Pulsar NS125 vs Xtreme 125R: బజాజ్ పల్సర్ NS125 vs హీరో ఎక్స్‌ట్రీమ్ 125R.. ఫీచర్లు, పర్ఫార్మెన్స్‌లో ఎవరు ఛాంపియన్?

Pulsar NS125 vs Xtreme 125R: భారత మార్కెట్‌లో 125సీసీ బైక్ సెగ్మెంట్ ఎల్లప్పుడూ బలంగా ఉంటుంది. దీనికి కారణం ఈ బైక్‌లు అందించే అద్భుతమైన మైలేజ్, లో మెయింటెనెన్స్ ఖర్చులు, స్టైలిష్ లుక్. ఈ సెగ్మెంట్‌లో యువతను ఉద్దేశించి లాంచ్ అయిన రెండు పవర్ఫుల్ బైక్‌లు - బజాజ్ పల్సర్ NS125, హీరో ఎక్స్‌ట్రీమ్ 125R - ఇప్పుడు హోరాహోరీగా పోటీ పడుతున్నాయి. ఒకటి స్పోర్టీ లుక్, టెక్నాలజీపై దృష్టి సారించగా మరొకటి స్మూత్ రైడింగ్, సరసమైన ధరను అందిస్తోంది.

ఈ రెండు బైక్‌లు 125సీసీ విభాగంలో ఉన్నప్పటికీ, వాటి డిజైన్ ఫిలాసఫీ పూర్తిగా భిన్నంగా ఉంది.

బజాజ్ పల్సర్ NS125: దీని డిజైన్ పూర్తి స్పోర్టీగా కనిపిస్తుంది. ఇది పెద్ద మోడల్స్ అయిన NS160, NS200 నుండి ప్రేరణ పొందింది. మస్క్యులర్ ఫ్యూయల్ ట్యాంక్, షార్ప్ గ్రాఫిక్స్, స్ట్రీట్‌ఫైటర్ హెడ్‌ల్యాంప్ రియల్ బోల్డ్ లుక్‌ను ఇస్తాయి. స్పీడ్, స్పోర్టీ రైడింగ్‌ను ఇష్టపడే యువతను ఈ డిజైన్ ఆకర్షిస్తుంది.

హీరో ఎక్స్‌ట్రీమ్ 125R: ఈ బైక్ లుక్ మరింత స్లీక్‌గా, మోడ్రన్‎గా ఉంటుంది. ఫ్రంట్ ప్రొఫైల్ కాంపాక్ట్‌గా ఉండి, ఎల్‌ఈడీ హెడ్‌లైట్లతో ప్రీమియం అప్పీల్‌ను ఇస్తుంది. సిటీ రైడ్స్‌కు అనుకూలమైన, అందమైన బైక్ కావాలనుకునేవారికి ఇది సరైన ఎంపిక.

ఫీచర్లు, టెక్నాలజీ

ఫీచర్ల విషయంలో పల్సర్ NS125 ఒక అడుగు ముందుందని చెప్పవచ్చు.

బజాజ్ పల్సర్ NS125: ఇది 125సీసీ సెగ్మెంట్‌లో మొదటిసారిగా మూడు ఏబీఎస్ మోడ్‌లను - రోడ్, రైన్, ఆఫ్-రోడ్ - అందిస్తోంది. కొత్త ఎల్‌సీడీ కన్సోల్‌లో టర్న్-బై-టర్న్ నావిగేషన్ వంటి స్మార్ట్ ఫీచర్లు లభిస్తాయి. మీరు బైక్‌లో ఎక్కువ టెక్నాలజీ, సేఫ్టీ ఫీచర్లు కావాలనుకుంటే పల్సర్ NS125 బెస్ట్ ఆప్షన్.

హీరో ఎక్స్‌ట్రీమ్ 125R: ఈ బైక్‌లో డిజిటల్-అనలాగ్ డిస్‌ప్లే, ఎల్‌ఈడీ లైట్లు, సింగిల్-ఛానల్ ఏబీఎస్ వంటి బేసిక్ ఫీచర్లు ఉన్నాయి. ఈ ఫీచర్లు ఉన్నా బజాజ్ అందించే అదనపు టెక్నాలజీ ముందు హీరో కొంచెం వెనుకబడింది.

పర్ఫార్మెన్స్

రెండు బైక్‌లలోనూ 125సీసీ ఇంజిన్ ఉన్నా, అవి ఇచ్చే రైడింగ్ అనుభవంలో తేడా ఉంది.

బజాజ్ పల్సర్ NS125: దీని 124.45సీసీ ఇంజిన్ 12 PS పవర్, 11 Nm టార్క్ ఉత్పత్తి చేస్తుంది. ఇది ఫ్యూయల్ ఇంజెక్షన్, 5-స్పీడ్ గేర్‌బాక్స్‌తో వస్తుంది. దీని ఇంజిన్ రిస్పాన్స్ ఇస్తుంది. బైక్ స్పోర్టీ రైడింగ్ ఫీలింగ్‌ను ఇస్తుంది. పవర్, రైడ్ ఎంగేజ్‌మెంట్ కావాలంటే పల్సర్ సరైనది.

హీరో ఎక్స్‌ట్రీమ్ 125R: దీని 125సీసీ ఇంజిన్ సుమారు 11.4 PS పవర్, 10.5 Nm టార్క్ ఇస్తుంది. దీని ఇంజిన్ చాలా స్మూత్‌గా, రిఫైన్‌గా ఉంది, ఇది సిటీ రోడ్లపై రోజువారీ ప్రయాణాలకు చాలా సౌకర్యవంతంగా ఉంటుంది. మైలేజ్, సౌకర్యవంతమైన రైడ్ ముఖ్యమనుకుంటే ఎక్స్‌ట్రీమ్ 125R పర్ఫెక్ట్.

ధర, వాల్యూ ఫర్ మనీ

ధర: బజాజ్ పల్సర్ NS125 ధర దాదాపు రూ.1.06 లక్షలు (ఎక్స్-షోరూమ్). హీరో ఎక్స్‌ట్రీమ్ 125R ధర సుమారు రూ.1.02 లక్షలు (ఎక్స్-షోరూమ్) నుండి ప్రారంభమవుతుంది.

మీ బడ్జెట్ కొద్దిగా ఎక్కువగా ఉండి ఎక్కువ ఫీచర్లు, టెక్నాలజీ, స్పోర్టీ లుక్‌ను కోరుకుంటే, బజాజ్ పల్సర్ NS125 మంచి డీల్. కానీ తక్కువ బడ్జెట్‌లో, మంచి మైలేజ్, స్మూత్, సౌకర్యవంతమైన రైడ్ కావాలనుకుంటే హీరో ఎక్స్‌ట్రీమ్ 125R బెస్ట్ ఆప్షన్.