Electric Scooters : లైట్ వెయిట్, అదిరిపోయే రేంజ్.. మహిళల కోసం రూ.62వేల లోపు బెస్ట్ ఎలక్ట్రిక్ స్కూటర్లు ఇవే

Electric Scooters : ఇప్పుడు భారత మార్కెట్లో ఎలక్ట్రిక్ స్కూటర్లకు డిమాండ్ చాలా వేగంగా పెరుగుతోంది. ముఖ్యంగా మహిళలు కూడా వీటిని ఎక్కువగా వాడుతున్నారు. పట్టణాల్లో రోజువారీ పనులు, కాలేజీ, ఆఫీసు లేదా మార్కెట్‌కి వెళ్లడం ఇప్పుడు చాలా తేలికైంది. ముఖ్యంగా మీకు తేలికైన, స్టైలిష్‌గా ఉండే ఎక్కువ దూరం ప్రయాణించే ఎలక్ట్రిక్ స్కూటర్ ఉంటే ప్రయాణం మరింత సులభంగా మారుతుంది. ప్రస్తుతం తక్కువ ధరలో మార్కెట్లో అందుబాటులో ఉన్న 5 మంచి ఎలక్ట్రిక్ స్కూటర్ల గురించి తెలుసుకుందాం.

1. ఒకినావా R30

ఈ స్కూటర్ చాలా తేలికైనది, చిన్నపాటిది. దీని ధర రూ.61,998. దీన్ని ప్రత్యేకంగా మహిళల కోసం డిజైన్ చేశారు. ఒక్కసారి ఛార్జ్ చేస్తే సుమారు 60 కిలోమీటర్లు వెళ్తుంది. దీని టాప్ స్పీడ్ గంటకు 25 కిలోమీటర్లు. స్కూటర్ ఛార్జ్ అవ్వడానికి 4 నుండి 5 గంటల సమయం పడుతుంది. ఇందులో ఎల్‌ఈడీ లైట్లు, డిజిటల్ స్పీడోమీటర్, ట్యూబ్‌లెస్ టైర్లు వంటి ఫీచర్లు ఉన్నాయి.

2. ఒడిస్సీ రేసర్ లైట్ V2

ఇది ఒక అద్భుతమైన ఎలక్ట్రిక్ స్కూటర్, దీని ధర రూ.76,250. ఇందులో ఉన్న లిథియం-అయాన్ బ్యాటరీని పూర్తిగా ఛార్జ్ చేయడానికి కేవలం 3 గంటలు పడుతుంది. ఒక్క ఛార్జ్‌తో సుమారు 75 కిలోమీటర్ల దూరం ప్రయాణించవచ్చు. ఈ స్కూటర్‌లో ఎల్‌ఈడీ హెడ్‌లైట్లు, పెద్ద బూట్ స్పేస్, సేఫ్టీ కోసం యాంటీ-థెఫ్ట్ లాక్ వంటి ఫీచర్లు ఉన్నాయి. ఇది రేడియంట్ రెడ్, పాస్టెల్ పీచ్, సఫైర్ బ్లూ, మింట్ గ్రీన్, పెర్ల్ వైట్, కార్బన్ బ్లాక్ – మొత్తం 6 రంగుల్లో లభిస్తుంది.

3. ఆంపెర్ మాగ్నస్ EX

కొంచెం ప్రీమియం మోడల్ కావాలనుకునే వారికి ఆంపెర్ మాగ్నస్ EX ఒక మంచి ఆప్షన్. దీని ధర రూ.84,900. ఇది ఒక్కసారి ఛార్జ్ చేస్తే 100 కిలోమీటర్లు వెళ్తుంది. ఎక్కువ రేంజ్ ఉండడం, కూర్చోవడానికి సౌకర్యవంతమైన సీటు ప్రయాణానికి చాలా బాగుంటాయి. ఇది ఛార్జ్ అవ్వడానికి 6 నుండి 7 గంటలు పడుతుంది. ఇందులో రివర్స్ మోడ్, యాంటీ-థెఫ్ట్ అలారం వంటి ఫీచర్లు ఉన్నాయి.

4. ప్రావాగ్ రెవోక్యూబ్

ఈ స్కూటర్ ప్రధాన ప్రత్యేకత దాని బ్యాటరీ స్వ్యాప్ టెక్నాలజీ (బ్యాటరీ మార్చుకునే సదుపాయం). పదేపదే ఛార్జింగ్ సమస్యతో ఇబ్బంది పడే మహిళలకు ఇది అద్భుతమైన ఎంపిక. దీని ధర రూ.1,18,125. ఇది 100+ కిలోమీటర్ల రేంజ్ ఇస్తుంది. బ్యాటరీని ఛార్జ్ చేయడానికి 4 గంటలు పడుతుంది. ఇందులో 2.5kWh బ్యాటరీ ఉంది. రిమూవబుల్ బ్యాటరీ, స్మార్ట్ యాప్ కనెక్టివిటీ వంటి ఫీచర్లు కూడా ఉన్నాయి.

5. టీవీఎస్ ఐక్యూబ్

మార్కెట్లో దీని ధర రూ.94,434 నుంచి మొదలవుతుంది. ఇది ఒక ప్రీమియం ఎలక్ట్రిక్ స్కూటర్. దీని స్టైలిష్ లుక్, అద్భుతమైన ఫీచర్లు మహిళలకు చాలా నచ్చాయి. ఇది 94 కిలోమీటర్ల రేంజ్ ఇస్తుంది. బ్యాటరీ ఛార్జ్ అవ్వడానికి కేవలం 2 గంటల 45 నిమిషాలు మాత్రమే పడుతుంది. ఇందులో 2.2 kWh బ్యాటరీ ఉంది. ఈ స్కూటర్‌లో మీకు టీఎఫ్‌టీ డిస్‌ప్లే, స్మార్ట్ కనెక్ట్, జియో-ఫెన్సింగ్ వంటి లేటెస్ట్ ఫీచర్లు లభిస్తాయి. ఈ స్కూటర్లు మహిళలకు రోజువారీ ప్రయాణాలను సులభతరం చేయడమే కాకుండా, పర్యావరణానికి కూడా మేలు చేస్తాయి.