CM Chandrababu: వైకాపా నేతలతో వేదికలు పంచుకోవద్దు.. అది విషవృక్షం: సీఎం చంద్రబాబు

CM Chandrababu: తెలుగుదేశం పార్టీ (తెదేపా) అధినేత, ముఖ్యమంత్రి నారా చంద్రబాబు నాయుడు పార్టీ నేతలకు స్పష్టమైన ఆదేశాలు ఇచ్చారు. ఎట్టి పరిస్థితుల్లోనూ వైఎస్సార్‌ కాంగ్రెస్‌ పార్టీ (వైకాపా/గొడ్డలి పార్టీ) నాయకులతో వేదికలు పంచుకోవద్దని హెచ్చరించారు. అదో విషవృక్షమని గుర్తుంచుకోవాలని, ఆ పార్టీ నాయకుల ఉచ్చులో పడొద్దని సూచించారు.

తెదేపా ముఖ్యనాయకులతో ఆదివారం టెలికాన్ఫరెన్స్‌లో మాట్లాడిన సీఎం చంద్రబాబు, సోమవారం నుంచి 45 రోజుల పాటు నిర్వహించనున్న ‘ఇంటింటికీ తెలుగుదేశం’ కార్యక్రమంపై దిశానిర్దేశం చేశారు. మంత్రులు, ఎంపీలు, ఎమ్మెల్సీలు, ఎమ్మెల్యేలు సహా పార్టీ యంత్రాంగం మొత్తం ఈ కార్యక్రమంలో పాల్గొనాలని స్పష్టం చేశారు. వైకాపా కుట్రలు, తప్పుడు ప్రచారాలను ప్రజాక్షేత్రంలో ఎండగట్టాలని పిలుపునిచ్చారు.

గత ఎన్నికల్లో ఘోర ఓటమి చవిచూసినా వైకాపాలో మార్పు రాలేదని, వారి విధ్వంసకర విధానాలను ప్రజలకు అర్థమయ్యేలా చెప్పాలని అన్నారు. నిరంతరం ప్రజల్లో ఉంటేనే ఆ పార్టీ కుట్రలను బయటపెట్టవచ్చని, దీన్ని అగ్రనాయకత్వం నుంచి కార్యకర్త వరకూ బాధ్యతగా తీసుకోవాలని సూచించారు. వైకాపా ప్రభుత్వం చేసిన తప్పిదాలు, విధ్వంసం వల్ల ఆ పార్టీ 11 సీట్లకు పడిపోయిందని గుర్తు చేశారు.

పార్టీ పనిని కష్టంగా కాకుండా ఇష్టంతో చేయాలని, ప్రజలు, కార్యకర్తలతో నాయకులు సన్నిహితంగా ఉండాలని అన్నారు. రాబోయే స్థానిక సంస్థల ఎన్నికల్లో అన్ని స్థానాల్లోనూ గెలవాలని, కూటమి పార్టీల అభ్యర్థుల విజయానికి కృషి చేయాలని పిలుపునిచ్చారు. యువత సంక్షేమం కోసం ప్రభుత్వం చేస్తున్న కార్యక్రమాలను తెలియజేయాలని, గొడ్డలి పార్టీ యువతను ఎలా నిర్వీర్యం చేసిందో వివరించాలని సూచించారు.

ఇదే సందర్భంగా గుంటూరులో జరిగిన ముద్రగడ పద్మనాభం సంతాపసభలో వైకాపా నేత అంబటి రాంబాబుతో తెదేపా ఎమ్మెల్యే బొండా ఉమామహేశ్వరరావు సన్నిహితంగా మెలగడం, అక్కడ చేసిన వ్యాఖ్యలపై సీఎం తీవ్ర అసహనం వ్యక్తం చేశారు. వైకాపా నాయకులతో వేదికలు పంచుకోవద్దని గతంలోనే పలుమార్లు ఆదేశాలు ఇచ్చినా కొందరు నాయకులు బేఖాతరు చేస్తున్నారని ఆగ్రహం వ్యక్తం చేశారు.

‘‘ఏదైనా సమస్య ఉంటే పార్టీ అధిష్ఠానంతో మాట్లాడాలి. అంతర్గతంగా చర్చించాలి. అంతేకానీ వైకాపా నాయకులతో వేదిక పంచుకోవడం.. అక్కడ పార్టీకి, ప్రభుత్వానికి నష్టం చేసేలా మాట్లాడటం ఏంటి?’’ అని ప్రశ్నించారు. బొండా ఉమామహేశ్వరరావు నుంచి వివరణ తీసుకోవాలని తెదేపా రాష్ట్ర అధ్యక్షుడు పల్లా శ్రీనివాసరావు, మంత్రి నిమ్మల రామానాయుడులను ఆదేశించారు. వారం రోజుల్లో ఆయనను మంగళగిరిలోని పార్టీ కేంద్ర కార్యాలయానికి పిలిపించనున్నారు.