Fuel Saving Tips : మీ కారు పెట్రోల్ తాగేస్తుందా? మైలేజీ పెంచడానికి ఈ 5 సింపుల్ టిప్స్ పాటించండి

Fuel Saving Tips : పెట్రోల్ ధరలు చుక్కలు చూపిస్తున్న ఈ రోజుల్లో కారు బయటకు తీయాలంటేనే సామాన్యుడు భయపడే పరిస్థితి వచ్చింది. ఒకప్పుడు లీటర్ పెట్రోల్‌తో ఊరంతా చుట్టేసే కార్లు, ఇప్పుడు పది కిలోమీటర్లు కూడా సరిగ్గా రావడం లేదని చాలామంది వాపోతున్నారు. అయితే మైలేజీ తగ్గడానికి కారు పాతబడటం ఒక్కటే కారణం కాదు.. మనం చేసే కొన్ని చిన్న చిన్న పొరపాట్లు కూడా మీ జేబుకు చిల్లు పెడుతున్నాయి. మీ కారు పెట్రోల్ తాగేయకుండా, మైలేజీని పెంచడానికి పాటించాల్సిన ఆ 5 అద్భుతమైన చిట్కాలు చూద్దాం.

1. టైర్లలో గాలి - మైలేజీకి పునాది

చాలామంది టైర్లలో గాలిని సరిగ్గా పట్టించుకోరు. టైర్లలో గాలి తక్కువగా ఉంటే, రోడ్డుపై కారు ముందుకు సాగడానికి ఇంజిన్ చాలా కష్టపడాల్సి వస్తుంది. దీనివల్ల పెట్రోల్ విపరీతంగా ఖర్చవుతుంది. కాబట్టి వారానికి ఒకసారైనా టైర్ల ప్రెజర్ చెక్ చేయించుకోండి. కంపెనీ సూచించిన మేర గాలి ఉంటే మైలేజీ పెరగడమే కాకుండా టైర్ల జీవితకాలం కూడా పెరుగుతుంది.

2. టైమ్ కి సర్వీసింగ్ - కారు ఆరోగ్యం

కారు సర్వీసింగ్‌ను వాయిదా వేయడం అంటే మీ జేబుకు మీరే కన్నం పెట్టుకోవడమే. ఇంజిన్ ఆయిల్, ఎయిర్ ఫిల్టర్లు గలీజుగా ఉంటే ఇంజిన్ స్మూత్‌గా నడవదు. ముఖ్యంగా ఎయిర్ ఫిల్టర్ గాలిని సరిగ్గా పంపకపోతే, పెట్రోల్ ఎక్కువగా మండి ఇంజిన్ పై భారం పడుతుంది. అందుకే రెగ్యులర్ సర్వీసింగ్ చేయిస్తే కారు తక్కువ పెట్రోల్‌తో ఎక్కువ దూరం వెళ్తుంది.

3. క్లచ్, గేర్ల వాడకంలో మెలకువలు

చాలామందికి డ్రైవింగ్ చేసేటప్పుడు క్లచ్ మీద కాలు పెట్టి నడిపే అలవాటు ఉంటుంది. దీనివల్ల ఇంజిన్ పవర్ వృధా అవ్వడమే కాకుండా మైలేజీ పడిపోతుంది. అలాగే, కారు స్పీడ్‌కు తగ్గట్టుగా సరైన సమయంలో గేర్లు మార్చాలి. లో గేర్‌లో ఎక్కువ స్పీడ్ వెళ్లడం లేదా హై గేర్‌లో తక్కువ స్పీడ్ వెళ్లడం వల్ల పెట్రోల్ త్వరగా అయిపోతుంది. స్మూత్ డ్రైవింగ్ ఎప్పుడూ మైలేజీని పెంచుతుంది.

4. అనవసరమైన బరువు వద్దు

మీ కారు డిక్కీలో అవసరం లేని సామాన్లు ఉన్నాయా? అయితే వెంటనే తీసేయండి. కారు బరువు పెరిగే కొద్దీ ఇంజిన్ మీద లోడ్ పెరుగుతుంది. తక్కువ బరువు ఉంటే కారు తేలికగా ముందుకు వెళ్తుంది, తద్వారా ఫ్యూయల్ సేవ్ అవుతుంది. కేవలం ప్రయాణానికి అవసరమైన వస్తువులు మాత్రమే కారులో ఉంచుకోవడం మంచిది.

5. ట్రాఫిక్ లో ఇంజిన్ ఆపేయండి

ట్రాఫిక్ సిగ్నల్స్ దగ్గర 30 సెకన్ల కంటే ఎక్కువ సమయం ఆగాల్సి వస్తే వెంటనే ఇంజిన్ ఆఫ్ చేయండి. ఖాళీగా ఇంజిన్ ఆన్ చేసి ఉంచడం వల్ల మీ కారు మైలేజీ సున్నా కింద లెక్క. ఇప్పుడు వచ్చే కొత్త కార్లలో ఆటో స్టార్ట్-స్టాప్ ఫీచర్ ఉన్నప్పటికీ, పాత కార్లు ఉన్నవారు మ్యాన్యువల్‌గా ఆఫ్ చేయడం ద్వారా రోజూ మంచి పెట్రోల్‌ను ఆదా చేయవచ్చు.