Liquor scam: విజయవాడ జైలు వద్ద వీరంగం సృష్టించిన వైకాపా నాయకులు

Liquor scam: విజయవాడ జిల్లా జైలు నుంచి మద్యం కుంభకోణం కేసులో నిందితులైన ధనుంజయరెడ్డి, కృష్ణమోహన్‌రెడ్డి, గోవిందప్ప బాలాజీలు ఆదివారం ఉదయం విడుదలయ్యారు. శనివారం ఏసీబీ కోర్టు వీరికి బెయిల్‌ మంజూరు చేయడంతో, ఆదివారం ఉదయం 7 నుంచి 10 గంటల మధ్య విడుదల చేస్తామని జైలు అధికారులు ముందే తెలిపినప్పటికీ, వైకాపా నేతలు, కార్యకర్తలు, లీగల్‌ సెల్‌ న్యాయవాదులు, విద్యార్థి సంఘం నేతలు తెల్లవారుజామున 5:30 గంటలకే జైలు వద్దకు చేరుకొని హడావుడి సృష్టించారు.

జైలు గేటు వద్ద రోడ్డుపై బైఠాయించి, తలుపులు బాదుతూ, ప్రభుత్వానికి వ్యతిరేకంగా నినాదాలు చేశారు. ఈ కేసులో జైల్లో ఉన్న చెవిరెడ్డి భాస్కరరెడ్డి లోపలి నుంచి అరుస్తూ, బెదిరింపులకు పాల్పడ్డారు. బయట ఉన్న వైకాపా నేతలు కూడా అరుపులతో, గేటు బాదుతూ, పోలీసులను నెట్టుకుంటూ రభస చేశారు. అంబటి రాంబాబు, దేవినేని అవినాష్, వెలంపల్లి శ్రీనివాస్, మల్లాది విష్ణు, తలశిల రఘురాం, రుహుల్లా, విద్యార్థి సంఘం నేత రవిచంద్ర తదితరులు ఈ హంగామాలో పాల్గొన్నారు.

జైలు సూపరింటెండెంట్‌ ఇర్ఫాన్‌ ఉదయం 8:30 గంటలకు చేరుకొని, జైలర్‌ గణేశ్‌తో కలిసి విడుదల ప్రక్రియను వేగవంతం చేశారు. 9:30 గంటలకు ముగ్గురు నిందితులను విడుదల చేశారు. అయితే, చెవిరెడ్డి లోపలి నుంచి ‘మమ్మల్ని ఎందుకు వదలడం లేదు?’ అంటూ బెదిరించగా, గోవిందప్ప బాలాజీ తలను గోడకు కొట్టుకున్నట్లు నటించాడు. బయట ఉన్న నేతలు కూడా ‘మా వాళ్లను ఏం చేస్తున్నారు?’ అంటూ పోలీసులపై దూషణలకు దిగారు.

విడుదలైన ధనుంజయరెడ్డి మీడియాతో మాట్లాడుతూ, ‘అధికారులు కావాలనే ఆలస్యం చేశారు. ఈ ప్రభుత్వానికి చట్టం, న్యాయం పట్టదు’ అని ఆరోపించారు. అంబటి రాంబాబు, ‘నేరస్థుల్లా తీసుకెళ్లిన మా వాళ్లు హీరోల్లా బయటకొచ్చారు’ అని వ్యాఖ్యానించారు. విజయవాడ పోలీసులు ఈ ఉద్రిక్త పరిస్థితిపై దర్యాప్తు చేస్తున్నారు. ఇలాంటి ఘటనలు పునరావృతం కాకుండా చర్యలు తీసుకుంటామని తెలిపారు.