Car Mileage: కారు మైలేజ్ తగ్గిపోయిందా? మెకానిక్ వద్దకు వెళ్లేముందు ఈ 6 విషయాలు చెక్ చేయండి
చెక్ చేయండి
Car Mileage: మనం వాడే కార్ల నుంచి ఎప్పుడూ ఒకేలాంటి మైలేజ్ వస్తుందని చెప్పలేం. కొన్నిసార్లు ఎలాంటి పెద్ద కారణం లేకుండానే కారు అకస్మాత్తుగా ఎక్కువ పెట్రోల్ లేదా డీజిల్ వినియోగించడం ప్రారంభిస్తుంది. అలాంటప్పుడు వెంటనే కంగారుపడి మెకానిక్ షెడ్డుకు పరుగులు తీయాల్సిన అవసరం లేదు. చాలాసార్లు చిన్న చిన్న సాంకేతిక లోపాలు లేదా మన దైనందిన డ్రైవింగ్ అలవాట్ల వల్ల కూడా కారు మైలేజ్ పడిపోతుంది. అలాంటి ముఖ్యమైన ఆరు అంశాలను ముందుగా పరిశీలించడం ద్వారా అనవసరమైన ఖర్చులను తగ్గించుకోవచ్చు.
1. టైర్లలో గాలి పీడనం తక్కువగా ఉండటం
కారు టైర్లలో గాలి సరిగ్గా లేకపోతే ఇంజిన్ పై తీవ్రమైన భారం పడుతుంది. రోడ్డుపై ముందుకు కదలడానికి ఇంజిన్ ఎక్కువ శక్తిని ఉపయోగించాల్సి వస్తుంది, దీనివల్ల ఇంధనం వాడకం విపరీతంగా పెరుగుతుంది. స్టీరింగ్ బరువెక్కినట్లు అనిపించినా లేదా ఎక్సిలరేటర్ వదిలేసినా కారు ముందుకు సాగకపోయినా టైర్లలో గాలి తగ్గడమే కారణం కావచ్చు. కాబట్టి ఎల్లప్పుడూ కంపెనీ సిఫార్సు చేసిన పీడన స్థాయిలోనే టైర్లలో గాలి ఉండేలా చూసుకోవాలి.
2. మురికి పట్టిన ఎయిర్ ఫిల్టర్
ఇంజన్ సక్రమంగా పనిచేయడానికి స్వచ్ఛమైన గాలి చాలా అవసరం. ఎయిర్ ఫిల్టర్ గాలిలోని ధూళిని, కణాలను అడ్డుకుంటుంది. కాలక్రమేణా ఈ ఫిల్టర్‌లో చెత్త పేరుకుపోయి గాలి ప్రసరణ నిలిచిపోతుంది. దీనివల్ల ఇంజిన్ పనితీరు మందగించి, పెట్రోల్ లేదా డీజిల్ వినియోగం ఎక్కువవుతుంది. కారులో ఆశించిన వేగం రాకపోతే ముందుగా ఎయిర్ ఫిల్టర్‌ను పరిశీలించాలి.
3. స్పార్క్ ప్లగ్‌ల లోపాలు
పెట్రోల్ కార్లలో ఇంధనాన్ని మండించడానికి స్పార్క్ ప్లగ్‌లు కీలక పాత్ర పోషిస్తాయి. కాలక్రమేణా ఇవి అరిగిపోవడం లేదా మురికి పట్టడం వల్ల ఇంధనం పూర్తిగా దహనం కాదు. దీనివల్ల కారు స్టార్ట్ కావడంలో ఇబ్బంది కలగడమే కాకుండా ఇంజిన్ వైబ్రేషన్స్ వచ్చి మైలేజ్ భారీగా తగ్గిపోతుంది. సర్వీసింగ్ మాన్యువల్ ప్రకారం వీటిని ఎప్పటికప్పుడు మార్చడం మంచిది.
4. బ్రేకులు జామ్ కావడం
మనం బ్రేక్ పెడల్ వదిలినప్పటికీ కొన్నిసార్లు బ్రేకులు పూర్తిగా ఫ్రీ కావు. దీనివల్ల కారు చక్రాలపై నిరంతరం ఒత్తిడి ఉండి, ఇంజిన్ ఎక్కువ కష్టపడాల్సి వస్తుంది. కారు బరువుగా అనిపించడం, ఒక వైపు లాగడం లేదా కారు ఆపిన తర్వాత కాలిపోయిన వాసన రావడం వంటి లక్షణాలు కనిపిస్తే వెంటనే బ్రేక్ సిస్టమ్‌ను చెక్ చేయించుకోవాలి.
5. ఇంజిన్ ఉష్ణోగ్రత, కూలింగ్ సమస్యలు
ఇంజన్ ఎప్పుడూ సరైన ఉష్ణోగ్రత వద్ద పనిచేయాలి. థర్మోస్టాట్ లేదా కూలెంట్ టెంపరేచర్ సెన్సార్‌లో లోపం తలెత్తితే ఇంజిన్ త్వరగా వేడెక్కదు, దీనివల్ల ఇంధన దహన ప్రక్రియ దెబ్బతింటుంది. ఇది కూడా మైలేజ్ పడిపోవడానికి ఒక ప్రధాన కారణం కావచ్చు.
6. ట్రాఫిక్, ఏసీ వాడకం, చిన్న ప్రయాణాలు
ఒక్కోసారి కారులో ఎలాంటి సాంకేతిక సమస్య లేకపోయినా మన వాడే విధానం వల్ల మైలేజ్ తగ్గుతుంది. కారును ఆపి ఎప్పుడూ ఏసీ ఆన్ చేసి ఉంచడం, రద్దీగా ఉండే ట్రాఫిక్‌లో పదే పదే బ్రేక్ మరియు క్లచ్ వాడుతూ డ్రైవ్ చేయడం వల్ల ఇంధన ఖర్చు పెరుగుతుంది. అలాగే తక్కువ దూరాల కోసం పదే పదే కారు వాడితే ఇంజిన్ సరైన ఉష్ణోగ్రతకు చేరుకోక ఇంధనం వృథా అవుతుంది.
