CM Chandrababu: అక్టోబర్ 2 నాటికి ఏపీని చెత్త రహిత రాష్ట్రంగా చేస్తాం: సీఎం చంద్రబాబు

CM Chandrababu: రాష్ట్రంలో అక్టోబర్ 2 నాటికి చెత్త లేకుండా చేస్తామని ముఖ్యమంత్రి చంద్రబాబు స్పష్టం చేశారు. చెత్తను సంపదగా మార్చడమే కూటమి ప్రభుత్వ లక్ష్యమని ఆయన ప్రకటించారు. గుడివాడలో నిర్వహించిన స్వర్ణాంధ్ర-స్వచ్ఛాంధ్ర కార్యక్రమంలో చంద్రబాబు పాల్గొని ప్రసంగించారు.

ఈ సందర్భంగా గుంటూరు, నెల్లూరు నగరాల్లో చెత్త సేకరణకు ఉపయోగపడే ఎలక్ట్రిక్ ఆటోలను వర్చువల్‌గా ప్రారంభించారు. చెత్త నిర్వహణలో ఉత్తమంగా పని చేసిన వారికి పురస్కారాలు అందజేశారు. ప్రతి ఇంట్లోని వ్యక్తులు తామే తడి, పొడి చెత్తను వేరు చేసి వ్యవస్థీకరించాలని చంద్రబాబు ప్రజలకు పిలుపునిచ్చారు.

చంద్రబాబు మాట్లాడుతూ, ‘‘మే 23 నుంచి జూన్ 20 వరకు ‘ఆపరేషన్ క్లీన్ స్వీప్’ కార్యక్రమం నిర్వహించాం. ఆగస్టు 26 నాటికి 1,140 ఈ-ఆటోలు అందుబాటులోకి వస్తాయి. 108 సమగ్ర ఘన వ్యర్థాల ప్రాసెసింగ్ కేంద్రాల ఏర్పాటుకు రూ.528 కోట్లు ఖర్చు చేస్తున్నాం. ‘ప్రజారథం’ కార్యక్రమం ద్వారా చెత్తను కొనుగోలు చేసి నిత్యావసర వస్తువులు అందజేశాం. దీనికోసం ఇప్పటికే రూ.16 కోట్లు ఖర్చు చేశాం. చెత్త నుంచి సంపద సృష్టించడమే మా లక్ష్యం’’ అని వివరించారు. ఇంటి నుంచే కరెంటు ఉత్పత్తి చేసుకోవాలని కూడా ఆయన సూచించారు.

రాష్ట్రాభివృద్ధిలో ప్రజల వంతు విరాళాలు

స్వర్ణాంధ్ర-స్వచ్ఛాంధ్ర కార్యక్రమంలో పాల్గొన్న ప్రజలు రాష్ట్రాభివృద్ధికి తమ వంతు సహాయం అందించారు. అమరావతి అభివృద్ధి కోసం గుడివాడకు చెందిన సాయిశ్వేత బంగారు గాజులు విరాళంగా ఇచ్చారు. ఆమె కుమారుడు దాచిన కిడ్డీ బ్యాంక్ నగదును కూడా అమరావతి అభివృద్ధికి వినియోగించాలని కోరారు.

అదేవిధంగా గుడివాడ ఆర్టీసీ బస్టాండ్ అభివృద్ధి కోసం అన్నే నరసింహారావు, పుష్ప లీలావతి దంపతులు రూ.3 కోట్ల విరాళం ప్రకటించారు. గతంలో గుడివాడ ప్రభుత్వ ఆస్పత్రికి కూడా వీరు రూ.3 కోట్లు విరాళం ఇచ్చిన విషయం తెలిసిందే.