ICC Women's ODI World Cup 2025: కప్పును ఎత్తుకొని కన్నీరు పెట్టిన ఝులన్ గోస్వామి.. మిథాలీ రాజ్‌తో కలిసి

ICC Women's ODI World Cup 2025: భారత మహిళా క్రికెట్ జట్టు తొలిసారి ఐసీసీ ప్రపంచ కప్‌ను గెలుచుకున్న చారిత్రక ఘట్టం తర్వాత, మైదానంలో అత్యంత భావోద్వేగ సన్నివేశం ఆవిష్కృతమైంది. భారత మహిళల క్రికెట్‌కు దశాబ్దాల పాటు సేవ చేసిన దిగ్గజ క్రీడాకారిణులు మిథాలీ రాజ్ మరియు ఝులన్ గోస్వామి... ప్రపంచ విజేత ట్రోఫీని తమ చేతుల్లోకి తీసుకొని ఎమోషనల్ అయ్యారు.హర్మన్‌ప్రీత్ కౌర్ నేతృత్వంలోని భారత జట్టు ట్రోఫీని స్వీకరించిన అనంతరం, విజయ యాత్రలో భాగంగా తమ దిగ్గజ మాజీ క్రికెటర్లైన మిథాలీ రాజ్, ఝులన్ గోస్వామి, అంజుమ్ చోప్రా ఉన్న చోటుకు చేరుకుంది.

జట్టులోని ఆటగాళ్లు ప్రేమతో ట్రోఫీని ఝులన్ గోస్వామికి అందించగా, ఆమె ఒక్కసారిగా కన్నీటి పర్యంతమయ్యారు. ఆమె వెంటనే కెప్టెన్ హర్మన్‌ప్రీత్ కౌర్‌ను, స్మృతి మంధానను గట్టిగా హత్తుకుని తమ చిరకాల స్వప్నం నెరవేరినందుకు ఆనంద భాష్పాలు విడిచారు. జట్టు తరపున ఉప-కెప్టెన్ స్మృతి మంధాన ఝులన్‌ను హత్తుకొని "దీదీ, యే ఆప్కే లియే థా (సిస్టర్, ఇది మీ కోసమే)" అని అన్నట్లుగా తెలుస్తోంది. ఈ విజయం తమ గురువులకు అంకితమని యువ క్రీడాకారిణులు తెలియజేశారు.

భారత జట్టు తరఫున అత్యధిక పరుగులు చేసిన మిథాలీ రాజ్ కూడా ట్రోఫీని చేతబట్టుకుని చిరునవ్వుతో ధన్యవాదాలు అని మాత్రమే చెప్పగలిగారు. వారిద్దరూ క్రికెట్‌లో చురుకుగా ఉన్నప్పుడు 2005, 2017 ప్రపంచకప్ ఫైనల్స్‌లో ఓడిపోవడం వారికి తీరని లోటుగా మిగిలింది. క్రికెట్ అభిమానులకు ఈ దృశ్యం 2011 పురుషుల ప్రపంచకప్‌ విజయాన్ని గుర్తుచేసింది. అప్పుడు సచిన్ టెండూల్కర్ కోసం ప్రపంచ కప్‌ను గెలవాలని యువ ఆటగాళ్లు లక్ష్యంగా పెట్టుకున్నారు. దశాబ్దాల పాటు భారత మహిళల క్రికెట్‌ను భుజాన వేసుకుని నడిపించిన ఈ ఇద్దరు దిగ్గజాలకు, ప్రస్తుత జట్టు అందించిన ఈ గౌరవం మరియు ప్రపంచ కప్ విజయం భారత క్రీడా చరిత్రలో ఎప్పటికీ గుర్తుండిపోయే అపురూపమైన ఘట్టంగా నిలిచింది.