Prime Minister Narendra Modi: ప్రధాని మోదీ: కాంగ్రెస్ రాజకీయ లబ్ధి కోసం ప్రజలను రెచ్చగొడుతోంది

Prime Minister Narendra Modi: పశ్చిమాసియాలో ఇరాన్ యుద్ధం వల్ల తలెత్తిన సంక్షోభ పరిస్థితులను రాజకీయ లాభం కోసం వాడుకోవడానికి కాంగ్రెస్ పార్టీ ప్రయత్నిస్తోందని ప్రధాని నరేంద్ర మోదీ తీవ్రంగా విమర్శించారు. ప్రజల్లో భయాందోళనలు సృష్టించి, పెట్రోల్ పంపుల వద్ద బారులు తీరి నిలబడేలా చేసి శాంతి భద్రతలకు విఘాతం కలిగించాలని చూస్తోందని ఆరోపించారు.

గుజరాత్‌లోని వావ్-థరాద్ జిల్లాలో మంగళవారం నిర్వహించిన సభలో ప్రధాని మోదీ ప్రసంగించారు. ఈ సందర్భంగా ఆయన మాట్లాడుతూ, దేశం ఐక్యంగా నిలబడాల్సిన సమయంలో కాంగ్రెస్ నేతలు విభజన రాజకీయాల్లో నిమగ్నమై రాజకీయ రాబందుల్లా కాచుకుని ఉన్నారని మండిపడ్డారు.

“యుద్ధంతో యావత్ ప్రపంచం సతమతమవుతోంది. అస్థిరత నెలకొంది. ఇంధన ధరలు పెరుగుతున్నాయి. ఇటువంటి పరిస్థితుల్లో దృఢమైన విదేశాంగ విధానం, ప్రజల ఐక్యతతో భారత్ సమర్థంగా వ్యవహరించింది” అని ప్రధాని మోదీ తెలిపారు. పశ్చిమాసియా ఉద్రిక్తతల కారణంగా ప్రపంచవ్యాప్తంగా ఇంధన ధరలు పెరిగినప్పటికీ, ఆ ప్రభావం ప్రజలపై పడకుండా చర్యలు తీసుకున్నామని ఆయన వివరించారు.

భారత్ ఎలాంటి సంక్షోభాన్ని అయినా ఎదుర్కోగలదని ధీమా వ్యక్తం చేసిన ప్రధాని, దేశం సుస్థిరత, ఐక్యతను ప్రదర్శిస్తోందని ఉద్ఘాటించారు. సామ్రాట్ సంప్రతి మ్యూజియం ప్రారంభోత్సవం సందర్భంగా ఆచార్య శ్రీ పద్మ సాగర్ సురీశ్వర్జీ మహారాజ్‌తో కలిసి ఆయన ఈ కార్యక్రమంలో పాల్గొన్నారు.

ఈ విమర్శలు ఇరాన్ యుద్ధం నేపథ్యంలో కాంగ్రెస్ పార్టీ చేస్తున్న వ్యాఖ్యలకు ప్రధాని మోదీ స్పందనగా భావించవచ్చు. దేశం ఈ సవాళ్లను ఐక్యంగా ఎదుర్కొనాలని ప్రధాని పిలుపునిచ్చారు.