Citroen : సిట్రోయెన్ నుంచి కొత్త ఎస్‌యూవీ.. క్రూజ్ కంట్రోల్, ఏఐ ఫీచర్‌తో అదుర్స్
క్రూజ్ కంట్రోల్, ఏఐ ఫీచర్‌తో అదుర్స్
Citroen : భారతదేశంలో వేగంగా అభివృద్ధి చెందుతున్న ఎస్‌యూవీ మార్కెట్‌లో ప్రత్యేకంగా నిలవడం అంత సులభం కాదు. కానీ, సిట్రోయెన్ ఎప్పుడూ కాస్త భిన్నంగా ప్రయత్నిస్తోంది. ఈ కంపెనీ ఎప్పుడూ ప్రత్యేకమైన డిజైన్, కంఫర్ట్‌పై దృష్టి పెడుతుంది. ఇప్పుడు ఈ ఫ్రెంచ్ కంపెనీ ఎయిర్‌క్రాస్ ఎస్‌యూవీలో కొత్త వేరియంట్‌ను లాంచ్ చేయనుంది. దీని పేరు ఎయిర్‌క్రాస్ ఎక్స్. సెప్టెంబర్ 22న లాంచ్ కానున్న ఎయిర్‌క్రాస్ ఎక్స్ ఎస్‌యూవీ, ఇప్పటికే ఉన్న టాప్ వేరియంట్‌పై ఆధారపడి ఉంటుంది. కానీ దీనికి కొన్ని ప్రీమియం ఫీచర్లు అదనంగా ఉంటాయి. ఈ కొత్త వేరియంట్ టీజర్‌లో పెద్దగా మార్పులు కనిపించనప్పటికీ లోపల మాత్రం కొన్ని ఆసక్తికరమైన మార్పులు ఉండనున్నాయి.
ఎయిర్‌క్రాస్ ఎక్స్ మొదటి లుక్ టీజర్ ద్వారా బయటపడింది. డిజైన్‌లో పెద్దగా మార్పులు లేవు, కానీ లుక్ మరింత షార్ప్‌గా ఉంది. పాత రూఫ్ రైల్స్, అల్లాయ్ వీల్స్, లైట్ డిజైన్‌తో పోలి ఉంటుంది. కానీ లోపల చాలా మార్పులు జరిగాయి. అతి ముఖ్యమైన మార్పు క్రూజ్ కంట్రోల్. స్టీరింగ్‌పై కొత్త బటన్ కనిపించింది. ఇది స్టాండర్డ్ వేరియంట్‌లో లేదు. దీనితో పాటు, కొత్త డ్యాష్‌బోర్డ్ డిజైన్, అప్‌హోల్‌స్ట్రీ, యాంబియంట్ లైటింగ్, ప్రీమియం ఆడియో సిస్టమ్, కార ఏఐ అసిస్టెంట్ (CARA AI Assistant) వంటి ఫీచర్లు ఉండే అవకాశం ఉంది. వెంటిలేటెడ్ సీట్లు కూడా లభించే అవకాశం ఉంది, కానీ సన్‌రూఫ్ మాత్రం ఉండకపోవచ్చు.
ఎయిర్‌క్రాస్ ఎక్స్‌లో ఇప్పటికే ఉన్న టాప్ వేరియంట్ మ్యాక్స్ లో ఉన్న అన్ని ఫీచర్లు ఉండవచ్చు. ఉదాహరణకు, 10.25-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 7-అంగుళాల డిజిటల్ డ్రైవర్ డిస్‌ప్లే, వైర్‌లెస్ ఆపిల్ కార్‌ప్లే/ఆండ్రాయిడ్ ఆటో, కనెక్టెడ్ కార్ టెక్నాలజీ, ఆటో ఏసీ, వెనుక వెంట్స్, వైర్‌లెస్ ఫోన్ ఛార్జర్ వంటివి ఉంటాయి. సేఫ్టీలో కూడా ఎటువంటి లోటు ఉండదు. ఇందులో 6 ఎయిర్‌బ్యాగ్‌లు, ఈఎస్‌సీ, హిల్-హోల్డ్ అసిస్ట్, టైర్-ప్రెజర్ మానిటరింగ్ సిస్టమ్, రియర్ పార్కింగ్ సెన్సార్‌లు, కెమెరా, ఐఎస్‌ఓఫిక్స్ యాంకర్ పాయింట్స్ వంటి ఫీచర్లు ఉంటాయి.
కొత్త వేరియంట్ ధర ఇప్పటికే ఉన్న టాప్-స్పెక్‌ మ్యాక్స్ కంటే ఎక్కువగా ఉంటుంది. ఇటీవల జరిగిన జీఎస్‌టీ 2.0 రివిజన్ వల్ల ఎయిర్‌క్రాస్ లైన్-అప్ ఇప్పుడు మరింత సరసమైనదిగా మారింది, దీనివల్ల ఎక్స్ వేరియంట్ ప్రీమియం పొజిషన్‌కు న్యాయం చేకూరుతుంది. ప్రస్తుతం ఎయిర్‌క్రాస్ ఎక్స్-షోరూమ్ ధర రూ.7.95 లక్షల నుండి రూ.14.10 లక్షల వరకు ఉంది. దీని ప్రకారం ఎయిర్‌క్రాస్ ఎక్స్ ధర రూ.14 లక్షల పైగా ఉండే అవకాశం ఉంది. ఈ కారు హ్యుందాయ్ క్రెటా, కియా సెల్టోస్, టాటా హారియర్, మహీంద్రా ఎక్స్‌యూవీ 700 వంటి కార్లతో పోటీ పడుతుంది.
