Amaravati International Airport: 4,618 ఎకరాల్లో అమరావతి అంతర్జాతీయ విమానాశ్రయం

తాడికొండ మండలం రావెల సమీపంలో స్థలం గుర్తింపు • గ్రామాల్ని తరలించకుండా జాగ్రత్తలు • తొలి దశలో రూ.3,409 కోట్ల పెట్టుబడి

Amaravati International Airport: అమరావతి అంతర్జాతీయ విమానాశ్రయం నిర్మాణం కోసం గుంటూరు జిల్లా తాడికొండ మండలంలోని రావెల గ్రామం సమీపంలో సుమారు 4,618 ఎకరాల విస్తీర్ణంలో అనువైన స్థలాన్ని గుర్తించారు. రాజధాని అమరావతితో పాటు గుంటూరు, విజయవాడ నగరాల సామీప్యత, అనుసంధానతను దృష్టిలో ఉంచుకుని ఈ ప్రాంతాన్ని ఎంపిక చేశారు. ఈ స్థలం ప్రతిపాదిత అమరావతి అవుటర్ రింగ్ రోడ్డుకు సమీపంలో ఉంది. ప్రస్తుత సచివాలయం నుంచి సుమారు 15 కిలోమీటర్ల దూరంలో ఉంటుంది.

హైదరాబాద్‌లోని శంషాబాద్ అంతర్జాతీయ విమానాశ్రయం నిర్మాణ సమయంలో నాలుగు గ్రామాలను తరలించాల్సి వచ్చింది. అయితే, అమరావతి విమానాశ్రయం నిర్మాణంలో ఒక్క గ్రామాన్ని కూడా తరలించకుండా, వాటిని అభివృద్ధిలో భాగం చేసే ప్రభుత్వ విధానానికి అనుగుణంగా జాగ్రత్తలు తీసుకున్నారు. ఎంపిక చేసిన భూములు ప్రస్తుతం జరుగుతున్న రాజధాని రెండో దశ భూసమీకరణలో భాగం కావు. భూసమీకరణ లేదా భూసేకరణ విషయంలో రైతుల అభిప్రాయాలను దృష్టిలో ఉంచుకుని ప్రభుత్వం త్వరలో నిర్ణయం తీసుకునే అవకాశం ఉంది.

భారత విమానాశ్రయాల ప్రాధికార సంస్థ (ఏఏఐ) ఇప్పటికే ప్రీ-ఫీజిబులిటీ స్టడీ పూర్తి చేసి పచ్చజెండా ఊపింది. రైట్స్ కన్సల్టెన్సీ సంస్థ టెక్నో ఎకనామిక్ ఫీజిబులిటీ రిపోర్టు సిద్ధం చేసింది.

ప్రాజెక్టు వివరాలు:

తొలి దశలో రూ.3,409 కోట్ల పెట్టుబడి అవసరం.

భారీ బోయింగ్ 777 విమానాలు దిగేలా రన్‌వేను డిజైన్ చేశారు.

తొలి దశలో 2,648 ఎకరాల్లో అభివృద్ధి. 4,000 మీటర్ల పొడవు, 60 మీటర్ల వెడల్పు గల ఒక రన్‌వే.

వచ్చే 60 ఏళ్లలో ఐదు దశల్లో విస్తరణ ప్రణాళిక.

2028-30 మధ్య నిర్మాణం పూర్తి చేసి, మొదటి పదేళ్లలో వార్షికంగా 63.5 లక్షల మంది ప్రయాణికుల సామర్థ్యం.

అనంతపురం-గుంటూరు జాతీయ రహదారి (NH-544D) విస్తరణతో విమానాశ్రయం సమీపంగా కలుస్తుంది.

సమగ్ర వైమానిక హబ్‌గా అభివృద్ధి:

4,618 ఎకరాల్లో 3,823 ఎకరాలు విమానాశ్రయం, సంబంధిత సదుపాయాలు (ఎంఆర్‌ఓ - మెయింటెనెన్స్, రిపేర్, ఓవర్‌హాల్), హోటళ్లు, వాణిజ్య కాంప్లెక్స్‌ల కోసం కేటాయిస్తారు. 795 ఎకరాలు వాణిజ్య అవసరాలకు, అప్రోచ్ రోడ్డు కోసం మరో 200 ఎకరాలు ఉపయోగపడతాయి.

దూరాలు:

గన్నవరం విమానాశ్రయం: 60 కి.మీ.

గుంటూరు రైల్వే స్టేషన్: 21 కి.మీ.

విజయవాడ బస్టాండ్: 43 కి.మీ.

ఈ ప్రాజెక్టు అమరావతిని ఆధునిక వైమానిక హబ్‌గా మార్చి, రాష్ట్ర అభివృద్ధికి కొత్త ఊపిరి పోస్తుందని అధికారులు భావిస్తున్నారు.