Maruti Brezza : నెక్సాన్ కోటను బద్ధలు కొట్టేందుకు వస్తున్న కొత్త బ్రెజ్జా.. ఐదు కీలక మార్పులతో అదిరిపోయే ఎంట్రీ

Maruti Brezza : భారతీయ రోడ్లపై అత్యధికంగా అమ్ముడవుతున్న సబ్‌కాంపాక్ట్ ఎస్‌యూవీలలో ఒకటైన మారుతి సుజుకి బ్రెజ్జా ఇప్పుడు సరికొత్త అవతారంలోకి మారబోతోంది. టాటా నెక్సాన్, కియా సోనెట్ వంటి పోటీదారులకు గట్టి సవాల్ విసిరేందుకు మారుతి సుజుకి 2026 బ్రెజ్జా ఫేస్‌లిఫ్ట్ మోడల్‌ను సిద్ధం చేస్తోంది. ప్రస్తుతం ఈ కారు టెస్టింగ్ దశలో ఉంది. 2026 దీపావళి నాటికి ఈ కొత్త మోడల్ మార్కెట్లోకి వచ్చే అవకాశం ఉంది.

1. పవర్‌ఫుల్ టర్బో ఇంజిన్

కొత్త బ్రెజ్జాలో రాబోతున్న అతిపెద్ద మార్పు దాని ఇంజిన్. ఇప్పటివరకు కేవలం 1.5 లీటర్ పెట్రోల్ ఇంజిన్‌తోనే వస్తున్న బ్రెజ్జాలో, ఇప్పుడు 1.0 లీటర్ టర్బో పెట్రోల్ ఇంజిన్‌ను ప్రవేశపెట్టబోతున్నారు. ఇది మారుతి ఫ్రాంక్స్ కారులో మనం ఇప్పటికే చూశాం. ఈ ఇంజిన్ సుమారు 100bhp పవర్, 147Nm టార్క్‌ను ఇస్తుంది. దీనికి 6-స్పీడ్ మాన్యువల్ గేర్‌బాక్స్‌ను కూడా జత చేయనున్నారు. వేగం, పవర్ కోరుకునే వారికి ఇది కచ్చితంగా నచ్చుతుంది.

2. సీఎన్‌జీ మోడల్‌లో వినూత్న మార్పు

సాధారణంగా సీఎన్‌జీ కార్లలో గ్యాస్ సిలిండర్ బూట్ స్పేస్‎లో ఉండటం వల్ల లగేజీ పెట్టుకోవడానికి స్థలం ఉండదు. దీనికి పరిష్కారంగా కొత్త బ్రెజ్జాలో అండర్ బాడీ సీఎన్‌జీ ట్యాంక్ టెక్నాలజీని తీసుకురాబోతున్నారు. దీనివల్ల కారు కింద భాగంలో ట్యాంక్ ఉంటుంది, ఫలితంగా డిక్కీ మొత్తం మీ లగేజీ కోసమే అందుబాటులో ఉంటుంది. లాంగ్ ట్రిప్పులకు వెళ్లే వారికి ఇది ఒక గొప్ప ఫీచర్ అని చెప్పవచ్చు.

3. అదిరిపోయే ఇంటీరియర్, టెక్నాలజీ

కారు ఇంటీరియర్ కూడా ఇప్పుడు మరింత లగ్జరీగా మారబోతోంది. ప్రస్తుతం ఉన్న స్క్రీన్ కంటే పెద్దదైన 10.1 ఇంచ్ టచ్‌స్క్రీన్ ఇన్ఫోటైన్‌మెంట్ సిస్టమ్‌ను ఇందులో అమర్చబోతున్నారు. కొత్త రకం సీట్ కవర్లు, ప్రీమియం డ్యాష్‌బోర్డ్ డిజైన్, మరిన్ని అదనపు ఫీచర్లతో బ్రెజ్జా లోపల కూర్చుంటే ఒక ఖరీదైన కారులో ఉన్న అనుభూతి కలుగుతుంది.

4. లుక్ మార్చేసే డిజైన్ అప్‌డేట్స్

బయటి డిజైన్‌లో కూడా చిన్నపాటి మెరుగులు దిద్దుతున్నారు. కొత్త డిజైన్ కలిగిన ఫాగ్ ల్యాంప్స్, స్టైలిష్ అలాయ్ వీల్స్, వెనుక భాగంలో కనెక్టెడ్ ఎల్ఈడీ టెయిల్ ల్యాంప్స్ బ్రెజ్జాకు సరికొత్త అందాన్ని తెస్తాయి. దూరం నుంచి చూసినా ఇది 2026 మోడల్ అని ఇట్టే గుర్తుపట్టేలా మారుతి డిజైన్ చేస్తోంది.

5. ధర ఎంత ఉండవచ్చు?

ఇన్ని కొత్త ఫీచర్లు, టర్బో ఇంజిన్ వస్తున్నాయి కాబట్టి ధరలో కూడా కొంచెం మార్పు ఉండవచ్చు. ప్రస్తుతం బ్రెజ్జా ధర రూ.8.25 లక్షల నుంచి రూ.13.01 లక్షల (ఎక్స్-షోరూమ్) మధ్య ఉంది. కొత్త ఫేస్‌లిఫ్ట్ మోడల్ ధర దీని కంటే రూ.50 వేల నుంచి లక్ష రూపాయల వరకు పెరిగే అవకాశం ఉందని మార్కెట్ విశ్లేషకులు భావిస్తున్నారు. ఏదేమైనా, టాటా నెక్సాన్, కియా సోనెట్ లాంటి కార్లకు బ్రెజ్జా గట్టి పోటీ ఇవ్వడం ఖాయం.