Manohar Nadendla: నాదెండ్ల మనోహర్: మొబైల్ కిట్లతో పీడీఎస్ బియ్యం అక్రమ రవాణాకు అడ్డుకట్ట.. విశాఖలో ఆవిష్కరణ

Manohar Nadendla: పౌరసరఫరా శాఖలో సంస్కరణలు తీసుకొస్తున్నామని, మార్పు మొదలైందని మంత్రి నాదెండ్ల మనోహర్ తెలిపారు. విశాఖలో పీడీఎస్ బియ్యాన్ని గుర్తించే ర్యాపిడ్ మొబైల్ కిట్లను ఆయన ఆవిష్కరించి మాట్లాడారు. గతేడాది కాకినాడ పోర్టులో బియ్యం అక్రమ రవాణాపై కఠిన చర్యలు చేపట్టినట్లు వివరించారు. కాకినాడ నుంచి రవాణా అయ్యే ప్రతి సరకును శ్రద్ధగా పరిశీలించి, జాగ్రత్తలు తీసుకుంటున్నట్లు చెప్పారు. కూటమి ప్రభుత్వం ఏర్పడిన తర్వాత 5,65,000 క్వింటాళ్ల బియ్యాన్ని స్వాధీనం చేసుకున్నట్లు తెలిపారు. విశాఖ నుంచి పీడీఎస్ బియ్యం ఎగుమతులు జరగకుండా అన్ని చర్యలు తీసుకున్నట్లు చెప్పారు. నగరంలో 33 మంది సిబ్బందితో మూడు చెక్‌పోస్టులు ఏర్పాటు చేశామని పేర్కొన్నారు.

ఇతర రాష్ట్రాల నుంచి తరలివస్తున్న బియ్యాన్ని కూడా పూర్తిగా తనిఖీ చేస్తున్నామని మంత్రి నాదెండ్ల మనోహర్ అన్నారు. నిఘా విభాగం అధికారులు అక్రమాలకు పాల్పడితే కఠిన చర్యలు తీసుకుంటామని హెచ్చరించారు. ఆంధ్రప్రదేశ్‌లో 700 మొబైల్ కిట్లను సిద్ధం చేశామని, అక్రమంగా ఎగుమతి చేసే పీడీఎస్ బియ్యాన్ని గుర్తించేందుకు ఇవి ఎంతో ఉపయోగపడతాయని తెలిపారు. చెక్‌పోస్టుల వద్ద తనిఖీలు ముమ్మరం చేశామని, ఈ ఏడాది నుంచి ప్రజలకు నాణ్యమైన బియ్యం అందిస్తామని హామీ ఇచ్చారు. ఇప్పటికే స్మార్ట్ రైస్ కార్డులు, క్యూఆర్ కోడ్‌లు జారీ చేశామని, దుకాణాలకు ఎంత బియ్యం తరలించామో, పంపణీ ఎంత అవుతుందో అనే వివరాలు సేకరిస్తున్నామని వివరించారు.

పౌరసరఫరా వ్యవస్థలో పారదర్శకత మరియు సేవా రుణత్వాన్ని పెంచేందుకు కొత్త సంస్కరణలు తీసుకుంటున్నామని మంత్రి స్పష్టం చేశారు. ప్రజల సంక్షేమం కోసం ఈ చర్యలు తీసుకుంటున్నామని, అక్రమాలను అరికట్టేందుకు పూర్తి నిఘా పెడుతున్నామని తెలిపారు.