CM Revanth Writes to Union Minister: మెట్రో ఫేజ్-2కు త్వరగా ఆమోదం.. కేంద్ర మంత్రికి సీఎం రేవంత్ లేఖ

CM Revanth Writes to Union Minister: హైదరాబాద్ మెట్రో రైలు రెండో దశ ప్రాజెక్టుకు కేంద్ర ప్రభుత్వం త్వరగా ఆమోదం ఇచ్చేలా చూడాలని ముఖ్యమంత్రి ఎ. రేవంత్ రెడ్డి కేంద్ర మంత్రి బండారు దత్తాత్రేయ కిషన్ రెడ్డికి లేఖ రాశారు. రాష్ట్ర ప్రభుత్వం కేంద్రంతో నిరంతరం సంప్రదింపులు జరుపుతోందని, కేంద్ర అధికారులు రాష్ట్ర సంయుక్త కమిటీలోనే చేరతారని సీఎం స్పష్టం చేశారు.

కేంద్ర గృహ నిర్మాణం, పట్టణ వ్యవహారాల శాఖ మంత్రి మనోహర్ లాల్ ఖట్టర్‌తో జరిగిన చర్చల మేరకు రాష్ట్రం తరఫున అవసరమైన చర్యలు తీసుకుంటున్నట్లు లేఖలో పేర్కొన్నారు. ఈ నెల 16న కిషన్ రెడ్డి సీఎంకు రాసిన లేఖలో సంయుక్త కమిటీలో రాష్ట్ర తరఫున ఇద్దరు అధికారుల పేర్లు త్వరగా పంపాలని సూచించిన సంగతి తెలిసిందే. దీనికి ప్రతిస్పందనగా సీఎం రాసిన లేఖను ప్రభుత్వం మంగళవారం విడుదల చేసింది.

లేఖలో సీఎం వివరించిన విధంగా.. డిసెంబరు 12న రాష్ట్రం తరఫున ఆర్థిక శాఖ ముఖ్య కార్యదర్శి, హెచ్‌ఎంఆర్‌ఎల్ ఎండీలను సంయుక్త కమిటీకి నామినేట్ చేసి కేంద్ర పట్టణ వ్యవహారాల శాఖకు తెలియజేశామని చెప్పారు. దీనిపై కేంద్ర శాఖ డిసెంబరు 29న స్పందిస్తూ.. రాష్ట్రం ఏర్పాటు చేసిన కమిటీలోనే తమ ఇద్దరు అధికారులను చేర్చాలని, కమిటీ కూర్పు వివరాలు పంపాలని కోరింది. ఈ వివరాలన్నీ జనవరి 17న లేఖ ద్వారా తెలియజేశామని సీఎం తెలిపారు.

మెట్రో ఫేజ్-2 మంజూరీలో వచ్చిన అడ్డంకులను తొలగించేందుకు గత ఏడాది అక్టోబరు 16న మంత్రిమండలి సమావేశంలో ఫేజ్-1 ప్రాజెక్టును ఎల్ అండ్ టీ నుంచి స్వాధీనం చేసుకునే నిర్ణయం తీసుకున్నామని, చట్టపరమైన, వాణిజ్య, సాంకేతిక అంశాలపై అధికారుల కమిటీని ఏర్పాటు చేశామని వివరించారు. గత ఏడాది డిసెంబరు 18న కేంద్ర మంత్రి ఖట్టర్‌ను వ్యక్తిగతంగా కలిసి చర్చించిన సందర్భంలోనే కేంద్ర-రాష్ట్ర అధికారులతో సంయుక్త కమిటీ ఏర్పాటు చేయాలనే ప్రతిపాదన వచ్చిందని, దాని మేరకు చర్యలు తీసుకుంటున్నామని సీఎం పేర్కొన్నారు.

రాష్ట్ర ప్రజల ప్రయోజనాల దృష్ట్యా తన పలుకుబడిని ఉపయోగించి మెట్రో రెండో దశకు వీలైనంత తొందరగా ఆమోదం తెచ్చిపెట్టాలని కిషన్ రెడ్డిని సీఎం లేఖలో కోరారు.