Lokesh Slams Jagan: జగన్‌పై లోకేష్ ఆగ్రహం: టీచర్ల ఆత్మస్థైర్యాన్ని దెబ్బతీసేలా వైసీపీ చర్యలు

Lokesh Slams Jagan: ఉపాధ్యాయ దినోత్సవం సందర్భంగా ఆంధ్రప్రదేశ్ విద్య, ఐటీ శాఖల మంత్రి నారా లోకేష్ రాష్ట్రంలోని ఉపాధ్యాయులందరికీ శుభాకాంక్షలు తెలిపారు. సోషల్ మీడియా వేదిక ఎక్స్‌లో ఒక పోస్ట్ ద్వారా తన సందేశాన్ని పంచుకున్నారు.

“ఎంతో ఓర్పుతో విద్యార్థులకు పాఠాలు చెప్పి, వారిని ఉన్నత స్థాయికి చేర్చే ప్రతి గురువు దైవంతో సమానం. మన సమాజంలో గురువుకు అత్యున్నత స్థానం ఉంది. తల్లిదండ్రుల తర్వాత గురువునే ఆరాధిస్తాం. ఉపాధ్యాయ వృత్తికి వన్నె తెచ్చిన మహనీయుడు డాక్టర్ సర్వేపల్లి రాధాకృష్ణన్ జయంతి సందర్భంగా, ఆయన సేవలను స్మరిస్తూ గురువులందరికీ ఉపాధ్యాయ దినోత్సవ శుభాకాంక్షలు తెలియజేస్తున్నాను” అని నారా లోకేష్ పేర్కొన్నారు.

వైసీపీ చర్యలపై లోకేష్ ఖండన

విద్యార్థులను భావి భారత పౌరులుగా తీర్చిదిద్దే ఉపాధ్యాయులను అతి నీచంగా చిత్రీకరిస్తూ, వారి ఆత్మస్థైర్యాన్ని దెబ్బతీసేలా వైసీపీ ప్రవర్తిస్తోందని మంత్రి నారా లోకేష్ తీవ్రంగా ఖండించారు. “ఫేక్ హ్యాండిల్స్ ద్వారా తప్పుడు సమాచారాన్ని ప్రచారం చేస్తున్న వైసీపీ చర్యలను అర్థం చేసుకొని, ఉపాధ్యాయులు తగిన రీతిలో స్పందించాలని కోరుతున్నాను” అని ఆయన అన్నారు.

వైసీపీ ఒక ఫేక్ హ్యాండిల్ ద్వారా ఆంధ్రప్రదేశ్‌లోని టీచర్లను అవమానకరంగా చిత్రీకరిస్తూ, వారు తాగి బెంచీల కింద పడుకున్నట్లు ఒక ఫొటోను షేర్ చేసిందని లోకేష్ ఆవేదన వ్యక్తం చేశారు. “పక్క రాష్ట్రంలో జరిగిన ఒక సంఘటనకు సంబంధించిన ఫొటోను ఆంధ్రప్రదేశ్‌లో జరిగినట్లు చిత్రీకరించి, దానిపై దారుణమైన వ్యాఖ్యలు చేయడం క్షమించరాని నేరం. ఇలాంటి చర్యలను వైసీపీ గతంలోనూ చాలాసార్లు చేసింది. విద్యను నేర్పే గురువులను కూడా నీచంగా చిత్రీకరించడం ద్వారా వైసీపీ నీతిహీనతకు మరోసారి దిగజారింది” అని లోకేష్ విమర్శించారు.

మిలాద్ ఉన్ నబీ శుభాకాంక్షలు

మిలాద్ ఉన్ నబీ సందర్భంగా ముస్లిం సోదరులకు కూడా నారా లోకేష్ శుభాకాంక్షలు తెలిపారు. “మహమ్మద్ ప్రవక్త జన్మదినాన్ని పురస్కరించుకొని ఈద్ మిలాద్-ఉన్-నబీ శుభాకాంక్షలు తెలియజేస్తున్నాను. మహమ్మద్ ప్రవక్త బోధనలు ఎల్లప్పుడూ ఆచరణీయం. అల్లా ఆశీస్సులు మీకు ఉండాలని ఈ సందర్భంగా కోరుకుంటున్నాను” అని ఆయన పేర్కొన్నారు.