Ap New Districts : ఆంధ్రప్రదేశ్‌లో 26 నుంచి 32కి పెరిగనున్న జిల్లాలు

ఆంధ్రప్రదేశ్‌లోని కూటమి ప్రభుత్వం కొత్త జిల్లాల ఏర్పాటుపై కసరత్తు చేస్తోంది. ప్రస్తుతం ఉన్న జిల్లాల సంఖ్యను పెంచడంతో పాటు పలు జిల్లాల సరిహద్దుల్లో కూడా మార్పులు, చేర్పులు చేయాలని కూటమి ప్రభుత్వం భావిస్తోంది. కొన్ని జిల్లాల సరిహద్దులు, పేర్లు, మండలాల మార్పులపై మంత్రివర్గ ఉపసంఘాన్ని ముఖ్యమంత్రి చంద్రబాబు నియమించిన విషయం తెలిసిందే. ఈ ఉపసంఘం ఇప్పటికే జిల్లాల పునర్‌వ్యవస్ధీకరణపై కసరత్తు ప్రారంభించింది. పలు జిల్లాలు స్వరూపం మార్చుకోనున్నట్లు సమాచారం. అలాగే జిల్లాల సంఖ్యను కూడా 26 నుంచి 32కి పెంచాలని ప్రభుత్వం ఒక నిర్ణయానికి వచ్చేసింది. ప్రస్తుతం కృష్ణా జిల్లాలో ఉన్న పెనమలూరు, గన్నవరం నియోజకవర్గాలను ఎన్టీఆర్ జిల్లాలోకి మార్చే ఆలోచనలో ప్రభుత్వం ఉంది. అదేవిధంగా అద్దంకి, కందుకూరు నియోజకవర్గాలు మళ్లీ ప్రకాశం జిల్లాలోకి మార్చనున్నట్లు సమాచారం. కొత్తగా మార్కాపురం జిల్లా ఏర్పాటుకు అవకాశం ఉండగా, అమరావతి, గూడూరు, ఆదోని, పలాస, మదనపల్లి జిల్లాలు నూతనంగా వచ్చే అవకాశం ఉందంటున్నారు. జిల్లా కేంద్రాల దూరం తగ్గించడం, పాలనా సౌలభ్యానికి సంబంధించి ప్రజలకు అనుకూలంగా ఉండేలా మార్పులు చేయడంపై ప్రభుత్వం దృష్టి పెట్టింది. ప్రస్తుతం ఉన్న జిల్లాల నుంచి కొత్త జిల్లాలోకి పలు నియోజక వర్గాలు మారనున్నట్లు సమాచారం. ఆగస్టు 13వ తేదీ బుధవారం మంత్రివర్గ ఉపసంఘం తొలి సమావేశం జరగనుంది. వెలగపూడిలోని సచివాలయంలో బుధవారం ఉదయం 11 గంటలకు రెవెన్యూ శాఖ మంత్రి అనగాని సత్యప్రసాద్‌ నేతృత్వంలో మంత్రివర్గ ఉప సంఘం భేటీ అయి జిల్లాల పేర్లు, సరిహద్దుల మార్పులపై చర్చించనుంది. జిల్లా, మండల, గ్రామాల పేర్లు సరిహద్దుల మార్పులపై ఇప్పటికే ప్రజల నుంచి ప్రభుత్వానికి భారీ స్ధాయిలో విజ్ఞప్తులు అందాయి. గత వైసీపీ ప్రభుత్వంలో అడ్డదిడ్డంగా జిల్లాలను ఏర్పాటు చేయడమే కాకుండా పలు జిల్లాలకు పేర్లు పెట్టడంలో కూడా అనేక వివాదాలు సృష్టించిందని కూటమి మంత్రులు ఆరోపిస్తున్నారు. ప్రజల నుంచి వచ్చిన విజ్ఞప్తులను పరిశీలించేందుకు మంత్రులు అనగాని సత్యప్రసాద్‌, పొంగూరునారాయణ, వంగలపూడి అనిత, బీసీజనార్ధన్‌రెడ్డి, నిమ్మల రామానాయుడు, నాదెండ్ల మనోహర్‌, సత్యకుమార్‌ యాదవ్‌లతో ముఖ్యమంత్రి చంద్రబాబు ఒక ఉప సంఘాన్ని నియమించారు. బుధవారం భేటీ కానున్న మంత్రి వర్గ ఉప సంఘం తాజా పరిస్థితులకు అనుగుణంగా కొత్త జిల్లాలు.. సరిహద్దు మార్పులపై నిర్ణయం తీసుకునే అవకాశముంది.

ప్రచారంలో ఉన్న నూతన జిల్లాలు.. వాటి పరిధిలోకి వచ్చే అసెంబ్లీ నియోజకవర్గాల వివరాలు ఇలా ఉన్నాయి.

1. పలాస: ఇచ్ఛాపురం, పలాస, టెక్కలి, పాతపట్నం.

2. శ్రీకాకుళం: శ్రీకాకుళం, ఆముదాలవలస, నరసన్నపేట, ఎచ్చెర్ల, రాజాం.

3. మన్యం పార్వతీపురం: పార్వతీపురం, కురుపాం, సాలూరు, పాలకొండ.

4. విజయనగరం: విజయనగరం, చీపురుపల్లి, గజపతినగరం, నెల్లిమర్ల, శృంగవరపుకోట, బొబ్బిలి.

5. విశాఖపట్నం: భీమిలి, విశాఖ ఈస్ట్, విశాఖ వెస్ట్, విశాఖ నార్త్, విశాఖ సౌత్, గాజువాక, పెందుర్తి.

6. అల్లూరి సీతారామరాజు అరకు: అరకు, పాడేరు, మాడుగుల.

7. అనకాపల్లి: అనకాపల్లి, చోడవరం, నర్సీపట్నం, యలమంచిలి, పాయకరావుపేట, తుని.

8. కాకినాడ: కాకినాడ సిటీ, కాకినాడ రూరల్, ప్రత్తిపాడు, పిఠాపురం, జగ్గంపేట, పెద్దాపురం, రామచంద్రాపురం.

9. తూర్పు గోదావరి రాజమహేంద్రవరం: రాజమండ్రి సిటీ, రాజమండ్రి రూరల్, కొవ్వూరు, నిడదవోలు, అనపర్తి, రాజానగరం, రంపచోడవరం.

10. బి.ఆర్.అంబేద్కర్ కోనసీమ అమలాపురం: అమలాపురం, ముమ్మిడివరం, గన్నవరం, రాజోలు, కొత్తపేట, మండపేట.

11. పశ్చిమ గోదావరి నరసాపురం: తణుకు, ఆచంట, పాలకొల్లు, నరసాపురం, భీమవరం, ఉండి, తాడేపల్లిగూడెం.

12. ఏలూరు: ఏలూరు, దెందులూరు, ఉంగుటూరు, గోపాలపురం, చింతలపూడి, పోలవరం.

13. కృష్ణా మచిలీపట్నం: కైకలూరు, గుడివాడ, పెడన, మచిలీపట్నం, అవనిగడ్డ, పామర్రు.

14. ఎన్టీఆర్ విజయవాడ: విజయవాడ ఈస్ట్, విజయవాడ వెస్ట్, విజయవాడ సెంట్రల్, తిరువూరు, నూజివీడు, గన్నవరం, పెనమలూరు, మైలవరం.

15. అమరావతి: పెదకూరపాడు, తాడికొండ, మంగళగిరి, జగ్గయ్యపేట, నందిగామ.

16. గుంటూరు: గుంటూరు ఈస్ట్, గుంటూరు వెస్ట్, తెనాలి, పొన్నూరు, ప్రత్తిపాడు.

17. బాపట్ల: బాపట్ల, వేమూరు, చీరాల, రేపల్లె, పర్చూరు.

18. పల్నాడు నరసరావుపేట: నరసరావుపేట, చిలకలూరిపేట, సత్తెనపల్లి, గురజాల, మాచర్ల, వినుకొండ.

19. మార్కాపురం: మార్కాపురం, ఎర్రగొండపాలెం, గిద్దలూరు, కనిగిరి, దర్శి.

20. ఒంగోలు: ఒంగోలు, అద్దంకి, సంతనూతలపాడు, కొండెపి, కందుకూరు.

21. శ్రీ పొట్టి శ్రీరాములు నెల్లూరు: నెల్లూరు సిటీ, నెల్లూరు రూరల్, కావాలి, కోవూరు, ఉదయగిరి.

22. గూడూరు: గూడూరు, వెంకటగిరి, సర్వేపల్లి, సూళ్లూరుపేట.

23. శ్రీ బాలాజీ తిరుపతి: తిరుపతి, శ్రీకాళహస్తి, సత్యవేడు, నగరి, చంద్రగిరి.

24. చిత్తూరు: చిత్తూరు, పూతలపట్టు, గంగాధర నెల్లూరు, పలమనేరు, కుప్పం.

25. మదనపల్లి: మదనపల్లి, పీలేరు, పుంగనూరు, తంబళ్లపల్లి.

26. సత్యసాయి హిందూపురం: హిందూపురం, కదిరి, ధర్మవరం, పుట్టపర్తి, పెనుగొండ, మడకశిర.

27. అనంతపురం: అనంతపురం, రాయదుర్గం, కళ్యాణదుర్గం, గుంతకల్లు, ఉరవకొండ, రాప్తాడు, శింగనమల, తాడిపర్తి.

28. ఆదోని: ఆదోని, పత్తికొండ, ఆలూరు, ఎమ్మిగనూరు, మంత్రాలయం.

29. కర్నూలు: కర్నూలు, డోన్, నందికొట్కూరు, కోడుమూరు

30. నంద్యాల: నంద్యాల, శ్రీశైలం, ఆళ్లగడ్డ, బనగానపల్లె, పాణ్యం.

31. వైఎస్సార్ కడప: కడప, జమ్మలమడుగు, ప్రొద్దుటూరు, మైదుకూరు, కమలాపురం, పులివెందుల.

32. అన్నమయ్య రాజంపేట: రాజంపేట, రైల్వే కోడూరు, రాయచోటి, బద్వేలు