Minister B. C. Janardhan Reddy: భోగాపురం అంతర్జాతీయ విమానాశ్రయం: జులై లేదా ఆగస్టులో ప్రారంభం - మంత్రి బీసీ జనార్దన్రెడ్డి
జులై లేదా ఆగస్టులో ప్రారంభం - మంత్రి బీసీ జనార్దన్రెడ్డి
Minister B. C. Janardhan Reddy: అల్లూరి సీతారామరాజు భోగాపురం అంతర్జాతీయ విమానాశ్రయం నిర్మాణ పనులు తుది దశకు చేరుకున్నాయని, ఈ ఏడాది జులై లేదా ఆగస్టు నెలలో ప్రారంభించే అవకాశం ఉందని రాష్ట్ర రహదారులు, భవనాల శాఖ మంత్రి బీసీ జనార్దన్రెడ్డి వెల్లడించారు.
ఆదివారం విజయనగరం, పార్వతీపురం జిల్లాల్లో పర్యటించిన మంత్రి భోగాపురం విమానాశ్రయం నిర్మాణ స్థలాన్ని పరిశీలించారు. జీఎంఆర్ సంస్థ ప్రతినిధులతో వివరంగా చర్చించి, పనుల పురోగతిని సమీక్షించారు. అనంతరం విలేకరుల సమావేశంలో మాట్లాడుతూ, ప్రస్తుతం నిర్మాణ పనులు 97 శాతం పూర్తయ్యాయని తెలిపారు.
ఎర్త్ రన్వే పనులు 100 శాతం, ఎయిర్ ట్రాఫిక్ కంట్రోల్ (ATC) పనులు 95 శాతం పూర్తయ్యాయని మంత్రి వివరించారు. జులై 5, జులై 8 లేదా ఆగస్టు 17, ఆగస్టు 19 తేదీల్లో ఏదో ఒక రోజు విమానాశ్రయాన్ని ప్రారంభించే అవకాశాలు ఉన్నట్లు సూచించారు.
అనుసంధాన రహదారుల అభివృద్ధి పనులు కూడా త్వరలో పూర్తి చేస్తామని జనార్దన్రెడ్డి చెప్పారు. ఉత్తరాంధ్ర అభివృద్ధికి ఈ విమానాశ్రయం మైలురాయిగా నిలుస్తుందని, ప్రయాణీకుల సౌకర్యం, ఆర్థిక అభివృద్ధి, పర్యాటకం వంటి రంగాల్లో ఇది కీలక పాత్ర పోషిస్తుందని ఆయన అన్నారు.
ఈ పర్యటనలో ఎంపీ కలిశెట్టి అప్పలనాయుడు, ఎమ్మెల్యే అదితి గజపతిరాజు, మంత్రి కొండపల్లి శ్రీనివాస్, ఎమ్మెల్యే లోకం నాగమాధవి తదితరులు పాల్గొన్నారు.
రాష్ట్రంలో మరిన్ని ఆరు కొత్త విమానాశ్రయాల నిర్మాణం చేపడుతున్నట్లు మంత్రి తెలిపారు. విశాఖపట్నం నుంచి ఏడు ప్రాధాన్య రహదారుల అభివృద్ధి పనులు కూడా వేగంగా జరుగుతున్నాయని ఆయన వివరించారు.
ఈ అంతర్జాతీయ విమానాశ్రయం ప్రారంభంతో ఉత్తరాంధ్ర ప్రజల చిరకాల కల సాకారమవుతుందని, ప్రాంతీయ అభివృద్ధి వేగం పుంజుకుంటుందని అధికారులు, స్థానికులు ఆశాభావం వ్యక్తం చేస్తున్నారు.
