New Fake Liquor Formula: కిక్కు ఎక్కేలా కొత్త నకిలీ మద్యం ఫార్ములా!

New Fake Liquor Formula: నకిలీ మద్యం తయారీలో సరికొత్త మలుపు! ప్రధాన నిందితుడు అద్దేపల్లి జనార్దనరావు సొంతంగా మద్యం తయారు చేయాలని భావించి, చిత్తూరు జిల్లాకు చెందిన బాలాజీని సంప్రదించాడు. బెంగళూరు, గోవా డిస్టిలరీల్లో పనిచేసిన అనుభవం ఉన్న బాలాజీ, మద్యం తయారీ ఫార్ములాలపై మంచి పట్టు సాధించాడు. జనార్దనరావు ఫార్ములా అడిగినా బాలాజీ నిరాకరించి, తానే స్వయంగా మద్యం తయారుచేసి ఇస్తానని హామీ ఇచ్చాడు. అడ్వాన్స్‌గా రూ.20 లక్షలు తీసుకుని, అమ్మకాల్లో కమీషన్‌ పొందుతూ మద్యం సరఫరా చేశాడు.

అన్నమయ్య జిల్లా ములకలచెరువు, కృష్ణా జిల్లా ఇబ్రహీంపట్నంలో అనధికార డిస్టిలరీల్లో బాలాజీ తన ఫార్ములా ప్రకారం మద్యం తయారు చేశాడు. బ్రాందీ, విస్కీ, రమ్‌ వంటి రకాలకు ప్రత్యేక ఫార్ములాలు ఉపయోగించి, కిక్కు ఎక్కేలా మిశ్రమం చేశాడు. హైదరాబాద్‌కు చెందిన రవి ద్వారా గోవాలో జనార్దనరావు బాలాజీని కలిశాడు. అక్కడ బాలాజీ లిక్కర్‌ హబ్‌లు నిర్వహిస్తున్నాడు. ప్రీమియం బ్రాండ్ల మద్యం సరఫరా ఆఫర్‌తో ప్రారంభమైన సంబంధం, నకిలీ వ్యాపారంగా మారింది.

నకిలీ మద్యం వ్యవహారం బయటపడటంతో బాలాజీ అజ్ఞాతంలోకి వెళ్లిపోయాడు. ఎక్సైజ్‌ పోలీసులు అతడి కోసం గాలిస్తున్నారు. చిత్తూరు స్వగ్రామంలో నిఘా పెంచారు. బెంగళూరు స్పిరిట్‌, కార్మెల్‌ వ్యాపారులతో బాలాజీకి మంచి సంబంధాలు ఉన్నాయి. ఈ కేసులో మరిన్ని వివరాలు వెలికితీయడానికి పోలీసులు ప్రయత్నిస్తున్నారు.