Historic Cabinet Meeting at Medaram: మేడారంలో చరిత్రాత్మక క్యాబినెట్ సమావేశం: గోదావరి పుష్కరాలు ఘనంగా నిర్వహణ - సమ్మక్క, సారలమ్మలకు పూజలు చేసిన సీఎం రేవంత్‌రెడ్డి

Historic Cabinet Meeting at Medaram: తెలంగాణ రాష్ట్ర మంత్రివర్గం ములుగు జిల్లా మేడారంలోని హరిత హోటల్‌లో ఆదివారం చరిత్రాత్మక సమావేశం జరిగింది. సమ్మక్క, సారలమ్మ మహా జాతర నేపథ్యంలో మారుమూల గిరిజన ప్రాంతంలో మొదటిసారిగా క్యాబినెట్ భేటీ నిర్వహించడం విశేషం. ముఖ్యమంత్రి రేవంత్‌రెడ్డి అధ్యక్షతన సుమారు రెండు గంటల పాటు జరిగిన ఈ సమావేశంలో పలు కీలక నిర్ణయాలు తీసుకున్నారు. అనంతరం సీఎం తన కుటుంబంతో కలిసి వనదేవతలు సమ్మక్క, సారలమ్మలను దర్శించుకుని ప్రత్యేక పూజలు నిర్వహించారు. పునరుద్ధరించిన గద్దెలు, ఆలయ ప్రాంగణాన్ని ప్రారంభించారు.

వచ్చే ఏడాది జులై 23 నుంచి ఆగస్టు 3 వరకు గోదావరి పుష్కరాలను ఘనంగా నిర్వహించాలని క్యాబినెట్ నిర్ణయించింది. బాసర నుంచి భద్రాచలం వరకు గోదావరి పరీవాహక ప్రాంతంలోని ప్రధాన ఆలయాలు, పురాతన దేవాలయాలు, ఎకో టూరిజం అభివృద్ధి కోసం టెంపుల్ సర్క్యూట్‌ను రూపొందించాలని ఆదేశించింది. దీనికోసం దేవాదాయ, రెవెన్యూ, అటవీ, పర్యాటక, పురావస్తు శాఖలు సంయుక్తంగా మార్చి 31 నాటికి సమగ్ర నివేదిక సిద్ధం చేయాలి. త్వరలో క్యాబినెట్ సబ్ కమిటీ ఏర్పాటు చేస్తామని మంత్రులు పొంగులేటి శ్రీనివాసరెడ్డి, కోమటిరెడ్డి వెంకట్‌రెడ్డి, సీతక్క వెల్లడించారు.

మంత్రివర్గం తీసుకున్న ఇతర ముఖ్య నిర్ణయాల్లో వీలైనంత త్వరగా మున్సిపల్ ఎన్నికలు నిర్వహించాలని, ఫిబ్రవరిలో రంజాన్, శివరాత్రి పండగలు ఉన్నందున షెడ్యూల్‌ను జాగ్రత్తగా రూపొందించాలని సూచించింది. హైదరాబాద్ మెట్రో రైల్ ఫేజ్-1ని ఎల్‌అండ్‌టీ నుంచి స్వాధీనం చేసుకునే ప్రక్రియను వేగవంతం చేయాలని, ఫేజ్-2లో భూసేకరణకు రూ.2,787 కోట్లు మంజూరు చేసింది. హైదరాబాద్‌లో ట్రాఫిక్ సమస్యలు తగ్గించేందుకు బంజారాహిల్స్ నుంచి శిల్పా లే అవుట్ వరకు 9 కి.మీ. కొత్త హైలెవల్ బ్రిడ్జి నిర్మాణానికి ఆమోదం తెలిపింది. అబ్దుల్లాపూర్‌మెట్‌లో ఎకో టౌన్ అభివృద్ధికి 494 ఎకరాల భూమి కేటాయించింది. కేంద్ర, రాష్ట్ర సంస్థలకు 14 ప్రాంతాల్లో భూములు కేటాయించేందుకు అనుమతి ఇచ్చింది.

సమావేశం అనంతరం సీఎం రేవంత్‌రెడ్డి తన మనవడితో కలిసి సమ్మక్క, సారలమ్మలకు నిలువెత్తు బంగారాన్ని సమర్పించారు. గద్దెల ప్రాంగణంలో పైలాన్‌ను ఆవిష్కరించారు. భక్తులతో మాట్లాడుతూ, మంత్రులతో కలిసి పూజల్లో పాల్గొన్నారు. ఉప ముఖ్యమంత్రి భట్టి విక్రమార్క, మంత్రులు, ఎమ్మెల్యేలు, ప్రజాప్రతినిధులు ఈ కార్యక్రమాల్లో పాల్గొన్నారు. "గిరిజనుల ఆరాధ్య దైవాల సమక్షంలో క్యాబినెట్ సమావేశం జరగడం గర్వకారణం" అని మంత్రులు పేర్కొన్నారు. ఇది తెలంగాణ ప్రభుత్వం గిరిజన అభివృద్ధికి చూపుతున్న ప్రాధాన్యతను తెలియజేస్తోంది.