Changes in AP Administrative Map: ఏపీ అడ్మినిస్ట్రేటివ్‌ మ్యాప్‌లో మార్పులు: మూడు కొత్త జిల్లాల ప్ర‌క‌ట‌న!
మూడు కొత్త జిల్లాల ప్ర‌క‌ట‌న!
Changes in AP Administrative Map: మార్కాపురం, మదనపల్లె కేంద్రాలుగా రెండు కొత్త జిల్లాలతోపాటి, పోలవరం ప్రాజెక్టు ముంపు ప్రాంతాల అభివృద్ధి లక్ష్యంగా రంపచోడవరం కేంద్రంగా మరో జిల్లా ఏర్పాటు ప్రతిపాదన తాజాగా తెరపైకి వచ్చింది. జిల్లాల సరిహద్దుల మార్పులు, రెవెన్యూ డివిజన్ల చేర్పులపై ముఖ్యమంత్రి చంద్రబాబు సోమవారం మంత్రులు, అధికారులతో సమీక్షించారు. మంగళవారం మరోసారి చర్చించి నిర్ణయాలు తీసుకునేందుకు సిద్ధమవుతున్నారు.
సీఎం సమీక్ష.. నేడు మరోసారి సమావేశం
నేతలు చెబితేనే ఎన్టీఆర్ జిల్లాలో పెనమలూరు చేరుస్తారా?
మంత్రివర్గ ఉపసంఘం మరెందుకని ప్రశ్నించిన సీఎం
ఈనాడు, అమరావతి: మార్కాపురం (ప్రస్తుతం ప్రకాశం జిల్లా), మదనపల్లె (ప్రస్తుతం అన్నమయ్య జిల్లా) కేంద్రాలుగా కొత్త జిల్లాలు, రంపచోడవరం కేంద్రంగా మూడవ జిల్లా ఏర్పాటు అంశాలు ముఖ్యమంత్రి చంద్రబాబు సమీక్షలో చర్చకు వచ్చాయి. పోలవరం ముంపు ప్రాంతాల అభివృద్ధి కోసం రంపచోడవరం జిల్లా ఏర్పాటుకు సీఎం పచ్చజెండా ఊపారు. రంపచోడవరం, చింతూరు రెవెన్యూ డివిజన్లను తూర్పుగోదావరి జిల్లాలో కలిపితే జనాభా 24.48 లక్షలకు చేరి, 10 నియోజకవర్గాలతో పెద్ద జిల్లాగా మారుతుందని అధికారులు ప్రతిపాదించారు. చింతూరు నుంచి పాడేరు జిల్లా కేంద్రానికి 215 కి.మీ. దూరం ఉండటం వల్ల ఈ మార్పు అవసరమని వాదన.
కొత్త జిల్లాలు, రెవెన్యూ డివిజన్ల సరిహద్దుల మార్పులు, చేర్పులపై సోమవారం సచివాలయంలో మంత్రులు, అధికారులతో సీఎం చంద్రబాబు సమీక్షించారు. మంత్రివర్గ ఉపసంఘం ప్రజంటేషన్‌లో పలు ప్రతిపాదనలు అందించగా, అందులోని అంశాలపై చర్చించి మరిన్ని సూచనలు చేశారు. అవసరమైనంత మాత్రమే మార్పులు, చేర్పులు ఉండాలని సీఎం ఆదేశించారు. మంగళవారం మరోసారి సమావేశం నిర్వహించి నిర్ణయాలు తీసుకుంటారు. అధికారులు సీఎం సూచనల మేరకు మరో నివేదిక తయారు చేస్తున్నారు.
పెనమలూరును ఎన్టీఆర్ జిల్లాలో ప్రతిపాదించరా?
విజయవాడలో భాగమైన పెనమలూరు నియోజకవర్గాన్ని విస్మరించి, దూరంగా ఉన్న గన్నవరం, నూజివీడు నియోజకవర్గాలను ఎన్టీఆర్ జిల్లాలో చేర్చాలనే ప్రతిపాదనపై సీఎం చంద్రబాబు ప్రశ్నలు లేవనెత్తారు. "ప్రజాప్రతినిధులు చెబితేనే చేర్చాలా? భౌగోళిక పరిస్థితులు పరిగణనలోకి తీసుకోవాలి కదా? అలాంటప్పుడు మంత్రివర్గ ఉపసంఘం ఏ స్థాయి పని చేస్తుంది?" అని ప్రశ్నించారు. ఎన్టీఆర్, ఏలూరు, కృష్ణా జిల్లాల మార్పులపై చర్చ జరిగింది. కృష్ణా జిల్లాలోని గన్నవరం, ఏలూరు జిల్లాలోని నూజివీడు నియోజకవర్గాలను ఎన్టీఆర్‌లో చేర్చాలని ఉపసంఘం ప్రతిపాదించడంపై సీఎం అసంతృప్తి వ్యక్తం చేశారు. ఈ అంశాలపై తర్వాత ఆలోచించి నిర్ణయిస్తామని చెప్పారు.
తూర్పుగోదావరి పెద్ద జిల్లాగా మారుతుంది..
రంపచోడవరం, చింతూరు రెవెన్యూ డివిజన్లు ప్రస్తుతం అల్లూరి సీతారామరాజు జిల్లాలో ఉన్నాయి. ఈ రెండు డివిజన్లను తూర్పుగోదావరి జిల్లాలో కలిపితే పెద్ద జిల్లాగా మారుతుందని, జనాభా 24.48 లక్షలకు చేరుతుందని అధికారులు చెప్పారు. పోలవరం ముంపు ప్రాంతాల అభివృద్ధికి రంపచోడవరం జిల్లా ఏర్పాటు అవసరమని సీఎం సూచించారు. ముంపు గ్రామాల వివరాలతో నివేదిక తయారు చేసిన అధికారులు, మంగళవారం చర్చకు సిద్ధమవుతున్నారు.
ప్రకాశం జిల్లాలో అద్దంకి, కందుకూరు చేర్పు
అద్దంకి, కందుకూరు నియోజకవర్గాలను ప్రకాశం జిల్లాలో చేర్చాలనే ప్రతిపాదనకు సీఎం సానుకూలంగా స్పందించారు. అద్దంకి, మడకశిర రెవెన్యూ డివిజన్ల ఏర్పాటుకు పచ్చజెండా ఊపారు. బనగానపల్లె డివిజన్ ప్రతిపాదనను ప్రస్తుతానికి నిలిపివేశారు. గూడూరు డివిజన్‌ను తిరుపతి జిల్లా నుంచి శ్రీపొట్టి శ్రీరాములు నెల్లూరు జిల్లాలో చేర్చాలని, చిత్తూరు జిల్లాలోని నగరి డివిజన్‌ను తిరుపతి జిల్లాలో కలపాలని ప్రతిపాదించారు. వీటిపై మంగళవారం చర్చలు జరుగనున్నాయి.
