CNG vs EV: సీఎన్జీ వర్సెస్ ఈవీ కార్లు.. పర్యావరణానికి ఏది ఎక్కువ హాని చేస్తుంది?

CNG vs EV: భారతదేశంలో రోజురోజుకు పెరుగుతున్న వాయు కాలుష్యాన్ని అరికట్టేందుకు ప్రభుత్వం ఎలక్ట్రిక్ వాహనాలతో పాటు సీఎన్జీ కార్లను కూడా పెద్ద ఎత్తున ప్రోత్సహిస్తోంది. దీంతో రోడ్లపై ఈవీలు, సీఎన్జీ కార్ల సంఖ్య భారీగా పెరుగుతోంది. సాధారణంగా ఎలక్ట్రిక్ కార్లు నడుపుతున్నప్పుడు ఎలాంటి పొగ వెలువడదు కాబట్టి అవి పూర్తిగా పర్యావరణ హితమైనవని చాలామంది భావిస్తారు. అయితే ప్రముఖ సంస్థ ది ఎనర్జీ అండ్ రిసోర్సెస్ ఇన్‌స్టిట్యూట్(TERI) తాజాగా వెలువరించిన ఒక అధ్యయనం ఈ విషయంలో సరికొత్త కోణాన్ని వెలుగులోకి తెచ్చింది. కేవలం కారు నడిచేటప్పుడు వచ్చే పొగను మాత్రమే కాకుండా, ఇంధనం లేదా విద్యుత్ తయారీ నుంచి కారు వాడకం వరకు జరిగే ప్రక్రియను పరిశీలిస్తే ఆసక్తికరమైన విషయాలు తెలిశాయి.

వెల్-టు-వీల్ విశ్లేషణ, వాస్తవ పరిస్థితులు

TERI నిర్వహించిన ఈ స్టడీ వెల్-టు-వీల్ విశ్లేషణ ఆధారంగా రూపొందించబడింది. ఇందులో ఇంధనం లేదా విద్యుత్ ఉత్పత్తి కావడం మొదలుకుని, వాహనం రోడ్డుపై పరుగెత్తే వరకు జరిగే మొత్తం ప్రక్రియలో ఎంత కార్బన్ ఉద్గారం విడుదలవుతుందో లెక్కగట్టారు. ఎలక్ట్రిక్ కార్ల అతిపెద్ద ప్లస్ పాయింట్ ఏమిటంటే ఇవి ప్రయాణించే సమయంలో ఎగ్జాస్ట్ పైపు నుంచి ఎలాంటి పొగ వదలవు. కానీ ఆ ఈవీలను ఛార్జ్ చేయడానికి ఉపయోగించే విద్యుత్‌‌లో సింహభాగం ఇప్పటికీ బొగ్గుతో నడిచే థర్మల్ పవర్ ప్లాంట్ల నుంచే వస్తోంది. భారతదేశంలోని పవర్ గ్రిడ్ పూర్తిగా పునరుత్పాదక ఇంధనాలపై ఆధారపడి లేకపోవడం వల్ల విద్యుత్ ఉత్పత్తి దశలోనే భారీగా కాలుష్యం వెలువడుతోంది.

ఈవీల కంటే సీఎన్జీ కార్లు ఎందుకు మెరుగ్గా ఉన్నాయి?

పెట్రోల్, డీజిల్‌తో పోలిస్తే సీఎన్జీ కూడా ఒక శిలాజ ఇంధనమే అయినప్పటికీ, దీని వాడకం వల్ల కాలుష్యం చాలా తక్కువగా ఉంటుంది. సీఎన్జీని ఉత్పత్తి చేయడం, దానిని కారు వరకు చేరవేయడం, చివరికి వినియోగించడం వంటి అన్ని దశలను పరిగణలోకి తీసుకుని ఎలక్ట్రిక్ వాహనాలతో పోల్చి చూశారు. భారతదేశ ప్రస్తుత విద్యుత్ వ్యవస్థను బట్టి చూస్తే, ఈవీల ఛార్జింగ్ కోసం గ్రిడ్ నుంచి వాడుతున్న కరెంట్ వల్ల పరోక్షంగా ఎక్కువ ఉద్గారాలు వెలువడుతున్నాయి. ఈ కారణంగా ప్రస్తుతానికి సీఎన్జీ వాహనాలు పర్యావరణంపై తక్కువ ప్రభావాన్ని చూపుతున్నట్లు టెరీ నివేదిక స్పష్టం చేసింది.

ఎలక్ట్రిక్ కార్ల బ్యాటరీల వల్ల ఎదురవుతున్న సవాళ్లు

ఎలక్ట్రిక్ కార్లలో అమర్చే భారీ సైజు బ్యాటరీలు కూడా పర్యావరణానికి మరో పెద్ద సవాలుగా మారుతున్నాయి. ఈ బ్యాటరీల తయారీకి లిథియం, కోబాల్ట్, నికెల్ వంటి ఖనిజాలు అవసరం అవుతాయి. భూమి నుంచి వీటిని తవ్వి తీయడం, బ్యాటరీలుగా మలచడానికి అత్యధిక మొత్తంలో శక్తి ఖర్చవుతుంది. అంతేకాకుండా కాలం చెల్లిన ఎలక్ట్రిక్ కార్ల బ్యాటరీలను సురక్షితంగా రీసైక్లింగ్ చేయడం ప్రస్తుతానికి పెద్ద సమస్యగా మారింది. సరైన పద్ధతిలో రీసైకిల్ చేయకపోతే ఈ బ్యాటరీలు పర్యావరణానికి తీవ్రమైన ముప్పును తెచ్చిపెడతాయి. సీఎన్జీ కార్లలో ఇటువంటి భారీ బ్యాటరీలు ఉండవు కాబట్టి ఈ రకమైన సమస్యలకు ఆస్కారం ఉండదు.

భవిష్యత్తులో ఈవీల పాత్ర ఎలా ఉండబోతోంది?

దీనిని బట్టి ఎలక్ట్రిక్ కార్లు పర్యావరణానికి పూర్తిగా హానికరమని అర్థం చేసుకోనవసరం లేదు. ఎలక్ట్రిక్ వాహనాలు ఎంతవరకు పర్యావరణ హితంగా ఉంటాయనేది కేవలం ఆ కారుపైనే కాకుండా, దానిని ఛార్జ్ చేసే విద్యుత్ ఎక్కడి నుంచి వస్తోందనే దానిపై ఆధారపడి ఉంటుంది. రానున్న రోజుల్లో సౌర శక్తి, పవన శక్తి వంటి స్వచ్ఛమైన ఇంధన వనరుల ద్వారా విద్యుత్ ఉత్పత్తి పెరిగితే అప్పుడు ఈవీల వల్ల జరిగే కాలుష్యం చాలా వరకు తగ్గిపోతుంది. ప్రస్తుతానికి మాత్రం స్వచ్ఛమైన ఇంధన వనరుల వైపు పూర్తిగా మారేంత వరకు, సీఎన్జీ, సీఎన్జీ-హైబ్రిడ్ టెక్నాలజీలు ఎలక్ట్రిక్ మొబిలిటీ వైపు అడుగులు వేయడానికి ఒక చక్కని మధ్యంతర ప్రత్యామ్నాయంగా ఉపయోగపడతాయని నిపుణులు అభిప్రాయపడుతున్నారు.