Parishad Elections: రాష్ట్రవ్యాప్తంగా ప్రశాంతంగా పరిషత్‌ పోలింగ్‌.. 67.24 శాతం ఓటింగ్‌ నమోదు

Parishad Elections: గురువారం రాష్ట్రవ్యాప్తంగా జరిగిన జడ్పీటీసీ, ఎంపీటీసీ ఎన్నికల పోలింగ్‌లో కొన్ని చోట్ల చెదురుమదురు ఉద్రిక్తతలు, స్వల్ప ఘర్షణలు మినహా మొత్తంగా సాఫీగా సాగింది. ఉదయం 7 గంటలకు ప్రారంభమైన పోలింగ్ సాయంత్రం 5 గంటలకు ముగిసింది. ఆ సమయానికి పోలింగ్ కేంద్రాల్లోపల ఉన్న వారందరికీ ఓటు వేసేందుకు అధికారులు అవకాశం కల్పించారు.

ఏకగ్రీవాలు మినహాయించి రాష్ట్రవ్యాప్తంగా 7,767 ఎంపీటీసీ స్థానాలు, 582 జడ్పీటీసీ స్థానాలకు ఎన్నికలు జరిగాయి. సాయంత్రం 5 గంటల నాటికి సుమారు 67.24 శాతం పోలింగ్ నమోదైనట్లు రాష్ట్ర ఎన్నికల సంఘం ప్రకటించింది. కొన్ని కేంద్రాల్లో 5 గంటల తర్వాత కూడా ఓటర్లు ఉండటంతో పోలింగ్ శాతం మరికొంత పెరిగే అవకాశం ఉంది.

మొత్తం 2,24,32,460 మంది ఓటర్లలో 1,50,84,014 మంది (67.24 శాతం) తమ ఓటు హక్కు వినియోగించుకున్నారు. ఉదయం తొలి రెండు గంటల్లో 11.71 శాతం మాత్రమే పోలింగ్ జరగగా, మధ్యాహ్నం ఒంటి గంటకల్లా 30.50 శాతానికి చేరుకుంది. ఒంటి గంట నుంచి 3 గంటల మధ్య భారీగా ఓటర్లు వచ్చి 28.05 శాతం పోలింగ్ నమోదు చేశారు.

అత్యల్పంగా అల్లూరి సీతారామరాజు జిల్లాలో 59 శాతం, శ్రీకాకుళం, తూర్పుగోదావరి జిల్లాల్లో 60 శాతం పరిధిలో పోలింగ్ జరిగింది. అత్యధికంగా శ్రీసత్యసాయి జిల్లాలో 82.60 శాతం నమోదైంది. విశాఖపట్నం (75%), నంద్యాల (73.70%), గుంటూరు (73.12%) జిల్లాలు తర్వాతి స్థానాల్లో నిలిచాయి.

గిరిజన ప్రాంతాల్లో ఓటర్లు నాటు పడవలపై ప్రయాణించి, కిలోమీటర్ల దూరం నడచి ఓటు వేశారు. కొన్ని చోట్ల వరద నీటిలోనే ఓటు వేసిన ఘటనలు, వృద్ధులను డోలీల్లో తీసుకెళ్లి ఓటు వేయించిన దృశ్యాలు కనిపించాయి. కుప్పం మండలంలో ఒక అభ్యర్థి తానే ఓటు వేయలేకపోయిన విచిత్ర ఘటన కూడా చోటుచేసుకుంది.

మొత్తంగా రాష్ట్రవ్యాప్తంగా పోలింగ్ ప్రశాంతంగా సాగినట్లు అధికారులు తెలిపారు. ఓట్ల లెక్కింపు నవంబర్ 7న జరగనుంది.