Viveka Murder Case: వివేకా హత్య కేసు: తదుపరి దర్యాప్తు అవసరమా.. కాదా? సీబీఐ స్పష్టంగా చెప్పాలి- సుప్రీం కోర్టు న్యాయమూర్తి జస్టిస్ ఎం.ఎం. సుందరేశ్ వ్యాఖ్యలు

Viveka Murder Case: మాజీ మంత్రి వై.ఎస్. వివేకానందరెడ్డి హత్య కేసులో తదుపరి దర్యాప్తు కొనసాగించాలా.. లేదా అనే అంశంపై సీబీఐ స్పష్టమైన వైఖరి తెలపాలని సుప్రీం కోర్టు ఆదేశించింది. ఇప్పటివరకూ సీబీఐ అస్పష్టంగా వ్యవహరిస్తోందని, "కచ్చితంగా ఏదో ఒకటి చెప్పండి.. ఇప్పటివరకూ మీరు అస్పష్టంగా మాట్లాడటమే సమస్య" అంటూ ఆగ్రహం వ్యక్తం చేసింది.

జస్టిస్ ఎం.ఎం. సుందరేశ్, జస్టిస్ ఎన్.కె. సింగ్‌లతో కూడిన ధర్మాసనం మంగళవారం ఈ కేసు విచారణ సందర్భంగా ఈ వ్యాఖ్యలు చేసింది. వివేకా కుమార్తె సునీతా నర్రెడ్డి దాఖలు చేసిన పిటిషన్‌పై విచారణ జరిగింది. ట్రయల్ కోర్టు డిసెంబర్ 10న ఇచ్చిన తీర్పును సవాలు చేస్తూ ఆమె ఈ వ్యాజ్యం దాఖలు చేశారు. ఆ తీర్పులో కేవలం కిరణ్ యాదవ్, అర్జున్ రెడ్డి అనే ఇద్దరి పాత్రపై మాత్రమే దర్యాప్తుకు అనుమతి ఇచ్చింది.

విచారణలో సునీతా తరఫున సీనియర్ న్యాయవాది సిద్ధార్థ లూథ్రా వాదనలు వినిపించారు. "మేం అడగని అంశాలను కోర్టు పరిగణనలోకి తీసుకుని నిర్ణయం ఇచ్చింది. రూ.4 కోట్ల మనీ ట్రయల్‌పై దర్యాప్తు అసంపూర్ణంగా ఉంది. నిందితుల కాల్ రికార్డుల సేకరణపై ప్రయోజనం లేదని కోర్టు ఎలా నిర్ధారిస్తుంది? హతుడి కుమార్తె తదుపరి దర్యాప్తు కోరుతోంది" అని పేర్కొన్నారు. హత్య గురించి బాహ్య ప్రపంచానికి తెలియకముందే జగన్‌కు తెలిసినందున ఆయన పాత్రపై అనుమానాలు ఉన్నాయని వాదించారు.

అప్పుడు జస్టిస్ సుందరేశ్ జోక్యం చేసుకుని, "మాకు మీరేం కావాలి? ఇక్కడే మినీ ట్రయల్ చేయాలనుకుంటే మళ్లీ హైకోర్టుకు వెళ్లండి. అప్పుడు విషయం తేలడానికి మరో పదేళ్లు పడుతుంది. ప్రాక్టికల్‌గా చూడండి. సీబీఐ ఏ అంశాలపై దర్యాప్తు చేస్తుందో అడుగుతాం. వాళ్లు చెప్పినదాని ప్రకారమే ముందుకెళ్తాం" అని అన్నారు.

తర్వాత సీబీఐ తరఫు న్యాయవాదిని ధర్మాసనం ప్రశ్నించింది. "మీరు ఏం కావాలనుకుంటున్నారో స్పష్టంగా చెప్పండి. ట్రయల్ కోర్టు తీర్పుతో సంతృప్తిగా ఉన్నారా? మీరు అస్పష్టంగా ఉన్నారు. ఇంకేమీ చేయలేమంటే కేసును ఇంతటితో ముగిస్తాం. ఎవరిని విచారించాలి? కస్టోడియల్ విచారణ అవసరమా? ఇది సున్నితమైన విషయం. దర్యాప్తును అడ్డుకోవాలనుకోవట్లేదు. కానీ తార్కిక ముగింపుకు చేరాలి. కక్షిదారులకు న్యాయప్రక్రియపై సంతృప్తి కలగాలి" అని ధర్మాసనం పేర్కొంది.

తదుపరి దర్యాప్తు అవసరమా.. లేదా? ఒకవేళ ఉంటే ఎంతవరకు? ఎవరెవరిని విచారించాలి? అనే అంశాలపై రెండు వారాల్లో సీబీఐ స్పష్టమైన సమాచారం ఇవ్వాలని ఆదేశించింది. తదుపరి విచారణను ఫిబ్రవరి 5కి వాయిదా వేసింది.

ఈ కేసులో విస్తృత కుట్ర కోణం వెలికితీయాలని సునీతా కోరుతున్నారు. సీబీఐ ఇప్పటివరకూ అస్పష్టతతో వ్యవహరిస్తున్న నేపథ్యంలో సుప్రీం కోర్టు ఈ ఆదేశాలతో కేసుకు కొత్త మలుపు ఇచ్చింది.