Nara Lokesh: ఏటా డీఎస్సీ నిర్వహిస్తాం.. 148 రోజుల్లోనే మెగా డీఎస్సీ పూర్తి: అసెంబ్లీలో మంత్రి నారా లోకేశ్‌

Nara Lokesh: ఆంధ్రప్రదేశ్ అసెంబ్లీ వర్షాకాల సమావేశాలు ప్రారంభమైన సందర్భంగా రాష్ట్ర విద్యాశాఖ మంత్రి నారా లోకేశ్‌ మెగా డీఎస్సీ-2025పై కీలక ప్రకటనలు చేశారు. ఏటా డీఎస్సీ నిర్వహిస్తామని ఎన్నికల ముందు హామీ ఇచ్చినట్లే ఇకనుంచి ప్రతి సంవత్సరం డీఎస్సీ నిర్వహిస్తామని ఆయన స్పష్టం చేశారు.

కూటమి ప్రభుత్వం డీఎస్సీని చాలా బాధ్యతగా తీసుకుని నిర్వహించిందని మంత్రి లోకేశ్‌ పేర్కొన్నారు. మొత్తం 16,347 పోస్టులకు మెగా డీఎస్సీ నిర్వహించగా, 3,36,300 మంది అభ్యర్థులు దరఖాస్తు చేసుకున్నారు. 148 రోజుల్లోనే నియామక ప్రక్రియ పూర్తి చేశామని ఆయన తెలిపారు. డీఎస్సీ కోసం 42 వేల ప్రశ్నలు తయారు చేశామని, టీసీఎస్‌ ఐయాన్‌ ప్లాట్‌ఫాం ద్వారా పరీక్షలు నిర్వహించామని, సర్టిఫికెట్ వెరిఫికేషన్‌ను జిల్లా స్థాయిలో చేపట్టామని వివరించారు. వర్టికల్‌, హారిజంటల్‌ రిజర్వేషన్లను దేశ చరిత్రలోనే తొలిసారి అమలు చేశామని, మహిళలకు 33 శాతం రిజర్వేషన్‌ కల్పించామని, స్పోర్ట్స్‌ కేటగిరీలను 29 నుంచి 65కు పెంచామని చెప్పారు. ఎస్సీ వర్గీకరణ పూర్తయిన తర్వాతే డీఎస్సీ నిర్వహించామని ఆయన స్పష్టం చేశారు.

తెలుగుదేశం పార్టీ ఆవిర్భావం నుంచి పాఠశాలల్లో అనేక సంస్కరణలు తీసుకొచ్చామని, టీచర్‌ రిక్రూట్‌మెంట్‌ లేకుండా పాఠశాలలు అభివృద్ధి చెందవని మంత్రి అన్నారు. తెలుగుదేశం హయాంలో లక్షా 80 వేల మంది ఉపాధ్యాయులను నియమించామని, ప్రస్తుత ప్రభుత్వం టీచర్లను సింగపూర్‌, ఫిన్‌లాండ్‌లకు శిక్షణ కోసం పంపిందని గుర్తు చేశారు. దీనికి విరుద్ధంగా గత వైకాపా ప్రభుత్వం 2019 నుంచి 2024 వరకు ఒక్క టీచర్‌ ఉద్యోగ నియామకం కూడా చేయలేదని, 12 లక్షల మంది పిల్లలు ప్రభుత్వ పాఠశాలల నుంచి ప్రైవేటు పాఠశాలలకు వెళ్లిపోయారని, టీచర్లను మద్యం దుకాణాల ముందు నిలబెట్టారని ఆయన విమర్శించారు.

డీఎస్సీపై వైకాపా ‘టీమ్‌ 11’ 11 అనవసర ఆరోపణలు చేస్తోందని, కులం, మతం పేరుతో రాష్ట్రంలో చిచ్చు పెడుతోందని మంత్రి లోకేశ్‌ ఆరోపించారు. ఏడాది తర్వాత అక్రమాలు జరిగాయని చెబుతున్నారు కానీ ఆధారాలు చూపాలని సవాలు విసిరారు. భిన్నాభిప్రాయాలతో 336 కేసులు కోర్టుల్లో దాఖలయ్యాయని, అయినా పారదర్శకంగా నియామకాలు జరిగాయని, అందుకే వేల మంది ఉపాధ్యాయులు స్వచ్ఛందంగా ప్రభుత్వానికి అండగా నిలిచారని చెప్పారు. జగన్‌ అసెంబ్లీకి వస్తే చర్చకు సిద్ధమని, ఎక్కడైనా చర్చకు సిద్ధమని మంత్రి లోకేశ్‌ సవాలు చేశారు. మెగా డీఎస్సీపై నిజాలు తెలియజేస్తూ సమాచారాన్ని సభ్యులకు పుస్తక రూపంలో పంపామని కూడా ఆయన తెలిపారు.