Nara Lokesh: ఉద్యోగాల కల్పనే లక్ష్యం.. పెట్టుబడులకు ఏపీకి ఆహ్వానం: నారా లోకేశ్
నారా లోకేశ్
Nara Lokesh: ఆంధ్రప్రదేశ్లో ఉద్యోగాల కల్పనే ఏకైక ఎజెండా అని విద్య, ఐటీ శాఖల మంత్రి నారా లోకేశ్ స్పష్టం చేశారు. రాష్ట్రానికి పెట్టుబడులు ఆకర్షించేందుకు దిల్లీలో పలు జాతీయ, అంతర్జాతీయ సంస్థల ప్రతినిధులతో వరుస భేటీలు నిర్వహించారు. పబ్లిక్ ఎఫైర్స్ ఫోరం ఆఫ్ ఇండియా 13వ వార్షిక సదస్సులో ‘స్వర్ణాంధ్ర ఎట్ 2047–న్యూగ్రోత్ లేబొరేటరీ’ అంశంపై చర్చలో ఆయన మాట్లాడారు.
‘‘ఒకే ప్రభుత్వం పదేళ్లు కొనసాగితే పేదరికాన్ని పూర్తిగా నిర్మూలించవచ్చు. ఇందుకోసం ఉద్యోగాల కల్పనే ప్రధాన ఎజెండాగా పనిచేస్తున్నాం. గ్లోబల్ కేపబుల్ సెంటర్ ఏర్పాటు ద్వారా వచ్చే ఉద్యోగాలు, ఆదాయంతో పోలిస్తే మేమిచ్చే భూమి విలువ చాలా తక్కువ. అందుకే నాణ్యమైన ఉద్యోగాలు కల్పించే సంస్థలకు 99 పైసలకే భూములు ఇస్తున్నాం. ఇలాంటి సాహసోపేత నిర్ణయాలే ఏపీని ఇతర రాష్ట్రాల కంటే భిన్నంగా నిలబెడుతున్నాయి’’ అని లోకేశ్ అన్నారు.
వేగమే ప్రభుత్వ పని విధానం అని చెప్పిన ఆయన.. మంత్రులు ఎంత వేగంగా ఫైళ్లు క్లియర్ చేస్తున్నారో ప్రతి మంత్రివర్గ సమావేశం తర్వాత ముఖ్యమంత్రి ర్యాంకులు ప్రకటిస్తున్నారని తెలిపారు. పొరుగు రాష్ట్రాల్లో దశాబ్దాలుగా నిలిచిపోయిన ప్రాజెక్టులు ఏపీలో 18 నెలల్లోనే ప్రారంభమయ్యాయని, 13 నెలల్లోనే డేటా సెంటర్ ఎకోసిస్టమ్ తయారు చేశామని చెప్పారు. వాట్సాప్లో ‘మనమిత్ర’ ద్వారా వెయ్యి రకాల పౌరసేవలు అందిస్తున్నామని, క్లస్టర్ విధానంలో అంతరిక్షం నుంచి ఉద్యాన పంటల వరకు 23 క్లస్టర్లు ఏర్పాటు చేశామని వివరించారు. ప్రైవేటు స్పేస్ సంస్థ స్కైరూట్కు స్పేస్సిటీలో 300 ఎకరాలు కేటాయించిన విషయాన్ని గుర్తు చేశారు.
పీ-4 విధానం ద్వారా పేదలకు ఆర్థిక చేయూత అందిస్తున్నామని, విద్యారంగంలో ‘వన్ క్లాస్, వన్ టీచర్’ ఉన్న పాఠశాలలు 3 శాతం నుంచి 33 శాతానికి పెరిగాయని, ఒకేసారి 16 వేల మంది టీచర్లను నియమించామని తెలిపారు. పర్యావరణానికి అగ్ర ప్రాధాన్యం ఇస్తూ డేటా సెంటర్లు 70 శాతం పునరుత్పాదక విద్యుత్ వినియోగించాలన్న నిబంధన పెట్టామని, గ్రీన్ కారిడార్ నిర్మాణానికి రైట్ ఆఫ్ వే ఇస్తామని చెప్పారు.
ఇదే రోజు దిల్లీలో వివో, సిస్కో, అబాట్, గోద్రెజ్, మాస్టర్కార్డ్, శాప్, యారా ఇంటర్నేషనల్ వంటి సంస్థల ప్రతినిధులతో లోకేశ్ భేటీ అయ్యారు. తిరుపతిలో వివో కాంపొనెంట్స్ తయారీ కేంద్రం, విశాఖలో అబాట్ గ్లోబల్ కేపబులిటీ సెంటర్, మాస్టర్కార్డ్ జీసీసీ/టెక్నాలజీ సెంటర్, గోద్రెజ్ ఆగ్రో కెమికల్ యూనిట్, కాకినాడలో గ్రీన్ అమ్మోనియా కాంప్లెక్స్ ఏర్పాటుకు పరిశీలించాలని కోరారు. సిస్కోతో 50 వేల మంది యువతకు నైపుణ్య శిక్షణ ఒప్పందం గురించి చర్చించారు. శాప్ ఆధ్వర్యంలో డిజిటల్ గవర్నెన్స్ సెంటర్ ఆఫ్ ఎక్సలెన్స్ ఏర్పాటును ప్రతిపాదించారు.
ఐసీసీ ఛైర్మన్ జై షాతో భేటీ అయి ఆంధ్రప్రదేశ్ను నేషనల్ స్పోర్ట్స్ హబ్గా మార్చాలని, విశాఖను ఒలింపిక్ వాటర్ స్పోర్ట్స్కు సహ-ఆతిథ్య గమ్యస్థానంగా తీర్చిదిద్దాలని కోరారు. గుజరాత్ ముఖ్యమంత్రి భూపేంద్ర పటేల్తో సమావేశమై కోస్ట్ టు కోస్ట్ వాణిజ్య కారిడార్ ఏర్పాటు, రామాయపట్నం, మచిలీపట్నం, మూలపేట పోర్టుల అభివృద్ధి గురించి చర్చించారు. గుజరాత్లో శ్రీవారి ఆలయ నిర్మాణానికి స్థలం కేటాయించాలని, విజయవాడ ఉత్సవ్, గోదావరి పుష్కరాలకు ఆహ్వానించారు.
ఈ విధంగా ఉద్యోగాల కల్పన, పెట్టుబడుల ఆకర్షణ, వేగవంతమైన అభివృద్ధి, పర్యావరణ పరిరక్షణ అనే అంశాలపై దృష్టి సారించి ఏపీని స్వర్ణాంధ్రగా తీర్చిదిద్దేందుకు ప్రభుత్వం కృషి చేస్తోందని లోకేశ్ స్పష్టం చేశారు.
