Lokesh Meets Maharashtra CM Fadnavis: మహారాష్ట్ర సీఎం ఫడణవీస్‌తో లోకేశ్ భేటీ.. పెట్టుబడులు, విద్యా సంస్కరణలపై చర్చ

Lokesh Meets Maharashtra CM Fadnavis: ఆంధ్రప్రదేశ్ విద్యా, ఐటీ శాఖల మంత్రి నారా లోకేశ్ మహారాష్ట్ర ముఖ్యమంత్రి దేవేంద్ర ఫడణవీస్‌తో ముంబయిలో మంగళవారం కీలక భేటీ జరిపారు.

భేటీలో లోకేశ్ సీఎం ఫడణవీస్‌ను మంగళగిరి చేనేత శాలువాతో సత్కరించి, తిరుమల శ్రీవారి ప్రతిమను అందజేశారు. సీఎం ఫడణవీస్ మంత్రి లోకేశ్‌కు గణేశ్ ప్రతిమను బహూకరించారు.

లోకేశ్ ఆంధ్రప్రదేశ్‌లో ప్రభుత్వం తీసుకువస్తున్న పెట్టుబడుల ఆకర్షణ విధానాలు, స్పీడ్ ఆఫ్ డూయింగ్ బిజినెస్‌లో సాధించిన పురోగతిని మహారాష్ట్ర సీఎంకు వివరించారు. అంతేకాకుండా, విద్యా శాఖలో తీసుకువచ్చిన సంస్కరణలు, స్కిల్ డెవలప్‌మెంట్ కార్యక్రమాల గురించి వివరించి, మహారాష్ట్రలో అమలవుతున్న ఉత్తమ అభ్యాసాలను సీఎం నుంచి తెలుసుకున్నారు.

డేటా సెంటర్లపై కీలక చర్చ

అంతకుముందు హైపర్‌స్కేల్ డేటా సంస్థ ఎయిర్ ట్రంక్ సీఈఓ రాబిన్ ఖుదాతో కూడా లోకేశ్ భేటీ అయ్యారు. విశాఖపట్నంలో ఎయిర్ ట్రంక్ క్యాంపస్ ఏర్పాటు చేయాలని మంత్రి ఆహ్వానం పలికారు.

వైజాగ్‌ను ఏఐ మరియు డేటా హైపర్‌స్కేల్ హబ్గా అభివృద్ధి చేస్తున్నట్లు తెలిపిన లోకేశ్, గూగుల్ ఏఐ హబ్, రిలయన్స్ ఏఐ డేటా సెంటర్లు వేగంగా పురోగతి సాధిస్తున్నట్లు వివరించారు. డేటా సెంటర్ల ఏర్పాటుకు విశాఖ అన్ని విధాలా అనుకూలమని చెప్పగా, రాబిన్ ఖుదా ఏపీ ప్రభుత్వ ప్రతిపాదనలను సానుకూలంగా పరిశీలిస్తామని హామీ ఇచ్చారు.

ఈ భేటీలు ఏపీలో ఐటీ, విద్యా రంగాల అభివృద్ధికి కొత్త మార్గాలు వేస్తాయని రాజకీయ వర్గాలు భావిస్తున్నాయి.