Ducati : సూపర్ బైక్‌లో డిఫెక్ట్.. డూకాటీకి పెద్ద షాక్.. 393 బైకులకు రీకాల్
393 బైకులకు రీకాల్
Ducati :ప్రపంచంలోనే ప్రసిద్ధి చెందిన సూపర్ బైక్ కంపెనీ డూకాటీ ఇప్పుడు కొత్త సమస్యలో చిక్కుకుంది. పనిగలే వి4, స్ట్రీట్‌ఫైటర్ V4 మోడల్స్‌లో ఒక కీలకమైన లోపం బయటపడింది. దీని కారణంగా కంపెనీ ప్రపంచవ్యాప్తంగా తన బైకులను వెనక్కి పిలిపిస్తోంది. భారతదేశంలో కూడా 393 యూనిట్లలో ఈ సమస్య ఉన్నట్లు గుర్తించారు. ఈ నిర్ణయం ఒక కీలకమైన వెనుక యాక్సిల్ లోపం బయటపడిన తర్వాత తీసుకున్నారు. ఈ లోపం వల్ల పెద్ద ప్రమాదాలు జరిగే అవకాశం ఉంది. అందుకే, కంపెనీ వెంటనే ప్రభావిత బైకులను తనిఖీ చేసి, లోపభూయిష్టమైన భాగాన్ని ఉచితంగా మార్చాలని నిర్ణయించింది.
భారతదేశంలో 393 బైకులకు రీకాల్
భారతదేశంలో ఈ రీకాల్ కారణంగా మొత్తం 393 బైకులు ప్రభావితమయ్యాయి. ఇవి 2018 నుంచి 2025 మధ్య తయారైన మోడల్స్. డూకాటీ ఇండియా ఈ విషయంపై స్పందిస్తూ ప్రభావిత బైకుల యజమానులను నేరుగా సంప్రదిస్తున్నామని, వారి బైకులలోని వెనుక వీల్ షాఫ్ట్‌ను ఉచితంగా మార్చి ఇస్తామని తెలిపింది. ఈ చర్యతో ప్రమాదాలను నివారించడమే కాకుండా, రైడర్‌ల భద్రతకు ప్రాధాన్యత ఇస్తున్నామని కంపెనీ పేర్కొంది.
ఈ సమస్య భారతదేశంలోనే కాదు, ప్రపంచవ్యాప్తంగా బయటపడింది. నివేదికల ప్రకారం, డూకాటీ నార్త్ అమెరికా కూడా 10,000 కంటే ఎక్కువ యూనిట్లను రీకాల్ చేసింది. NHTSA (National Highway Traffic Safety Administration)కు సమర్పించిన పత్రాల ప్రకారం, ఇప్పటివరకు ప్రపంచవ్యాప్తంగా 11 యాక్సిల్ ఫెయిల్యూర్ కేసులు నమోదయ్యాయి. ఈ ఘటనల్లో ఏ ఒక్కటీ అమెరికాలో నమోదు కాలేదనేది ఆసక్తికరమైన విషయం.
లోపానికి కారణం ఏమిటి?
యాక్సిల్ లోపానికి ఖచ్చితమైన కారణాన్ని కంపెనీ ఇంకా అధికారికంగా వెల్లడించలేదు. కానీ, మైలేజ్ లేదా వెనుక యాక్సిల్‌పై టార్క్ సరిగ్గా లేకపోవడం వల్ల ఈ సమస్య వచ్చి ఉండొచ్చని భావిస్తున్నారు. సాధారణంగా, ఈ లోపం వీల్ లేదా చైన్ సెట్టింగ్‌ను మార్చే సమయంలో తలెత్తవచ్చు.
డూకాటీ నుండి వినియోగదారులకు సందేశం
డూకాటీ కంపెనీ ఈ సమస్యపై స్పందిస్తూ.. ప్రభావిత బైకుల యజమానులకు సమయానికి సమాచారం అందిస్తామని, ఎలాంటి అదనపు ఖర్చు లేకుండా వారి వాహనాలను రిపేరు చేసి ఇస్తామని హామీ ఇచ్చింది. తమ కస్టమర్ల భద్రత, నమ్మకాన్ని కాపాడటానికి ఈ చర్య తీసుకున్నామని కంపెనీ పేర్కొంది.
