Nara Lokesh: నారా లోకేశ్: ఏపీ విశ్వవిద్యాలయాలతో సంయుక్తంగా పనిచేయండి.. ఆస్ట్రేలియా పర్యటనలో మంత్రి నారా లోకేశ్

Nara Lokesh: మంత్రి నారా లోకేశ్‌ ఆస్ట్రేలియా పర్యటన కొనసాగుతోంది. ఈ పర్యటనలో భాగంగా గ్రిఫిత్ యూనివర్సిటీ వైస్ ప్రెసిడెంట్ (గ్లోబల్) మార్నీ వాట్సన్‌తో గోల్డ్ కోస్ట్ క్యాంపస్‌లో ఆయన సమావేశమైనారు. యూనివర్సిటీ స్పోర్ట్స్ కళాశాలలో అధునాతన క్రీడా సౌకర్యాలను పరిశీలించారు. పబ్లిక్ పాలసీ, సస్టైనబిలిటీ, ఇన్నోవేషన్ రంగాల్లో సంయుక్త కార్యక్రమాల కోసం చొరవలు తీసుకోవాలని సూచించారు. ఆంధ్రప్రదేశ్-గ్రిఫిత్ విశ్వవిద్యాలయం మధ్య భాగస్వామ్యం ఏర్పాటు చేయాలని కోరారు. పరిశోధనలు, విద్యార్థుల మార్పిడి, అవగాహనా కార్యక్రమాల కోసం ఏపీలో హబ్‌ ఏర్పాటు చేయాలని విజ్ఞప్తి చేశారు. సిలబస్ రూపకల్పన, నైపుణ్య ధ్రువీకరణలకు ఏపీ విశ్వవిద్యాలయాలతో భాగస్వామ్యం చేపట్టాలని పేర్కొన్నారు.

పునరుత్పాదక శక్తి, ప్రజారోగ్యం, నీటి నిర్వహణ రంగాల్లో సంయుక్త పరిశోధన ప్రాజెక్టులను ప్రారంభించాలి. గ్రిఫిత్ యూనివర్సిటీ, ఆంధ్రప్రదేశ్‌లోని ప్రముఖ విద్యాసంస్థల మధ్య డ్యూయల్ డిగ్రీలు లేదా ట్విన్నింగ్ ప్రోగ్రామ్‌లను అభివృద్ధి చేయాలి. స్కాలర్‌షిప్‌లు, అధ్యాపకులు, విద్యార్థుల అభివృద్ధికి ఎక్స్చేంజ్ కార్యక్రమాలను ప్రోత్సహించాలి. నవంబర్ 14, 15 తేదీల్లో విశాఖలో నిర్వహించే భాగస్వామ్య సదస్సుకు హాజరుకావాలని ఆహ్వానించారు. స్టార్టప్‌లకు మద్దతుగా ఆంధ్రప్రదేశ్ రతన్ టాటా ఇన్నోవేషన్ హబ్‌తో కలిసి పనిచేయాలని మంత్రి లోకేశ్‌ సూచించారు.