Car Buying Tips: దీపావళికి కారు కొంటున్నారా? ఈ మోసాల నుంచి బయటపడకపోతే వేలల్లో నష్టం ఖాయం!
బయటపడకపోతే వేలల్లో నష్టం ఖాయం!
Car Buying Tips: దీపావళి, ధంతేరాస్ పండుగల సీజన్ వచ్చిందంటే చాలు ఆటోమొబైల్ మార్కెట్ అంతా సరికొత్త ఆఫర్లతో కళకళలాడుతుంది. కార్ల కంపెనీలు, డీలర్లు కస్టమర్లను ఆకర్షించడానికి భారీ డిస్కౌంట్లు, ఎక్స్ఛేంజ్ బోనస్‌లు, ఫ్రీ యాక్ససరీలంటూ పెద్ద ఎత్తున ప్రకటనలు ఇస్తుంటారు. బయటకు ఎంతో ఆకర్షణీయంగా కనిపించే ఈ ఆఫర్ల వెనుక కొన్నిసార్లు కస్టమర్లను బోల్తా కొట్టించే నిబంధనలు దాగి ఉంటాయి. కొనుగోలు ఉత్సాహంలో చిన్న అజాగ్రత్త ప్రదర్శించినా వేల రూపాయల నష్టం చవిచూడాల్సి వస్తుంది. కాబట్టి పండుగ షాపింగ్‌కు వెళ్లే ముందు కొన్ని కీలక విషయాలపై పూర్తి అవగాహన కలిగి ఉండటం చాలా ముఖ్యం.
పాత స్టాక్ అంటగట్టే ప్రమాదం
పండుగ రద్దీని ఆసరా చేసుకుని డీలర్లు తమ వద్ద పేరుకుపోయిన పాత స్టాక్‌ను విక్రయించడానికి ప్రయత్నిస్తుంటారు. గతేడాది తయారైన కార్లపై భారీ తగ్గింపులు ప్రకటించి అమాయక కస్టమర్లను ఆకర్షిస్తారు. కేవలం వేల రూపాయల డిస్కౌంట్ వస్తోందన్న ఆశతో పాత మోడల్ కారును కొనుగోలు చేయడం భవిష్యత్తులో రీసేల్ వాల్యూ పరంగా భారీ నష్టాన్ని తెచ్చిపెడుతుంది. అందుకే కారు బుక్ చేసుకునే ముందే దాని మ్యానుఫ్యాక్చరింగ్ నెల, సంవత్సరాన్ని కచ్చితంగా పరిశీలించాలి. కొత్త మోడల్ ధరతో పాత స్టాక్ ధరను సరిగ్గా బేరీజు వేసుకున్న తర్వాతే తుది నిర్ణయం తీసుకోవాలి.
ఫ్రీ యాక్ససరీల పేరుతో బిల్లు పెంచే జిమ్మిక్కులు
షోరూమ్‌లలో సీట్ కవర్లు, ఫ్లోర్ మ్యాట్లు, బాడీ కవర్లు, మడ్ ఫ్లాప్‌లు పూర్తిగా ఉచితంగా ఇస్తున్నామని డీలర్లు నమ్మిస్తుంటారు. కానీ క్లోజింగ్ బిల్లు చేతికి వచ్చేసరికి ఆయా వస్తువుల ధరలను వేరే రకమైన ఛార్జీల రూపంలో ఇన్‌వాయిస్‌లో కలిపేస్తుంటారు. ఏయే వస్తువులు ఖచ్చితంగా ఫ్రీగా ఇస్తున్నారో డెలివరీకి ముందే స్పష్టంగా లిఖితపూర్వకంగా రాబట్టాలి. మనకు అసలు అవసరం లేని యాక్ససరీలను బలవంతంగా అంటగడుతుంటే, వాటిని వెంటనే బిల్లు నుంచి తొలగించమని గట్టిగా డిమాండ్ చేయాలి.
ఇన్సూరెన్స్, ఎక్స్ఛేంజ్ బోనస్ విషయంలో తస్మాత్ జాగ్రత్త
షోరూమ్ ద్వారా బలవంతంగా ఇప్పించే ఇన్సూరెన్స్ పాలసీయే తీసుకోవాలనే రూల్ ఏమీ లేదు. బయట మార్కెట్లో లభించే ఇతర కంపెనీల పాలసీలతో ప్రీమియం ధరలను పోల్చి చూసి తక్కువ ఖర్చుతో మెరుగైన కవరేజ్ పొందవచ్చు. ఐడీవీ, జీరో డిప్రిసియేషన్, యాడ్-ఆన్ కవర్ల వివరాలను క్షుణ్ణంగా అర్థం చేసుకోవాలి. ఇక పాత కారును మార్చేటప్పుడు ఇచ్చే ఎక్స్ఛేంజ్ బోనస్ అన్ని కార్లకు వర్తించదు. వాహన కండిషన్ బట్టి బోనస్ మారుతుంది కాబట్టి, బయట మార్కెట్లో మీ పాత కారుకు ఎంత రేటు వస్తుందో ముందే తెలుసుకోవడం మంచిది.
డెలివరీకి ముందు పీడీఐ తనిఖీ
పండుగ హడావుడిలో చాలామంది షోరూమ్ సిబ్బంది తొందరపెట్టడంతో కారును సరిగా తనిఖీ చేయకుండానే ఇంటికి తీసుకెళ్లిపోతుంటారు. ఇలా చేయడం చాలా పెద్ద పొరపాటు. షోరూమ్ నుంచి కారును బయటకు తీసే ముందే పీడీఐ తప్పనిసరిగా నిర్వహించాలి. కారు బాడీ పెయింట్, టైర్లు, హెడ్‌లైట్లు, ఇంజిన్ పనితీరు, ఓడోమీటర్ రీడింగ్‌ను క్షుణ్ణంగా పరిశీలించాలి. ఫామ్‌లోని ఇంజిన్ నంబర్, ఛాసిస్ నంబర్ కారు మీద ఉన్న నంబర్లతో సరిపోలుతున్నాయో లేదో స్వయంగా చెక్ చేసుకోవాలి.
ఈఎంఐ, బుకింగ్ కండిషన్లపై ముందే స్పష్టత ఉండాలి
తక్కువ డౌన్ పేమెంట్, చిన్న చిన్న ఈఎంఐ ఆకర్షణకు లోనై ఆలోచించకుండా లోన్ పేపర్‌పై సంతకాలు పెట్టకండి. ఈఎంఐ తగ్గుతుందనే ఆశతో లోన్ కాలాన్ని ఎక్కువగా పొడిగిస్తే, చివరకు మీరు బ్యాంకుకు చెల్లించే వడ్డీ మొత్తం కారు అసలు ధర కంటే చాలా ఎక్కువైపోతుంది. వడ్డీ రేట్లు, ప్రాసెసింగ్ ఫీజుల వివరాలను స్పష్టంగా తెలుసుకోవాలి. అలాగే బుకింగ్ అమౌంట్ చెల్లించే ముందే ఒకవేళ కారు కొనుగోలు రద్దు చేసుకుంటే రిఫండ్ ఎలా వస్తుంది అనే నిబంధనలను రాతపూర్వకంగా తీసుకోవడం అత్యంత ముఖ్యం.
