MLA Adinarayana Reddy: కడప జడ్పీ ఛైర్మన్ పదవి వివాదం.. రాజీనామా యోచనలో జమ్మలమడుగు ఎమ్మెల్యే ఆదినారాయణరెడ్డి!
ఎమ్మెల్యే ఆదినారాయణరెడ్డి!

MLA Adinarayana Reddy: వైఎస్ఆర్ కడప జిల్లా జమ్మలమడుగు నియోజకవర్గం బీజేపీ ఎమ్మెల్యే ఆదినారాయణరెడ్డి తన ఎమ్మెల్యే పదవికి రాజీనామా చేసే యోచనలో ఉన్నట్లు రాజకీయ వర్గాల నుంచి సమాచారం వెలువడుతోంది. సోదరుడి కుమారుడైన చదిపిరాళ్ల రాజేష్రెడ్డికి కడప జిల్లా పరిషత్ చైర్మన్ పదవి ఇవ్వకపోవడంతో ఆయన తీవ్ర మనస్తాపానికి గురైనట్లు తెలుస్తోంది. స్థానిక సంస్థల ఎన్నికల్లో కూటమి పార్టీల మధ్య జరిగిన పదవుల పంపకాల్లో టీడీపీకి చెందిన పుత్తా నరసింహారెడ్డికి ఆ పదవిని కేటాయించడం ఈ అసంతృప్తికి ప్రధాన కారణమైంది.
ఆదినారాయణరెడ్డి ఇప్పటికే నాలుగు సార్లు ఎమ్మెల్యేగా పనిచేశారు. గతంలో కాంగ్రెస్, వైఎస్ఆర్సీపీ, తెలుగుదేశం పార్టీల్లో ఉండి ప్రస్తుతం బీజేపీలో ఉన్నారు. స్థానిక సంస్థల ఎన్నికల్లో తమ వర్గం ఏడు జడ్పీటీసీ స్థానాలను గెలుచుకున్నందున తమ సోదరుడి కుమారుడికి జడ్పీ ఛైర్మన్ పదవి ఇవ్వాలని ఆశించినట్లు తెలుస్తోంది. అయితే కూటమి నాయకత్వం ఆ పదవిని టీడీపీ సీనియర్ నేత పుత్తా నరసింహారెడ్డికి కేటాయించడంతో ఆయన ఆగ్రహం వ్యక్తం చేశారు. ఈ విషయంపై బుజ్జగించేందుకు భాజపా నేతలు పలుమార్లు ఆయనతో సంప్రదింపులు జరిపినప్పటికీ ఆయన అలక వీడలేదు.
మరోవైపు బీజేపీ రాష్ట్ర అధ్యక్షుడు పీవీఎన్ మాధవ్ విజయవాడలోని మినర్వా హోటల్లో ఆదినారాయణరెడ్డిని కలిసి చర్చలు జరిపారు. గంటపాటు జరిగిన ఈ భేటీ అనంతరం కూడా ఆయన స్పష్టమైన నిర్ణయం తీసుకోలేదు. ఆయన మీడియాతో మాట్లాడుతూ తనకు ఎమ్మెల్యే పదవి కొత్త కాదని, రాజకీయ నిర్ణయాలు తీసుకోవడం తనకు కష్టం కాదని పేర్కొన్నారు. మంత్రి పదవులు లేదా ఇతర ప్రత్యామ్నాయ పదవులు తనకు అవసరం లేదని స్పష్టం చేశారు. బీజేపీ అగ్రనేతలతో సాయంత్రం జరిగే చర్చల అనంతరం రేపు రాజీనామాపై తుది నిర్ణయం ప్రకటిస్తానని ఆయన సూచించారు.
రాజకీయ వర్గాల్లో ఆదినారాయణరెడ్డితో పాటు జమ్మలమడుగు, ముద్దనూరు, ఎర్రగుంట్ల ప్రాంతాల జడ్పీటీసీలు, కొంతమంది కౌన్సిలర్లు, ఎంపీటీసీలు కూడా రాజీనామా చేసే అవకాశం ఉన్నట్లు ప్రచారం జరుగుతోంది. ఆయన కుటుంబానికి చెందిన ఇద్దరు జడ్పీటీసీలు ఇప్పటికే పదవులకు రాజీనామా చేయాలనే సంకల్పం వ్యక్తం చేసినట్లు సమాచారం. ఈ పరిణామాలు అధికార కూటమిలో అంతర్గత విభేదాలను బయటపెట్టాయి. కడప జిల్లాలో జడ్పీ ఛైర్మన్ ప్రమాణ స్వీకారానికి ఏర్పాట్లు జరుగుతున్న వేళ ఈ వివాదం రాజకీయ వర్గాల్లో చర్చనీయాంశమైంది. ఆదినారాయణరెడ్డి తీసుకునే తుది నిర్ణయం పై రేపు రాష్ట్ర రాజకీయాలు ఆసక్తిగా ఎదురుచూస్తున్నాయి. ఈ విషయంపై బీజేపీ అధిష్టానం ఆయనను బుజ్జగించేందుకు ప్రయత్నిస్తున్నప్పటికీ ఆయన వైఖరి స్పష్టంగా లేదు.

