Draksharamam Shiva Lingam Vandalism: ద్రాక్షారామం శివలింగ ధ్వంసం: పూజారిపై వ్యక్తిగత కక్షే నేపథ్యం

Draksharamam Shiva Lingam Vandalism: ప్రముఖ పంచారామ క్షేత్రాల్లో ఒకటైన ద్రాక్షారామ భీమేశ్వరస్వామి ఆలయ ఆవరణలోని శివలింగాన్ని ధ్వంసం చేసిన ఘటనలో నిందితుడిని పోలీసులు అదుపులోకి తీసుకున్నారు. ఈ సంఘటనకు ఎలాంటి రాజకీయ లేదా మతపరమైన కుట్ర లేదని, కేవలం స్థానిక పూజారితో వ్యక్తిగత విభేదాలే కారణమని జిల్లా ఎస్పీ రాహుల్ మీనా స్పష్టం చేశారు.

నిందితుడు రామచంద్రపురం మండలం తోటపేటకు చెందిన శీలం శ్రీనివాస్ (38). ఇనుప తుక్కు వ్యాపారి అయిన ఇతడు శివుడిపై తీవ్ర భక్తి కలిగిన వ్యక్తిగా పరిచయమయ్యాడు. కుడి భుజంపై శివలింగం, విష్ణుమూర్తి పచ్చబొట్టు వేయించుకున్నాడు. అయినప్పటికీ, పక్కింట ఉంటున్న ఆలయ పూజారి కలకొండ సూరిబాబుతో మురుగునీటి కాలువ, ఇతర స్థానిక సమస్యలపై వివాదం ఏర్పడింది.

గతంలో సూరిబాబును హోమాలు చేయించిన శ్రీనివాస్, తాజాగా ఆ విభేదాల నేపథ్యంలో ఆగ్రహానికి లోనయ్యాడు. ఆలయ కోనేరు వద్ద రోజూ పూజలు చేస్తూ, భక్తులను ఆకర్షిస్తున్న శివలింగాన్ని ధ్వంసం చేస్తే పూజారి కష్టపడతాడని భావించి, మంగళవారం అర్ధరాత్రి సుత్తితో దాడి చేశాడు. సుమారు 50 సీసీ కెమెరాల ఫుటేజీని పరిశీలించి పోలీసులు ఇతన్ని గుర్తించి అరెస్టు చేశారు.

ఈ ఘటనపై దేవాదాయ శాఖ కమిషనర్ కె. రామచంద్రమోహన్ స్పందించారు. ఆలయ భద్రతను మరింత బలోపేతం చేయాలని, 360 డిగ్రీలు తిరిగే అధునాతన కెమెరాలు ఏర్పాటు చేయాలని ఆదేశించారు. ధ్వంసమైన శివలింగాన్ని పరిశీలించిన ఆయన, అర్చకుల సలహాతోనే పునఃప్రతిష్ఠ చేసినట్లు తెలిపారు.

ఈ ఘటన రాష్ట్రవ్యాప్తంగా చర్చనీయాంశమైంది. ఆలయ భద్రతపై మరింత జాగ్రత్త అవసరమని నిపుణులు అభిప్రాయపడుతున్నారు.