Ampere Magnus: 98 శాతం వృద్ధితో నెం.1.. అమ్మకాల్లో రికార్డు సృష్టించిన ఆంపియర్ మాగ్నస్

Ampere Magnus: భారతీయ ఎలక్ట్రిక్ టూ-వీలర్ మార్కెట్లో గ్రీవ్స్ మొబిలిటీకి చెందిన ప్రముఖ బ్రాండ్ ఆంపియర్ తన అమ్మకాల జోరును కొనసాగిస్తోంది. తాజాగా విడుదలైన ఆగస్టు 2026 విక్రయాల గణాంకాల ప్రకారం, ఆంపియర్‎ బ్రాండ్‌కు చెందిన ఆంపియర్‎ మాగ్నస్ ఎలక్ట్రిక్ స్కూటర్ అద్భుతమైన ప్రదర్శన కనబరిచి టాప్ పొజిషన్‌ను కైవసం చేసుకుంది. ఒక్క నెలలోనే సుమారు 10 వేల మందికి పైగా కస్టమర్లు ఈ స్కూటర్‌ను కొనుగోలు చేయడం విశేషం. గతేడాదితో పోలిస్తే ఈ మోడల్ అమ్మకాల్లో ఏకంగా 98 శాతం భారీ వృద్ధిని నమోదు చేసి సంచలనం సృష్టించింది.

ఆంపియర్‎ విడుదల చేసిన మోడల్ వారీగా సేల్స్ రిపోర్ట్ ప్రకారం, మాగ్నస్ మోడల్ ఏకంగా 9,772 యూనిట్ల అమ్మకాలతో మొదటి స్థానంలో నిలవగా, రెండో స్థానంలో ఆంపియర్‎ రియో నిలిచింది. రియో స్కూటర్ గతేడాదితో పోలిస్తే ఏకంగా 272 శాతం అద్భుతమైన వృద్ధిని సాధించి 1,911 యూనిట్ల అమ్మకాలను నమోదు చేసింది. అలాగే మూడో స్థానంలో నిలిచిన ఆంపియర్‎ నెక్సస్ కూడా 107 శాతం వద్ధితో 756 యూనిట్ల విక్రయాలను సాధించింది. దీనివల్ల కంపెనీ ఎలక్ట్రిక్ స్కూటర్లకు మార్కెట్లో ఎంత డిమాండ్ ఉందనే విషయం స్పష్టమవుతోంది.

ఈ ఎలక్ట్రిక్ స్కూటర్ విజయానికి దాని పర్ఫార్మెన్స్ మరియు రేంజ్ ప్రధాన కారణాలుగా నిలుస్తున్నాయి. ఆంపియర్‎ మాగ్నస్ స్కూటర్‌లో 2.29 kWh కెపాసిటీ కలిగిన డిటాచబుల్ లిథియం-అయాన్/LFP బ్యాటరీని అమర్చారు. ARAI సర్టిఫికేషన్ ప్రకారం ఈ స్కూటర్ సింగిల్ ఛార్జ్‌పై ఏకంగా 121 కిలోమీటర్ల దూరం వరకు ప్రయాణించగలదు. నిజ జీవిత వాడకంలో కూడా ఇది సులభంగా 80 నుంచి 100 కి.మీ రేంజ్ అందిస్తుంది. దీని బ్యాటరీ ఫుల్ కావడానికి సుమారు 4.5 నుంచి 5 గంటల సమయం పడుతుంది. ఇందులో ఉన్న 2.1 kW BLDC హబ్ మోటార్ గంటకు 53 కి.మీ టాప్ స్పీడ్‌ను ఇస్తుంది.

కుటుంబ సమేతంగా ప్రయాణించడానికి ఎంతో అనుకూలంగా ఉండే ఈ స్కూటర్‌లో డిజిటల్ స్పీడోమీటర్, కీ లెస్ ఎంట్రీ, యాంటీ-థెఫ్ట్ అలారం, రివర్స్ మోడ్, యూఎస్‌బీ ఛార్జింగ్ పోర్ట్, కంబైన్డ్ బ్రేకింగ్ సిస్టమ్ (CBS) వంటి అధునాతన ఫీచర్లు ఉన్నాయి. మార్కెట్లో దీని ప్రారంభ ఎక్స్ షోరూమ్ ధర సుమారు రూ.84,900 నుంచి రూ.94,900 మధ్య ఉంది. తక్కువ రన్నింగ్ కాస్ట్, అద్భుతమైన మైలేజ్, కంపెనీ అందించే 3 సంవత్సరాల వారంటీ కారణంగా బడ్జెట్ కస్టమర్లకు ఇది చక్కటి ప్రత్యామ్నాయంగా నిలుస్తోంది.