Ashes Test: యాషెస్: తొలి టెస్ట్‌లో ఆసీస్ ఘన విజయం.. ట్రావిస్ హెడ్ సెంచరీ సునామీ

Ashes Test: క్రికెట్ అభిమానులు ఎంతో ఆసక్తిగా ఎదురుచూసే యాషెస్ సిరీస్ 2025-26ను ఆస్ట్రేలియా ఘనంగా మొదలుపెట్టింది. పెర్త్ వేదిక‌గా జ‌రిగిన తొలి టెస్టులో చిర‌కాల ప్రత్యర్ధి ఇంగ్లాండ్‌పై ఆసీస్ 8 వికెట్ల తేడాతో చిత్తు విజ‌యాన్ని న‌మోదు చేసింది. ఈ విజ‌యంతో కంగారూలు సిరీస్‌లో 1-0 ఆధిక్యంలోకి దూసుకెళ్లారు.

హెడ్ విధ్వంసం.. టీ20 తరహాలో సెంచరీ

ఆసీస్‌ ముందు ఇంగ్లండ్‌ కేవలం 205 పరుగుల లక్ష్యాన్ని మాత్రమే ఉంచింది. ఈ స్వల్ప లక్ష్య చేధన‌లో ఆస్ట్రేలియా ఓపెన‌ర్ ట్రావిస్ హెడ్ వీర విధ్వంసం సృష్టించాడు. ఇంగ్లీష్ బౌలర్లను ఉతికారేస్తూ.. టెస్ట్ ఫార్మాట్‌లో టీ20 తరహాలో బ్యాటింగ్ చేశాడు. హెడ్ కేవలం 69 బంతుల్లోనే తన సెంచరీ మార్క్‌ను అందుకుని, టెస్ట్ క్రికెట్‌లో తన దూకుడును నిరూపించుకున్నాడు. ఓవరాల్‌గా 83 బంతులు ఎదుర్కొన్న హెడ్.. 16 ఫోర్లు, 4 సిక్స్‌ల సహాయంతో 123 పరుగులు చేసి ఆసీస్‌ విజయాన్ని సులభతరం చేశాడు.

లబుషేన్‌ అజేయ హాఫ్‌ సెంచరీ

ట్రావిస్ హెడ్‌కు తోడుగా వ‌చ్చిన మార్నస్ లబుషేన్ కూడా అజేయ హాఫ్ సెంచరీతో జట్టును విజయతీరాలకు చేర్చాడు. లబుషేన్ 51 పరుగులతో నాటౌట్‌గా నిలిచాడు. ఆస్ట్రేలియా కేవలం 2 వికెట్లు మాత్రమే కోల్పోయి ఈ లక్ష్యాన్ని చేధించింది. ఇంగ్లండ్‌ బౌలర్లలో బ్రైడన్‌ కార్స్‌ ఒక్కడే 2 వికెట్లు పడగొట్టగా, తొలి ఇన్నింగ్స్‌లో అదరగొట్టిన జోఫ్రా అర్చర్‌, బెన్‌ స్టోక్స్‌ వంటి కీలక బౌలర్లు రెండో ఇన్నింగ్స్‌లో తేలిపోయారు. మొత్తంగా పెర్త్‌లో ఆసీస్ పూర్తి ఆధిపత్యాన్ని ప్రదర్శించి యాషెస్ సిరీస్‌ను తమ ఫేవరెట్‌గా ప్రారంభించింది.