వైకాపా ప్రభుత్వ హయాంలో ఏపీ రోడ్లు గుంతల మయం: జగన్ స్నేహితుడు కేటీఆర్ హేళన

Minister B.C. Janardhan Reddy: వైకాపా పాలనా కాలంలో ఆంధ్రప్రదేశ్ రోడ్లు దారుణంగా దెబ్బతిన్నాయని, అప్పటి ముఖ్యమంత్రి జగన్‌మోహన్‌రెడ్డి మిత్రుడైన కేటీఆర్ స్వయంగా హేళన చేశారని రాష్ట్ర రహదారులు, భవనాల శాఖ మంత్రి బీసీ జనార్దన్‌రెడ్డి విమర్శించారు. వైకాపా నాయకులు వైన్, మైనింగ్ ద్వారా వచ్చే ఆదాయాలు సరిపోకపోతే, తమ కమీషన్ల కోసం న్యూ డెవలప్‌మెంట్ బ్యాంకు (ఎన్‌డీబీ) సాయంతో చేపట్టాల్సిన రోడ్ల పనులను కూడా నిలిపివేశారని ఆయన ఆరోపించారు. కూటమి ప్రభుత్వం అధికారంలోకి వచ్చిన తర్వాత ఈ పనులను ప్రాధాన్యతాక్రమంలో ముందుకు తీసుకెళ్లామని ఆయన వివరించారు.

2026-27 ఆర్థిక సంవత్సరానికి రహదారులు, భవనాల శాఖకు నిధుల కేటాయింపులపై జరిగిన చర్చలో మంత్రి మాట్లాడుతూ, రాష్ట్రంలో మొత్తం 43,505 కిలోమీటర్ల ఆర్‌అండ్‌బీ రోడ్లు ఉండగా, వైకాపా హయాంలో 23 వేల కిలోమీటర్ల మేర రోడ్లు పూర్తిగా దెబ్బతిని, నడవలేని స్థితికి చేరాయని పేర్కొన్నారు. రోడ్ల నిర్వహణను పూర్తిగా గాలికి వదిలేశారని విమర్శించారు. కూటమి ప్రభుత్వం వచ్చిన తర్వాత తొలి సంక్రాంతి నాటికి రూ.861 కోట్లతో 20,600 కిలోమీటర్ల రోడ్ల మరమ్మతు పనులను పూర్తి చేశామని ఆయన తెలిపారు.

పబ్లిక్-ప్రైవేట్ పార్టనర్‌షిప్ (పీపీపీ) విధానంలో 12 రహదారుల పరిధిలో 712 కిలోమీటర్ల విస్తరణకు రూ.5,231 కోట్లతో ప్రతిపాదనలు సిద్ధం చేశామని మంత్రి చెప్పారు. రోడ్ల నిర్మాణంలో అధునాతన సాంకేతికతలను వినియోగిస్తున్నామని, సకాలంలో మరమ్మతులు చేపట్టేందుకు టెండర్ల విధానంలో సంస్కరణలు అమలు చేశామని వివరించారు. ముఖ్యమంత్రి చంద్రబాబు నాయుడు రహదారుల అభివృద్ధికి రూ.2,526 కోట్లు కేటాయించారని, ఉమ్మడి రాష్ట్రంలో కూడా ఇంత పెద్ద మొత్తం కేటాయించలేదని ఆయన పేర్కొన్నారు. వైకాపా ప్రభుత్వం కాంట్రాక్టర్లకు పెట్టిన బకాయిలను కూటమి ప్రభుత్వమే చెల్లించిందని తెలిపారు.

2024-25లో రూ.11,325 కోట్లతో 770 కిలోమీటర్ల జాతీయ రహదారుల నిర్మాణం పూర్తి చేశామని, రూ.55,506 కోట్లతో 2,487 కిలోమీటర్ల పనులు ప్రస్తుతం జరుగుతున్నాయని మంత్రి వెల్లడించారు. 2025-26లో రూ.98,635 కోట్లతో 1,902 కిలోమీటర్ల పనులను పూర్తి చేయాలని లక్ష్యంగా నిర్ణయించామని చెప్పారు.