Pawan Kalyan: మాట నిలబెట్టుకున్న పవన్ కల్యాణ్.. పెదపాడుకు కొత్త పాఠశాల భవనం

Pawan Kalyan: ఆంధ్రప్రదేశ్ ఉప ముఖ్యమంత్రి పవన్ కల్యాణ్ తన మాటను నిలబెట్టుకుంటూ ఏలూరు జిల్లాలోని పెదపాడు పాఠశాలకు ఆధునిక కొత్త భవనాన్ని నిర్మించారు. ‘అడవితల్లి బాట’ కార్యక్రమ ప్రారంభోత్సవ సమయంలో స్థానికులకు ఇచ్చిన హామీని అక్షరాలా నెరవేర్చారు.

రూ.17.50 లక్షల వ్యయంతో నిర్మించిన ఈ కొత్త భవనంలో ఆధునిక సదుపాయాలతో సురక్షితమైన, సౌకర్యవంతమైన తరగతి గదులు అందుబాటులో ఉంటాయి. విద్యార్థులకు మెరుగైన విద్యా వాతావరణం కల్పించడమే లక్ష్యంగా ఈ నిర్మాణం చేపట్టినట్లు అధికారులు తెలిపారు.

అడవితల్లి బాట కార్యక్రమంలో పవన్ కల్యాణ్ ఇచ్చిన హామీ మేరకు భవన నిర్మాణం పూర్తి చేశారు. వచ్చే విద్యా సంవత్సరం ప్రారంభం నుంచి ఈ కొత్త భవనం విద్యార్థులకు అందుబాటులోకి వస్తుందని అధికారులు ప్రకటించారు.

పాఠశాలకు కొత్త భవనం ఏర్పాటు చేయడంతో స్థానిక ప్రజలు, విద్యార్థుల తల్లిదండ్రులు హర్షం వ్యక్తం చేస్తున్నారు. గ్రామీణ ప్రాంతాల్లో విద్యా మౌలిక సదుపాయాల అభివృద్ధికి ప్రభుత్వం తీసుకుంటున్న చర్యలను వారు స్వాగతించారు.

ఏపీ ప్రభుత్వం విద్యా రంగ అభివృద్ధికి ప్రాధాన్యత ఇస్తూ గ్రామీణ ప్రాంతాల్లో మరిన్ని అభివృద్ధి కార్యక్రమాలు చేపట్టనుందని అధికారులు వెల్లడించారు.