Pawan Kalyan’s Direct Question: పవన్ కల్యాణ్ సూటి ప్రశ్న: ఇది నిజమైన సెక్యులరిజం కాదు, మోసం!

హిందూ ఆచారాలకు మద్దతుగా తీర్పు ఇచ్చిన జడ్జిపై అభిశంసనా?

ఇండియా కూటమి వైఖరిపై ఉపముఖ్యమంత్రి పవన్ కల్యాణ్ తీవ్ర అసంతృప్తి

Pawan Kalyan’s Direct Question: హిందూ సమాజం తన విశ్వాసాలు, ఆచారాలు రాజ్యాంగ హక్కుల ప్రకారం పాటించడానికి హక్కుదారులని, అందుకు అనుకూల తీర్పులు ఇచ్చే న్యాయమూర్తులను రాజకీయ ఒత్తిడితో బెదిరించడం దేశ రాజ్యాంగ విలువలకు విరుద్ధమని ఉప ముఖ్యమంత్రి పవన్ కల్యాణ్ తీవ్రంగా మండిపడ్డారు. డీఎంకే నేతృత్వంలో 120 మంది ఇండియా కూటమి ఎంపీలు లోక్‌సభ స్పీకర్‌కు లేఖ రాసి, హిందూ ఆచారాలకు మద్దతుగా తీర్పు ఇచ్చిన మద్రాస్ హైకోర్టు జడ్జి జీఆర్ స్వామినాథన్‌పై అభిశంసన చర్యలు ప్రవేశపెట్టాలని డిమాండ్ చేయడాన్ని ఈయన తీవ్రంగా ఖండించారు. "ఇది కోర్టులను బెదిరించి మౌనంగా ఉంచాలనే రాజకీయ కుట్ర కాదా? హిందూ విశ్వాసాలపై తీర్పులు ఇచ్చేటప్పుడు న్యాయమూర్తులు భయపడాలని హెచ్చరించడం ద్వారా మోసపూరిత సెక్యులరిజం (సూడో సెక్యులరిజం) ప్రదర్శిస్తున్నారు" అంటూ ప్రశ్నించారు. ఈ పరిస్థితుల్లో సనాతన ధర్మ పరిరక్షణ బోర్డు వెంటనే ఏర్పాటు చేయాలని, అందుకు అన్ని వర్గాలూ ఐక్యమవ్వాలని ఆయన 'ఎక్స్'లో మంగళవారం పోస్టు చేశారు.

తమిళనాడులో తిరుప్పరకుండ్రం కొండపై ఉన్న దీపస్తంభంపై కార్తిక పౌర్ణమి రోజున దీపాన్ని వెలిగించే విషయంలో దర్గా కమిటీ, సుబ్రహ్మణ్య స్వామి ఆలయ కమిటీల మధ్య ఏర్పడిన వివాదం మద్రాస్ హైకోర్టు మదురై బెంచ్ ముందుకు వచ్చింది. హిందూ భక్తుల దీర్ఘకాలిక ఆచారాన్ని కాపాడేందుకు పరిమిత సంఖ్యలో భక్తులు దీపం వెలిగించవచ్చని న్యాయమూర్తి జస్టిస్ జీఆర్ స్వామినాథన్ ఆదేశాలు జారీ చేశారు. అయితే, తమిళనాడు ప్రభుత్వం ఈ ఆదేశాలను అమలు చేయకపోవడంతో వివాదం మరింత తీవ్రమైంది. తాజాగా, మంగళవారం డీఎంకే నేతృత్వంలో ఇండియా కూటమి ఎంపీలు లోక్‌సభ స్పీకర్ ఓం బిర్లాను కలిసి, ఈ తీర్పును "హిందూ విశ్వాసాలకు మద్దతుగా ఇచ్చిన తప్పుడు"గా వర్గీకరించి, జడ్జిపై అభిశంసన తీర్మానం ప్రవేశపెట్టాలని కోరిన లేఖను సమర్పించారు. ఈ చర్యలు దేశ జ్యుడీషియరీ స్వాతంత్ర్యానికి ముప్పుగా మారాయని, రాజకీయ పార్టీలు ఎందుకు ఇటువంటి తీవ్ర చర్యలకు దిగుతున్నాయని పవన్ కల్యాణ్ ప్రశ్నించారు.

గత ఉదాహరణలతో పోల్చి చూస్తే.. వివక్ష స్పష్టంగా కనిపిస్తుంది

గతంలో సుప్రీంకోర్టు రాజ్యాంగ ధర్మాసనం శబరిమల ఆలయంలో శతాబ్దాల నుంచి ఉన్న ఆచారాలకు వ్యతిరేకంగా తీర్పు ఇచ్చినప్పుడు ఎట్టి రాజకీయ పార్టీలూ ఆ న్యాయమూర్తులపై అభిశంసన డిమాండ్లు చేయలేదు. ఆ తీర్పును న్యాయపరమైన మార్గాల్లోనే సవాలు చేశారు. అలాగే, ఇటీవల ఒక సుప్రీంకోర్టు మాజీ ప్రధాన న్యాయమూర్తి ఒక కేసులో "మీరు విష్ణుమూర్తి భక్తుడు కాబట్టి, ఆ దేవుడినే ప్రార్థించండి" అని వ్యాఖ్యానించినప్పటికీ, అది రాజకీయ వివాదాలకు గురికాలేదు. కానీ, తాజా తమిళనాడు ఘటనలో హిందూ ఆచారాలకు మద్దతుగా తీర్పు ఇచ్చిన సీనియర్ జడ్జిని లక్ష్యంగా చేసుకుని ఇండియా కూటమి అభిశంసన డిమాండ్ చేయడం భయానక వివక్షను, మతపరమైన విభేదాలను పెంచుతుందని పవన్ కల్యాణ్ హెచ్చరించారు. "ఈ రకమైన చర్యలు జ్యుడీషియరీని రాజకీయ ఆయుధంగా మలచుకునే ప్రయత్నాలకు దారితీస్తాయి. హిందూ ధర్మాన్ని కాపాడటానికి సనాతన ధర్మ పరిరక్షణ బోర్డు ఏర్పాటు చేసి, అన్ని స్వరాలు ఐక్యమవ్వాలి" అని ఆయన సూచించారు.

ఈ ఘటన దేశవ్యాప్తంగా మత సామరస్యానికి, రాజ్యాంగ విలువలకు సవాలుగా మారిందని రాజకీయ విశ్లేషకులు అభిప్రాయపడుతున్నారు. ఇండియా కూటమి ఈ వైఖరిని సమర్థించుకుంటే, దేశ ఐక్యతకు మరింత నష్టం వాటిల్లని ఆందోళన వ్యక్తమవుతోంది.