Polavaram-Nallamala Sagar: పోలవరం-నల్లమలసాగర్పై సుప్రీంలో తీవ్ర వాదోపవాదాలు.. విచారణ జనవరి 12కు వాయిదా
విచారణ జనవరి 12కు వాయిదా
Polavaram-Nallamala Sagar: గోదావరి నది జలాలపై ఆంధ్రప్రదేశ్, తెలంగాణ మధ్య ఉద్భవించిన వివాదంలో భాగంగా పోలవరం-నల్లమలసాగర్ ప్రాజెక్టులపై సుప్రీంకోర్టులో సోమవారం వాదనలు జరిగాయి. ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం ఇరు రాష్ట్రాల న్యాయవాదుల వాదనలను విన్నప్పటికీ, పూర్తి విచారణను జనవరి 12కు వాయిదా వేసింది.
తెలంగాణ తరఫున సీనియర్ న్యాయవాది అభిషేక్ మను సింఘ్వీ వాదిస్తూ, ఆంధ్రప్రదేశ్ ప్రభుత్వం కేటాయింపులకు విరుద్ధంగా నీటి వినియోగం చేయడానికి సిద్ధమవుతోందని ఆరోపించారు. ‘‘వరద జలాలనే వినియోగిస్తామని ఏపీ చెబుతోంది కానీ, ఇందులో అనేక సంక్లిష్ట అంశాలు ముడిపడి ఉన్నాయి. రాష్ట్ర విభజన తర్వాత కొత్తగా ఏర్పడిన తెలంగాణలో ప్రాజెక్టుల నిర్మాణం ఇంకా కొనసాగుతోంది. పిటిషన్ దాఖలయిన తర్వాతే కేంద్రం కమిటీని ఏర్పాటు చేసింది’’ అని సింఘ్వీ వివరించారు. మధ్యంతర ఉపశమనం కల్పించాలని ఆయన కోరారు.
ఈ వాదనలపై స్పందించిన సీజేఐ, ‘‘ఏపీ ఉల్లంఘనలకు పాల్పడటానికి సిద్ధమైందనే ఆరోపణ ఎలా? కమిటీ ఏర్పాటు చేశామని మీరే చెబుతున్నారు. అన్ని విషయాలపై పూర్తి నివేదిక సమర్పించండి’’ అని సింఘ్వీకి సూచించారు. అలాగే, సివిల్ సూట్లో జోక్యం చేసుకుని ప్రాజెక్టును నిలిపివేసే అధికారం సుప్రీంకోర్టుకు ఉందా? అని ప్రశ్నించారు. జాతీయ ప్రాజెక్టుల విషయంలో కేంద్రానికి న్యాయ పరిధి ఉంటుందని, మధ్యవర్తిత్వం ద్వారా ఎందుకు పరిష్కరించుకోకూడదని కూడా సీజేఐ సూచించారు.
అభ్యంతరం ఎందుకు?: ఏపీ వాదన
ఆంధ్రప్రదేశ్ తరఫున సీనియర్ న్యాయవాది ముకుల్ రోహత్గి వాదనలు వినిపించారు. ‘‘భవిష్యత్తులో చేపట్టబోయే ప్రాజెక్టు నివేదికపై అభ్యంతరం ఏమిటి? నా సొంత భూమిపై ఇల్లు కట్టుకోవాలనుకుంటే మీకు అభ్యంతరం ఏమిటి? రాయలసీమ కరువు ప్రాంతాలకు నీటిని అందించడానికే ఈ ప్రాజెక్టు ప్రతిపాదన. ఇందులో ఎటువంటి ఉత్తర్వులు లేదా తీర్పుల ఉల్లంఘనలు లేవు. ఏ రాష్ట్రానికీ నష్టం జరగదు’’ అని రోహత్గి బలంగా వాదించారు.
ఏపీ తరఫున మరొక న్యాయవాది జగదీప్ గుప్తా మాట్లాడుతూ, తెలంగాణ గోదావరిపై వందలాది ప్రాజెక్టులు నిర్మిస్తోందని ఎత్తిచూపారు. పరివాహక ప్రాంత రాష్ట్రాల అభ్యంతరాలను పరిగణనలోకి తీసుకోవాలని సీజేఐ సూచించినప్పటికీ, ఏపీ న్యాయవాదులు తమ ప్రాజెక్టు సమర్థవంతమని నొక్కి చెప్పారు.
ఇరు పక్షాల వాదనలు విన్న ధర్మాసనం, అందరి అభిప్రాయాలను పరిగణనలోకి తీసుకుని తదుపరి విచారణ కొనసాగిస్తామని సీజేఐ తెలిపారు. కేసును జనవరి 12కు వాయిదా వేసింది.
