Shubman Gill: నెట్స్లో టీమిండియా కెప్టెన్ శుభ్మన్ గిల్కు గాయం.. సిరాజ్ వేసిన బౌన్సర్తో కలకలం..
సిరాజ్ వేసిన బౌన్సర్తో కలకలం..
Shubman Gill: వెస్టిండీస్తో ప్రారంభం కానున్న మూడు వన్డేల సిరీస్కు ముందు భారత జట్టు శిబిరంలో తీవ్ర ఆందోళన మొదలైంది. ఆదివారం గ్రీన్ఫీల్డ్ ఇంటర్నేషనల్ స్టేడియంలో జరగనున్న మొదటి వన్డేకు కేవలం 48 గంటల ముందు నెట్ ప్రాక్టీస్ సెషన్లో భారత కెప్టెన్ శుభ్మన్ గిల్ గాయపడ్డాడు. ఫాస్ట్ బౌలర్ మహ్మద్ సిరాజ్ వేసిన ఎగిసిపడే బంతి నేరుగా గిల్ కుడి మోచేతికి బలంగా తగిలింది.
నెట్స్లో ఏం జరిగింది?
శుక్రవారం జరిగిన ప్రాక్టీస్ సెషన్లో విరాట్ కోహ్లీ, రోహిత్ శర్మ, రుతురాజ్ గైక్వాడ్లతో కలిసి శుభ్మన్ గిల్ మొదట బ్యాటింగ్ ప్రాక్టీస్ ప్రారంభించాడు. సిరాజ్ బౌలింగ్ను ఎదుర్కొంటున్న సమయంలో అనూహ్యంగా బౌన్స్ అయిన ఒక లెంగ్త్ బంతి గిల్ కుడి మోచేతిని తాకింది.
బంతి తాకిన వెంటనే గిల్ తీవ్ర నొప్పితో విలవిల్లాడుతూ బ్యాటింగ్ను అర్ధాంతరంగా ఆపేసి నెట్స్ నుంచి బయటకు వచ్చాడు. వెంటనే మైదానంలోకి వచ్చిన ఫిజియో దాదాపు 20 నిమిషాల పాటు చికిత్స అందించి, మోచేతికి బ్యాండేజ్ వేశారు. పక్కనే ఉన్న నెట్స్లో ప్రాక్టీస్ చేస్తున్న విరాట్ కోహ్లీ, సీనియర్ ఆటగాడు రోహిత్ శర్మ, బౌలర్ సిరాజ్ వెంటనే గిల్ వద్దకు వెళ్లి పరిస్థితిని అడిగి తెలుసుకున్నారు.
కాస్త ఊరట.. తొలి వన్డేపై ఇంకా సస్పెన్స్
మోచేతికి కట్టు కట్టిన తర్వాత గిల్ కాసేపు డగౌట్లో కూర్చొని విశ్రాంతి తీసుకున్నాడు. తీవ్రమైన బౌలింగ్ను మళ్లీ ఎదుర్కోనప్పటికీ, సెషన్ ముగిసే సమయానికి కేవలం త్రో-డౌన్ బంతులను మాత్రమే ఆడి కాస్త కోలుకున్నట్లు కనిపించాడు. ప్రాక్టీస్ ముగిసిన తర్వాత నవ్వుతూ మైదానం వీడడం అభిమానులకు కొంత ఊరటనిచ్చింది. అయితే మొదటి వన్డే ప్రారంభానికి సమయం తక్కువగా ఉండటంతో, శనివారం జరిగే ఫిట్నెస్ టెస్ట్ తర్వాతే అతడు తొలి మ్యాచ్లో ఆడతాడా లేదా అన్నదానిపై స్పష్టత రానుంది.
రోహిత్-కోహ్లీ జోడీ మెరుపులు.. మోర్కెల్ ప్రశంసలు
గిల్ గాయపడటానికి కాసేపటి ముందే సీనియర్ బ్యాటర్లు రోహిత్ శర్మ, విరాట్ కోహ్లీ పక్కపక్క నెట్స్లోనే ఏకధాటిగా దాదాపు 20 నిమిషాల పాటు తీవ్రంగా చెమటోడ్చారు. ఆఫ్ఘనిస్తాన్ సిరీస్కు దూరంగా ఉన్న కోహ్లీ పూర్తి లయతో కనిపించగా, ఇద్దరూ అద్భుతమైన షాట్లతో అలరించారు.
ఈ సందర్భంగా బౌలింగ్ కోచ్ మోర్నే మోర్కెల్ మాట్లాడుతూ.. "శుభ్మన్ కెప్టెన్గా అద్భుతంగా రాణిస్తున్నాడు. అయితే డ్రెస్సింగ్ రూమ్లో రోహిత్, విరాట్ వంటి అనుభవజ్ఞులైన దిగ్గజాలు ఉండటం యువ ఆటగాళ్లకు కొండంత అండ. వారి మార్గదర్శకత్వం జట్టుకు ఎంతో కీలకం" అని పేర్కొన్నాడు.