Bharat NCAP Vs Global NCAP: భారత్ NCAP వర్సెస్ గ్లోబల్ NCAP.. మీ కారు సేఫ్టీ రేటింగ్ వెనుక ఉన్న అసలు సీక్రెట్ ఇదీ

Bharat NCAP Vs Global NCAP: ఒకప్పుడు భారతదేశంలో కస్టమర్లు కొత్త కారు కొనాలంటే కేవలం దాని లుక్స్, మైలేజ్, ఫీచర్లు, ధరను మాత్రమే చూసేవారు. కానీ ఇప్పుడు కాలం మారింది. ప్రస్తుత రోజుల్లో రోడ్డు ప్రమాదాలు పెరుగుతున్న నేపథ్యంలో, వాహనదారులు అన్నింటికంటే ఎక్కువగా కారు సేఫ్టీకి అత్యధిక ప్రాధాన్యత ఇస్తున్నారు. ఈ కారణంగానే ఆటోమొబైల్ మార్కెట్లో క్రాష్ టెస్ట్, సేఫ్టీ రేటింగ్స్ అనే పదాలు బాగా ఫేమస్ అయ్యాయి. ప్రస్తుతం భారత్‌లో రెండు రకాల టెస్టింగ్ విధానాలు ఎక్కువగా చర్చల్లో ఉన్నాయి. ఒకటి భారత్ NCA కాగా, మరొకటి గ్లోబల్ NCAP. ఈ రెండూ కార్ల భద్రతనే పరీక్షించినప్పటికీ, వీటి మధ్య కొన్ని కీలకమైన తేడాలు ఉన్నాయి.

భారత్ NCAP అంటే ఏమిటి?

భారత ప్రభుత్వం ప్రతిష్టాత్మకంగా ప్రారంభించిన స్వదేశీ కార్ సేఫ్టీ రేటింగ్ సిస్టమే ఈ భారత్ NCAP(New Car Assessment Programme). భారతీయ రహదారుల పరిస్థితులు, ఇక్కడి ట్రాఫిక్, ప్రమాదాల సరళిని దృష్టిలో ఉంచుకుని మన దేశంలో తయారయ్యే లేదా ఇక్కడ విక్రయించే కార్ల రక్షణ సామర్థ్యాన్ని పరీక్షించడానికి దీనిని రూపొందించారు. ఈ క్రాష్ టెస్ట్ సమయంలో కారు బాడీ స్ట్రక్చర్ బలం, ఎయిర్‌బ్యాగ్‌ల పనితీరు, సీట్ బెల్ట్ అలర్ట్ సిస్టమ్స్, ప్రమాదం జరిగినప్పుడు లోపల ఉండే ప్రయాణికులకు ఎంతవరకు రక్షణ లభిస్తుందనే అంశాలను క్షుణ్ణంగా పరిశీలిస్తారు.

గ్లోబల్ NCAP అంటే ఏమిటి?

మరోవైపు, గ్లోబల్ NCAP అనేది ఒక స్వతంత్ర అంతర్జాతీయ సంస్థ. ఇది ప్రపంచంలోని వివిధ దేశాలలో విక్రయించే కార్ల భద్రతను పరీక్షించి రేటింగ్స్ ఇస్తూ ఉంటుంది. మన దేశంలో భారత్ NCAP రాకముందు వరకు, చాలా ఏళ్లుగా భారతీయ కార్లను లండన్ లేదా ఇతర దేశాల్లోని లాబొరేటరీలలో క్రాష్ టెస్ట్ చేసి రేటింగ్స్ ఇచ్చేది ఈ సంస్థే. ప్రపంచవ్యాప్తంగా ఉన్న అన్ని కార్లను ఒకే విధమైన అంతర్జాతీయ ప్రమాణాలతో పరీక్షించడం దీని ముఖ్య ఉద్దేశ్యం. దీనివల్ల వివిధ దేశాల కార్ల భద్రతను ఒకదానితో ఒకటి సులభంగా పోల్చవచ్చు.

రెండు రేటింగ్స్ మధ్య ప్రధాన వ్యత్యాసాలు

ఈ రెండింటి మధ్య ఉన్న అతిపెద్ద వ్యత్యాసం ఏమిటంటే.. భారత్ NCAP పూర్తిగా మన దేశీయ చట్టాలు, భారత ప్రభుత్వ నిబంధనల ప్రకారం స్థానిక పరిస్థితులను బట్టి పనిచేస్తుంది. ఇందులో ప్రభుత్వ భాగస్వామ్యం ఉంటుంది. కానీ గ్లోబల్ NCAP అనేది ఎలాంటి ప్రభుత్వ జోక్యం లేని ఒక ప్రైవేట్ స్వతంత్ర సంస్థ. అలాగే, భారత్ NCAP మన దేశ రోడ్ల వేగం, ట్రాఫిక్ నియమాలను బట్టి క్రాష్ టెస్ట్ వేగాన్ని డిసైడ్ చేస్తుంది. గ్లోబల్ NCAP మాత్రం ప్రపంచంలోని అన్ని దేశాల కార్లకు ఒకే రకమైన అంతర్జాతీయ నిబంధనలను మరియు ఒకే వేగాన్ని వర్తింపజేస్తుంది.

సేఫ్టీ రేటింగ్ ఇచ్చే పాయింట్ల గణితం

ఈ టెస్టింగ్ విధానంలో కారును వేర్వేరు కోణాల్లో (ముందు నుంచి, పక్క నుంచి) గట్టిగా ఢీకొట్టి ప్రమాదాన్ని సృష్టిస్తారు. ఆ సమయంలో కారు లోపల ఉంచిన డమ్మీ బొమ్మలకు ఎంత దెబ్బ తగిలిందో స్కోర్ లెక్కిస్తారు. ఈ స్కోర్ ఆధారంగా కారుకు 1 నుంచి 5 స్టార్ల వరకు రేటింగ్ ఇస్తారు. ఎక్కువ స్టార్లు వస్తే ఆ కారు ప్రమాదాల్లో అంత ఎక్కువ రక్షణ ఇస్తుందని అర్థం. ఇందులో పెద్దల రక్షణ, పిల్లల రక్షణకు విడివిడిగా పాయింట్లు ఇస్తారు.

భారత్ NCAP అనేది మన దేశ అవసరాల కోసం పుట్టుకొచ్చిన సరికొత్త లోకల్ సేఫ్టీ సిస్టమ్. గ్లోబల్ NCAP అనేది ప్రపంచవ్యాప్తంగా గుర్తింపు పొందిన పాత అంతర్జాతీయ సిస్టమ్. ఈ రెండింటి ల్యాబ్‌లు వేరైనా, నిబంధనలు కొద్దిగా మారినా.. వీటి అంతిమ లక్ష్యం మాత్రం ఒక్కటే. వినియోగదారులకు ప్రాణాలు కాపాడే సురక్షితమైన కార్లను ఎంచుకోవడంలో సహాయపడటం. కాబట్టి, భవిష్యత్తులో మీరు ఏ కొత్త కారు కొనాలన్నా కేవలం మైలేజ్ మాత్రమే కాకుండా, ఈ NCAP క్రాష్ టెస్ట్ స్టార్ రేటింగ్‌ను కూడా ఖచ్చితంగా చెక్ చేసుకోవడం మంచిది.