Former CM Jagan: మాజీ సీఎం జగన్ ప్రకటన: 150 నియోజకవర్గాల్లో పాదయాత్ర చేపట్టనున్నట్లు వెల్లడి

Former CM Jagan: చంద్రబాబు నాయుడు ప్రభుత్వంలో జరుగుతున్న అరాచకాలు, అసమర్థ పాలనపై ప్రజల తరపున వైఎస్‌ఆర్‌సీపీ పోరాటం చేస్తోందని పార్టీ అధినేత, మాజీ ముఖ్యమంత్రి వైఎస్ జగన్‌మోహన్‌రెడ్డి అన్నారు. ఏడాదిన్నర తర్వాత తన పాదయాత్రను ప్రారంభించనున్నట్లు తెలిపారు. భీమవరం అసెంబ్లీ నియోజకవర్గానికి చెందిన వైకాపా స్థానిక సంస్థల ప్రజాప్రతినిధులు, కార్యకర్తలతో బుధవారం తన క్యాంపు కార్యాలయంలో సమావేశమై మాట్లాడుతూ ఈ వివరాలను వెల్లడించారు.

‘ఈ పాదయాత్రలో 150 నియోజకవర్గాలను సందర్శిస్తాను. యాత్ర సమయంలో ప్రతి మూడు రోజులకు ఒకసారి బహిరంగ సభలు నిర్వహిస్తాం. ప్రజలు ఎదుర్కొంటున్న సమస్యలను హైలైట్ చేస్తూ, చంద్రబాబు ప్రభుత్వం యొక్క అసమర్థతను ప్రజలకు స్పష్టంగా వివరిస్తాం. మా పార్టీ కార్యకర్తలు కూడా చంద్రబాబు పాలన మరియు మా పాలన మధ్య ఉన్న తేడాలను ప్రజలకు తెలియజేయాలి. జగన్ 2.0 పాలనలో కార్యకర్తలకు అత్యంత ప్రాధాన్యత ఇస్తాం. వారి ద్వారానే పాలనా వ్యవస్థ నడుస్తుంది’ అని జగన్ వివరించారు.

చంద్రబాబు పాలనలో రాష్ట్రం ఆటవిక రాజ్యంగా మారిపోయిందని ఆయన ఆరోపించారు. కూటమి నేతలు, వారి పార్టీల ప్రజాప్రతినిధులు మహిళల పట్ల అనుచితంగా వ్యవహరిస్తున్నా ప్రభుత్వం చర్యలు తీసుకోవడం లేదని విమర్శించారు. ‘రైల్వేకోడూరు ఎమ్మెల్యే అరవ శ్రీధర్ అసలు మనిషేనా? ఒక ప్రభుత్వ ఉద్యోగినిని బెదిరించి, భయపెట్టి లైంగిక వేధింపులకు పాల్పడినా.. ఆ మహిళ సాక్ష్యాలతో బయటపెట్టినా ఆయనపై ఎలాంటి చర్యలు లేవు’ అని జగన్ ప్రశ్నించారు. ఇలాంటి అరాచకాలపై ప్రజలు స్పందించాలని, వైకాపా పక్షాన పోరాడుతుందని ఆయన పిలుపునిచ్చారు.