AP IT Minister Nara Lokesh: చంద్రబాబు తమకు మార్గదర్శకులు, తాము మిస్సైల్స్లా పని చేస్తాం: లోకేశ్
తాము మిస్సైల్స్లా పని చేస్తాం: లోకేశ్
AP IT Minister Nara Lokesh: ఆంధ్రప్రదేశ్ ముఖ్యమంత్రి చంద్రబాబు నాయుడు తమకు మార్గదర్శకులని, తాము మిస్సైల్స్లా పనిచేస్తున్నామని విద్య, ఐటీ మంత్రి నారా లోకేశ్ అన్నారు. యూరప్లోని తెలుగు ప్రవాసుల సమావేశంలో మాట్లాడుతూ, చంద్రబాబు నాయకత్వంలో యువ మంత్రుల బృందం ఎలాంటి అహంకారాలు లేకుండా పనిచేస్తోందని చెప్పారు. గత వైకాపా ప్రభుత్వంలో మంత్రులు చలికి భయపడి దావోస్ వెళ్లలేదని విమర్శించారు. కానీ చంద్రబాబు ఎండా వానా చలి తేడా లేకుండా ప్రజల కోసం శ్రమిస్తున్నారని ప్రశంసించారు. ఆయన 45 ఏళ్ల రాజకీయ అనుభవంతో తమను నడిపిస్తున్నారని, ఇది తమ అదృష్టమని అన్నారు.
మంత్రుల మధ్య పనిలో ఆరోగ్యకరమైన పోటీ ఉందని లోకేశ్ తెలిపారు. తాను విశాఖ ఆర్థిక కారిడార్ గురించి మాట్లాడితే, టీజీ భరత్ తిరుపతి కారిడార్ గురించి చెబుతున్నారని, పెట్టుబడుల ఆకర్షణలో తాము పోటీపడుతున్నామని పేర్కొన్నారు. జ్యూరిక్లో జరిగిన యూరప్ తెలుగు డయాస్పొరా సదస్సులో ఆయన ఈ వ్యాఖ్యలు చేశారు.
ప్రభుత్వ నిర్ణయాల్లో ఏవైనా తప్పులుంటే ప్రవాసులు తెలియజేయాలని లోకేశ్ కోరారు. గత ఎన్నికల్లో ప్రజలు తమను ఎన్నుకున్న ఆశయాలను సాకారం చేయడం తమ బాధ్యత అన్నారు. ఇది ప్రజల ప్రభుత్వమని, తప్పులను సరిదిద్దుకునేందుకు సిద్ధమని చెప్పారు. డిప్యూటీ సీఎం పవన్కల్యాణ్ చెప్పినట్లు ఈ ప్రభుత్వం కనీసం 15 ఏళ్లు కొనసాగాలని అన్నారు.
ప్రవాసాంధ్రులు సముద్రాలు దాటినా తెలుగు సంప్రదాయాలను మరచిపోలేదని లోకేశ్ అభినందించారు. జ్యూరిక్లో తెలుగువారి ఉత్సాహం అద్భుతమని, యూరప్లోని 20 దేశాల నుంచి వచ్చారని చెప్పారు. చంద్రబాబు, తాను విదేశాలకు వెళ్లినప్పుడు ముందుగా తెలుగువారిని కలుస్తామని తెలిపారు. గత ఏడాది ఇక్కడి నుంచే ఏపీ అభివృద్ధి కథ ప్రారంభమైందని, దావోస్ సమావేశాల తర్వాత 18 నెలల్లో రూ.23.5 లక్షల కోట్ల పెట్టుబడులు వచ్చాయని, 16 లక్షల ఉద్యోగాలు సృష్టించబడతాయని వివరించారు. భారత్కు వచ్చిన పెట్టుబడుల్లో 25.3% ఏపీకేనని పేర్కొన్నారు.
చంద్రబాబు ఐటీ నుంచి క్వాంటమ్ టెక్నాలజీ వరకు రాష్ట్రాన్ని ముందుకు తీసుకెళ్తున్నారని లోకేశ్ కొనియాడారు. గూగుల్ 15 బిలియన్ డాలర్ల పెట్టుబడి, పారిశ్రామికవేత్తల ఆసక్తి అంతా ఆయన వల్లేనని అన్నారు. ఆయన ఒక అరుదైన వ్యక్తి అని, ఆయన్ను అనుసరిస్తే చాలని చెప్పారు. భోగాపురం ఎయిర్పోర్టు, అమరావతి నిర్మాణం వంటి ప్రాజెక్టులపై విమర్శలు చేస్తున్నారని, జగన్ ఎగతాళి చేసినా చంద్రబాబు వాటిని సాధించి చూపించారని తెలిపారు.
ప్రవాసులను ఏపీ బ్రాండ్ అంబాసిడర్లుగా పరిగణించాలని లోకేశ్ సూచించారు. రాష్ట్రంలో పెట్టుబడులు పెట్టాలని, తమ కంపెనీలకు ఏపీ గురించి చెప్పాలని పిలుపునిచ్చారు. తెలుగుజాతి గర్వపడేలా పనిచేద్దామని అన్నారు.
ఏపీలో 'టీమ్ 11' అనే ఏడుపు బృందం ఉందని లోకేశ్ ఎద్దేవా చేశారు. పెట్టుబడులు తెస్తామంటే ఏడుస్తారని, విదేశీ కంపెనీలకు ఏపీకి రావద్దని మెయిల్స్ పంపుతారని విమర్శించారు. చంద్రబాబు ప్రభావంతో కంపెనీలు వస్తే క్రెడిట్ తమదనుకుంటారని, వారికి కోడికత్తి, కుటుంబ సభ్యులపై దాడుల వంటి 'క్రెడిట్'లు మాత్రమే ఇవ్వగలమని ధ్వజమెత్తారు.
ఇదే సందర్భంలో, లోకేశ్ స్విట్జర్లాండ్లోని బ్యూలర్ ఇండియా ఛైర్మన్ దీపక్ మానేతో సమావేశమయ్యారు. ఏపీలో బ్యూలర్ ఫుడ్స్ అండ్ గ్రెయిన్ టెక్నాలజీ సెంటర్ ఏర్పాటు చేయాలని కోరారు. ఇది రాష్ట్ర ఆహార పరిశ్రమ అభివృద్ధికి దోహదపడుతుందని చెప్పారు.
