Luke Williams: మహిళల ప్రీమియర్ లీగ్ రాబోయే సీజన్‌కు ముందు ముంబై ఇండియన్స్ ఫ్రాంచైజీ కీలక నిర్ణయం తీసుకుంది. తమ మహిళల జట్టు నూతన హెడ్ కోచ్‌గా ఆస్ట్రేలియాకు చెందిన ప్రముఖ కోచ్ ల్యూక్ విలియమ్స్‌ను నియమిస్తున్నట్లు అధికారికంగా ప్రకటించింది. ఇప్పటివరకు కోచ్‌గా వ్యవహరించిన లిసా కీట్లీకి క్రికెట్ ఆస్ట్రేలియాలో కీలక పదవి దక్కడంతో ఆమె జట్టు బాధ్యతల నుంచి తప్పుకున్నారు. దీంతో ఆమె స్థానంలో విలియమ్స్‌ను ముంబై ఇండియన్స్ ఎంపిక చేసింది.

ఆటగాడిగా నిరాశ..

కోచ్‌గా తిరుగులేని రికార్డు సృష్టించిన ల్యూక్ విలియమ్స్, ఆటగాడిగా మాత్రం పెద్దగా రాణించలేకపోయారు. ఆస్ట్రేలియా దేశవాళీ క్రికెట్‌లో సౌత్ ఆస్ట్రేలియా తరఫున ఆల్‌రౌండర్‌గా ఆయన కేవలం 5 మ్యాచ్‌లు మాత్రమే ఆడారు. ఆ 5 మ్యాచ్‌లలో 11.40 సగటుతో కేవలం 114 పరుగులు చేశారు. కెరీర్‌లో ఒక్క సెంచరీ గానీ, కనీసం హాఫ్ సెంచరీ గానీ నమోదు చేయలేదు. అటు బౌలర్‌గానూ ఒక్క వికెట్ కూడా పడగొట్టలేకపోయారు. 2005 జనవరిలోనే ఆటగాడిగా తన ప్రయాణాన్ని ముగించిన విలియమ్స్, అనంతరం కోచింగ్ వైపు దృష్టి సారించి మహిళా క్రికెట్ చరిత్రలోనే అత్యంత విజయవంతమైన కోచ్‌లలో ఒకరిగా ఎదిగారు.

ట్రోఫీలతో మెరిసిన ట్రాక్ రికార్డ్..

ఆర్సీబీకి తొలి టైటిల్:

WPL 2024 సీజన్‌లో రాయల్ ఛాలెంజర్స్ బెంగళూరు మహిళల జట్టును ఛాంపియన్‌గా నిలిపి, ఆర్సీబీ ఫ్రాంచైజీ చరిత్రలోనే మొట్టమొదటి ట్రోఫీని అందించిన ఘనత ల్యూక్ విలియమ్స్‌దే.

WBBL ఆధిపత్యం:

ఆస్ట్రేలియా ఉమెన్స్ బిగ్ బాష్ లీగ్ లో అడిలైడ్ స్ట్రైకర్స్ జట్టుకు హెడ్ కోచ్‌గా వ్యవహరించి 2022, 2023లలో వరుసగా రెండుసార్లు జట్టును విజేతగా నిలిపారు.

ది హండ్రెడ్ విజేత:

ఇంగ్లాండ్‌లో జరిగిన ది హండ్రెడ్ టోర్నమెంట్‌లో సదరన్ బ్రేవ్ జట్టును రెండుసార్లు ఫైనల్స్‌కు తీసుకెళ్లడమే కాకుండా, 2023లో టైటిల్‌ను గెలిపించారు. ముంబై ఇండియన్స్ వంటి విజయవంతమైన జట్టుకు హెడ్ కోచ్‌గా బాధ్యతలు చేపట్టడంపై ల్యూక్ విలియమ్స్ సంతోషం వ్యక్తం చేశారు. బలమైన రికార్డు ఉన్న ఫ్రాంచైజీతో కలిసి పనిచేయడానికి, జట్టును మరింత ముందుకు నడిపించడానికి తాను సిద్ధంగా ఉన్నట్లు ఆయన పేర్కొన్నారు.

Tags: