Social Media War in Jubilee Hills By-Election: జూబ్లీహిల్స్ ఉపఎన్నికల్లో సోషల్ మీడియా యుద్ధం: పాత వీడియోలు, ఫొటోలతో మైండ్ గేమ్!

Social Media War in Jubilee Hills By-Election: జూబ్లీహిల్స్ అసెంబ్లీ  ఉపఎన్నికల సమయంలో సోషల్ మీడియా ప్లాట్‌ఫామ్‌లు యుద్ధభూమిగా మారాయి. పాత వీడియోలు, ఫొటోలు, ఏఐ జనరేటెడ్ కంటెంట్‌తో పార్టీలు ఓటర్ల మనసులపై పోరు పడుతున్నాయి. పోలింగ్ దినానికి ముందే ఈ 'సోషల్ వార్' ఊపందుకుని, ఫేక్ న్యూస్, ఎడిటెడ్ క్లిప్స్ వైరల్ అవుతున్నాయి. ఎక్స్, ఫేస్‌బుక్, ఇన్‌స్టాగ్రామ్‌తో పాటు వాట్సాప్, టెలిగ్రామ్ గ్రూపుల్లో కూడా ఈ కంటెంట్ వ్యాప్తి చెందుతోంది. ఈ మైండ్ గేమ్‌తో ఓటర్లు గందరగోళానికి గురవుతున్నారు.

పార్టీల ప్రచార యుద్ధం: ఫేక్ కంటెంట్ వర్షం

కాంగ్రెస్, బీఆర్ఎస్ మధ్య పోటీ తీవ్రతరమైంది. సీఎం రేవంత్ రెడ్డి, మంత్రుల మాటల్ని కత్తిరించి అనుకూలంగా మార్చి రీల్స్, షార్ట్స్‌గా పోస్ట్ చేస్తున్నారు. బీఆర్ఎస్ వైపు నుంచి కాంగ్రెస్ అభ్యర్థి నవీన్ యాదవ్‌పై ఫేక్ క్లిప్ వైరల్: "రోజూ నమాజ్ చేసే బదులు స్నానం చేయండి" అని చెప్పినట్టు తయారు చేసి ముస్లిం ఓటర్లను దూరం చేయడానికి ప్రయత్నిస్తున్నారు. ఇలాంటి ఏఐ జనరేటెడ్ వీడియోలు, ఎడిటెడ్ ఫొటోలు పార్టీల అంతర్గత చిచ్చును పెంచుతున్నాయి.

వెలుగు దినపత్రిక పేరుతో కూడా ఫేక్ క్లిప్పింగ్‌లు తయారు చేసి కాంగ్రెస్‌లో గందరగోళం సృష్టిస్తున్నారు. 'ఫ్యాక్టరీ'లా ఇబ్బడి ముబ్బడిగా క్లిప్పింగ్‌లు వండుతూ, సోషల్ మీడియా వారియర్స్ ఓటర్లను తప్పుదారి పట్టించుతున్నారు. లెటెస్ట్ సర్వేల పేరుతో గ్రాఫ్‌లు చూపించి, పార్టీల వారీగా 'గెలుపు' ప్రకటనలు చేస్తూ మైండ్ గేమ్ ఆడుతున్నారు. "అదిగో పాము, అంటే ఇదిగో తోక" అన్నట్టు నమ్మించేలా కంటెంట్ వదులుతున్నారు.

నగదు పంపిణీ ఆరోపణలు: పోలీసులు అప్రమత్తంగా

కాంగ్రెస్ అధికార ప్రతినిధి సయ్యద్ నిజాముద్దీన్, బీఆర్ఎస్ నాయకులు ఓటర్లకు నగదు పంపిణీ చేస్తున్నారని ఆరోపించారు. "ఫేక్ ఫొటోలు, వీడియోలతో మైండ్ డైవర్ట్ చేస్తూ డబ్బులు పంచి గెలవాలని చూస్తున్నారు" అని అన్నారు. సైబర్ క్రైమ్ పోలీసులు చర్యలు తీసుకోవాలని కోరారు. ఇప్పటికే రూ.2.90 కోట్ల నగదు స్వాధీనం చేసుకున్న అధికారులు, ఈ ఫేక్ ప్రచారాలపై కూడా అప్రమత్తంగా ఉన్నారు.

ఓటర్ల గందరగోళం: ఎన్నికల కోడ్ ఉల్లంఘనలు

ఈ సోషల్ మీడియా యుద్ధం ఓటర్లను గందరగోళానికి గురిచేస్తోంది. పోలింగ్ ముందు ఈ ఫేక్ కంటెంట్ వల్ల ఎన్నికల కోడ్ ఉల్లంఘనలు పెరుగుతున్నాయి. పార్టీలు తమకు అనుకూలంగా మార్చుకుని పాత వీడియోలు, ఫొటోలతో ప్రచారం చేస్తున్నాయి. ఈ మైండ్ గేమ్‌లో ఓటర్లు జాగ్రత్తగా ఉండాలని అధికారులు సూచించారు.

జూబ్లీహిల్స్ ఉపఎన్నికల్లో 58 మంది అభ్యర్థులు పోటీపడుతున్నారు. కాంగ్రెస్ నుంచి వి. నవీన్ యాదవ్, బీఆర్ఎస్ నుంచి మాగంటి సునీత, బీజేపీ నుంచి లంకల దీపక్ రెడ్డి ప్రధాన పోటీదారులు. నవంబర్ 14న కౌంటింగ్ జరగనుంది. ఈ సోషల్ మీడియా యుద్ధం ఎన్నికల ఫలితాలపై ప్రభావం చూపుతుందా అనేది చూడాలి.