిపింది. ఈ ఆదేశాలు తక్షణమే అమలులోకి రావాలని, అనుసరణ నివేదికను మార్చి 16న మధ్యాహ్నం 3 గంటల్లోపు పంపాలని సూచించింది.

పశ్చిమ బెంగాల్‌లో అసెంబ్లీ ఎన్నికలు రెండు విడతలుగా జరగనున్నాయి. ఏప్రిల్ 23న మొదటి విడతలో 152 నియోజకవర్గాలు, ఏప్రిల్ 29న రెండో విడతలో 142 నియోజకవర్గాల్లో పోలింగ్ జరుగుతుంది. మే 4న ఓట్ల లెక్కింపు నిర్వహించనున్నారు.

గత కొంతకాలంగా ఓటర్ల జాబితా సవరణలు, ఇతర ఎన్నికల సంబంధిత అంశాల్లో తృణమూల్ కాంగ్రెస్ ప్రభుత్వం, ఎన్నికల సంఘం మధ్య తీవ్ర విభేదాలు నెలకొన్న సంగతి తెలిసిందే. ఈ నేపథ్యంలో ఎన్నికల నిష్పక్షపాతం, పరిపాలనా న్యాయబద్ధత కాపాడేందుకు ఈసీ ఈ కీలక నిర్ణయం తీసుకుందని విశ్లేషకులు అభిప్రాయపడుతున్నారు.