AP Governor Abdul Nazeer: ఆంధ్రప్రదేశ్‌ పునర్నిర్మాణం నుంచి ప్రగతి మార్గానికి: గవర్నర్‌ అబ్దుల్‌ నజీర్‌

AP Governor Abdul Nazeer: రాష్ట్ర విభజన తరువాత ఆంధ్రప్రదేశ్‌ ఎన్నో ముఖ్యమైన మార్పులు మరియు పరిణామాలను అనుభవించిందని గవర్నర్‌ జస్టిస్‌ అబ్దుల్‌ నజీర్‌ తెలిపారు. పరిమిత వనరులతోనూ దీర్ఘకాలిక అభివృద్ధికి మునుపటి ప్రభుత్వం కఠిన కృషి చేసిందని ఆయన పేర్కొన్నారు. అయితే, 2019లో ప్రభుత్వ మార్పు రాష్ట్ర పురోగతికి తీవ్ర అడ్డంకిగా మారిందని వివరించారు. ఏపీ అసెంబ్లీ బడ్జెట్‌ సమావేశాలు ప్రారంభమైన సందర్భంగా ఉభయ సభల సభ్యులను ఉద్దేశించి గవర్నర్‌ మాట్లాడారు.

‘‘2019 తర్వాత రాష్ట్రంలో వ్యవస్థాగత పాలనా వైఫల్యాలు ఏర్పడ్డాయి. అభివృద్ధి పూర్తిగా స్తంభించిపోయింది. ఆర్థిక ఒత్తిడి అత్యంత తీవ్రమైంది. వ్యవస్థలు ధ్వంసమయ్యాయి. మౌలిక వసతులు, విద్యుత్‌, సాగునీటి పారుదల వంటి రంగాలు తీవ్రమైన తిరోగమనాన్ని చవిచూశాయి. గత అనుభవాలతో విసిగిపోయిన ప్రజలు, రాష్ట్రంలో కూటమి ప్రభుత్వాన్ని అధికారంలోకి తీసుకువచ్చారు. గత 19 నెలలుగా మా ప్రభుత్వం పునరుద్ధరణ దశ నుంచి ప్రగతి మార్గం వైపు అడుగులు వేస్తోంది. సూపర్‌-6తో సహా ఇతర సంక్షేమ పథకాలను సమర్థవంతంగా అమలు చేస్తోంది. అభివృద్ధి కార్యక్రమాలను మళ్లీ ప్రారంభించడంపై ప్రధాన దృష్టి సారించాం. విధానాలు, వ్యవస్థలు మరియు వ్యయ ప్రాధాన్యతలలో ముఖ్యమైన మార్పులు తీసుకువచ్చాం. పారదర్శకతను ప్రోత్సహించేందుకు 7 శ్వేతపత్రాలను విడుదల చేశాం. సంక్షేమం మరియు అభివృద్ధిని సమతుల్యం చేసేందుకు 10 సూత్రాలను రూపొందించాం. ఈ సూత్రాల లక్ష్యం సంపద సృష్టికి మార్గం సుగమం చేయడం. స్వర్ణాంధ్ర విజన్‌ ద్వారా రాష్ట్రానికి స్పష్టమైన ఆర్థిక దిశానిర్దేశం చేశాం.

అమరావతి శాశ్వత రాజధానిగా..

అమరావతి రాజధాని పునర్నిర్మాణ పనులు వేగవంతంగా సాగుతున్నాయని గవర్నర్‌ తెలిపారు. దీనిని శాశ్వత రాజధానిగా గుర్తించే ప్రక్రియను కేంద్ర ప్రభుత్వం ప్రారంభించిందని వెల్లడించారు. నేషనల్‌ క్వాంటమ్‌ మిషన్‌ ద్వారా అమరావతిలో కొత్త శకాన్ని మొదలుపెట్టామని, ఇది రాష్ట్రానికి ప్రపంచస్థాయి గుర్తింపు తెస్తుందని ఆయన చెప్పారు. విశాఖపట్నం మరియు విజయవాడల్లో మెట్రో రైలు ప్రాజెక్టులతో అత్యాధునిక ప్రజా రవాణా వ్యవస్థను అందుబాటులోకి తీసుకువస్తామని తెలిపారు. 175 అసెంబ్లీ నియోజకవర్గాల్లో ఎంఎస్‌ఎంఈ పార్కుల ఏర్పాటుకు చర్యలు చేపట్టామని వివరించారు.’’ అని గవర్నర్‌ తన ప్రసంగంలో ప్రస్తావించారు. అసెంబ్లీకి చేరుకున్న గవర్నర్‌కు ముఖ్యమంత్రి చంద్రబాబు నాయుడు మరియు స్పీకర్‌ అయ్యన్నపాత్రుడు ఘన స్వాగతం పలికారు.

వైకాపా సభ్యుల నుంచి ఆటంకాలు..

అసెంబ్లీ సమావేశాలకు మాజీ ముఖ్యమంత్రి జగన్‌మోహన్‌రెడ్డి సహా వైకాపా సభ్యులు హాజరయ్యారు. గవర్నర్‌ ప్రసంగాన్ని పదేపదే అడ్డుకుంటూ ప్రభుత్వ వ్యతిరేక నినాదాలు చేశారు. కాసేపటికే జగన్‌తో సహా ఎమ్మెల్యేలు సభ నుంచి బయటకు వెళ్లిపోయారు.