BMW : భారత్ పై బిఎమ్డబ్ల్యూ దండయాత్ర.. ఒక్క ఏడాదిలో 27 లాంచ్లు.. లగ్జరీ మార్కెట్ షేక్
ఒక్క ఏడాదిలో 27 లాంచ్లు.. లగ్జరీ మార్కెట్ షేక్
BMW : జర్మనీకి చెందిన ప్రముఖ లగ్జరీ కార్ల తయారీ సంస్థ బిఎమ్డబ్ల్యూ భారత మార్కెట్ మీద దండయాత్రకు సిద్ధమైంది. 2026 ఏడాదిని తమకు అనుకూలంగా మార్చుకునేందుకు ఏకంగా 27 కొత్త మోడళ్లను భారత్లో విడుదల చేయబోతున్నట్లు ప్రకటించి ఆటోమొబైల్ రంగాన్ని ఆశ్చర్యపరిచింది. బిఎమ్డబ్ల్యూ ఇండియా ప్రెసిడెంట్ హర్దీప్ బ్రార్ ఈ భారీ ప్రణాళికను వెల్లడిస్తూ, కేవలం కార్లే కాకుండా బైకులు, ఎలక్ట్రిక్ వాహనాలతో మార్కెట్ను ముంచెత్తబోతున్నట్లు పేర్కొన్నారు. ఈ ఏడాది లగ్జరీ కార్ల ప్రియులకు పండగే అని చెప్పాలి.
బిఎమ్డబ్ల్యూ గ్రూప్ తన అనుబంధ సంస్థలైన MINI, BMW మోటార్రాడ్లతో కలిపి ఈ ఏడాది మొత్తం 27 ఉత్పత్తులను భారతీయుల ముందుకు తీసుకురానుంది. ఇందులో ఇప్పటికే 4 ఉత్పత్తులు మార్కెట్లోకి అడుగుపెట్టగా, మిగిలిన 23 మోడళ్లు రానున్న నెలల్లో వరుస కట్టనున్నాయి. ముఖ్యంగా ఈ ఏడాది రెండో త్రైమాసికంలోనే (Q2) 8 కొత్త లాంచ్లు ఉండబోతున్నాయని కంపెనీ స్పష్టం చేసింది. ఇందులో కేవలం ఫేస్లిఫ్ట్ వెర్షన్లే కాకుండా, 6 పూర్తిగా సరికొత్త కార్లు ఉండటం విశేషం.
భవిష్యత్తు అంతా ఎలక్ట్రిక్ వాహనాలదే అని నమ్ముతున్న బిఎమ్డబ్ల్యూ, తన పోర్ట్ఫోలియోలో ఈవీలకు పెద్దపీట వేస్తోంది. త్వరలోనే మిని ఏస్మ్యాన్ ఈవీ, అప్డేటెడ్ బిఎమ్డబ్ల్యూ iX వంటి మోడళ్లను ఆశించవచ్చు. ఇప్పటికే లగ్జరీ ఈవీ సెగ్మెంట్లో 70 శాతం మార్కెట్ వాటాతో బిఎమ్డబ్ల్యూ అగ్రస్థానంలో ఉంది. ఈ ఏడాది కూడా అదే ఊపును కొనసాగిస్తూ మరిన్ని ఎలక్ట్రిక్ ఎంపికలను వినియోగదారులకు అందుబాటులోకి తేనుంది.
త్వరలో లాంచ్ కాబోతున్న వాటిలో బిఎమ్డబ్ల్యూ F 450 GS బైక్ (ఏప్రిల్ 23న), బిఎమ్డబ్ల్యూ i5 LWB (లాంగ్ వీల్బేస్), బిఎమ్డబ్ల్యూ iX3 వంటి పవర్ఫుల్ మోడళ్లు ఉన్నాయి. ఇప్పటికే విడుదలైన బిఎమ్డబ్ల్యూ M2 CS, బిఎమ్డబ్ల్యూ X3 30, బిఎమ్డబ్ల్యూ M 1000 R బైక్, మినీ కూపర్ ఎస్ విక్టరీ ఎడిషన్లకు కస్టమర్ల నుంచి భారీ స్పందన లభిస్తోంది. కేవలం కార్లే కాకుండా స్పోర్ట్స్ బైకుల విభాగంలో కూడా మోటార్రాడ్ తన పట్టును నిరూపించుకుంటోంది.
ఈ ఏడాది తొలి త్రైమాసికంలో (Q1) బిఎమ్డబ్ల్యూ ఇండియా అద్భుతమైన ఫలితాలను సాధించింది. మొత్తం 4,567 యూనిట్ల విక్రయాలతో గతేడాది కంటే 17 శాతం వృద్ధిని నమోదు చేసింది. ఇందులో ఎస్యూవీల (SUV) అమ్మకాలు 38 శాతం పెరగడం గమనార్హం. అలాగే భారతీయులు ఎక్కువగా ఇష్టపడే లాంగ్-వీల్బేస్ మోడళ్ల విక్రయాలు కూడా 23 శాతం పెరిగాయి. మొత్తానికి బిఎమ్డబ్ల్యూ తన వైవిధ్యమైన ఉత్పత్తులతో భారతీయ లగ్జరీ మార్కెట్లో తిరుగులేని శక్తిగా ఎదుగుతోంది.
