CM Chandrababu Naidu: అర్నబ్‌ తుపానుతో రూ.4,600 కోట్ల నష్టం.. సీఎం చంద్రబాబు క్షేత్రస్థాయి పరిశీలన

కేంద్ర బృందాలు నేడే రాష్ట్రానికి

CM Chandrababu Naidu: అర్నబ్‌ తుపాను ఆంధ్రప్రదేశ్‌లో భారీ నష్టం కలిగించిందని ముఖ్యమంత్రి నారా చంద్రబాబు నాయుడు ప్రకటించారు. ప్రాథమిక అంచనా ప్రకారం రూ. 4,600 కోట్ల నష్టం వాటిల్లిందని, వివరణాత్మక అంచనా తర్వాత ఈ మొత్తం మరింత పెరగవచ్చని ఆయన తెలిపారు. గురువారం అంబేడ్కర్‌ కోనసీమ జిల్లా కాట్రేనికోన మండలం గచ్చకాయలపొరలోని పునరావాస కేంద్రంలో బాధితులను పరామర్శించి, మీడియాతో మాట్లాడుతూ ఈ విషయాలు వెల్లడించారు.

తుపాను సమాచారం అందగానే 30 వేల మంది అధికార యంత్రాంగాన్ని సమాయత్తం చేసినట్లు సీఎం చెప్పారు. సాంకేతికతను ఉపయోగించి గంటగంటకూ తుపాను గమనాన్ని గుర్తించి సమర్థంగా ఎదుర్కొన్నామని, దీని వల్ల ప్రాణనష్టం తగ్గించగలిగామని పేర్కొన్నారు. అయినప్పటికీ గోడ కూలడం, విద్యుదాఘాతం వంటి కారణాలతో ఏడుగురు మరణించడం బాధాకరమని ఆవేదన వ్యక్తం చేశారు. కోనసీమ, పశ్చిమగోదావరి జిల్లాలు తీవ్రంగా ప్రభావితమయ్యాయని ఆయన అన్నారు.

తుపాను గాలుల తీవ్రతకు 10 వేలకు పైగా విద్యుత్తు స్తంభాలు నేలకొరిగాయని, వాటిలో కోనసీమలోనే 8 వేలు ఉన్నాయని సీఎం తెలిపారు. ప్రస్తుతం 2 వేల మంది విద్యుత్తు సిబ్బంది పునరుద్ధరణ పనుల్లో నిమగ్నమై ఉన్నారని, వెయ్యి మంది సిబ్బందిని పంపాలని తెలంగాణ ప్రభుత్వాన్ని కోరినట్లు, అవసరమైతే తమిళనాడు, కర్ణాటక నుంచీ సిబ్బందిని తీసుకువస్తామని చెప్పారు. రెండు రోజుల్లోనే 100 శాతం విద్యుత్తు సరఫరా పునరుద్ధరించబోతున్నామని హామీ ఇచ్చారు. మొబైల్‌ సిగ్నల్‌ సమస్యలు రేపటికల్లా తీరిపోతాయని కూడా అన్నారు.

పంట కోత దశలో ఉన్న రైతులు తీవ్ర నష్టపోయారని, దిగుబడి తగ్గుతుందని బాధితులు సీఎం దృష్టికి తీసుకువచ్చారు. కొబ్బరి, ఆయిల్‌ పామ్‌ చెట్లు నేలకూలడంతో ఫలసాయం పూర్తిగా కోల్పోయామని రైతులు ఆవేదన వ్యక్తం చేశారు. దీనికి స్పందిస్తూ సీఎం కొబ్బరి చెట్టుకు రూ. 1,500, ఆయిల్‌ పామ్‌ చెట్టుకు రూ. 1,500 చొప్పున పరిహారం ఇస్తామని, మొత్తం 57 రకాల పరిహారాలు అందిస్తామని ప్రకటించారు. పునరావాస కేంద్రాల నుంచి ఇళ్లకు వెళ్లే బాధితులకు 25 కిలోల బియ్యం, నిత్యావసర సరకులు, నగదు సాయం అందిస్తామని కూడా చెప్పారు.

విజయవాడ నుంచి హెలికాప్టర్‌లో వచ్చి కృష్ణా, పశ్చిమగోదావరి, కోనసీమలో నీటమునిగిన వరి చేలు, అరటి, కొబ్బరితోటల నష్టాన్ని ఏరియల్‌ సర్వే చేశారు. వేట్లపాలెం వద్ద నీటమునిగిన పంట పొలాలను పరిశీలించి రైతులతో మాట్లాడారు. 30 ఏళ్ల క్రితం 1996లో హరికేన్‌ తుపాను సమయంలో కూడా ఇక్కడే హెలికాప్టర్‌ దిగి నష్టాన్ని పరిశీలించినట్లు గుర్తుచేసుకున్నారు. హుద్‌హుద్, తిత్లీ, మొంథా తర్వాత ఇప్పుడు అర్నబ్‌ను కూడా సమర్థంగా ఎదుర్కొన్నామని అన్నారు.

నష్టాలను క్షేత్రస్థాయిలో పరిశీలించేందుకు కేంద్ర బృందాలు నేడు (శుక్రవారం) రాష్ట్రానికి వస్తున్నాయని, సాయం కోసం కేంద్ర హోం మంత్రి అమిత్‌ షాతో మాట్లాడినట్లు సీఎం తెలిపారు. గుడిసెలు కూలిపోయాయని చెప్పిన మహిళలకు పునరుద్ధరణ చర్యలు తీసుకోవాలని కలెక్టర్‌ను ఆదేశించారు. ప్రభుత్వ భూముల్లో నివాసం ఉన్నవారికి పట్టాలు ఇవ్వాలని, తాగునీటి సమస్యను పరిష్కరిస్తామని హామీ ఇచ్చారు.

పర్యటనలో జిల్లా ఇన్‌ఛార్జి మంత్రి కింజరాపు అచ్చెన్నాయుడు, ప్రభుత్వ విప్‌ దాట్ల బుచ్చిబాబు, ఎంపీలు హరీష్‌ మాథుర్, సానా సతీష్‌బాబు, తెదేపా జిల్లా అధ్యక్షుడు గుత్తుల సాయి పాల్గొన్నారు.