Electric Cars : 500 కిలోమీటర్ల ప్రయాణం అయినా ఖర్చు కేవలం వందల్లోనే.. ఎలక్ట్రిక్ కారు అసలు లెక్క ఇదే

Electric Cars : భారతదేశంలో ఎలక్ట్రిక్ వాహనాల హవా నడుస్తోంది. పెట్రోల్, డీజిల్ ధరలు మండిపోతుండటంతో సామాన్యుడి నుంచి సెలబ్రిటీల వరకు అందరూ ఈవీల వైపు మొగ్గు చూపుతున్నారు. అయితే ఇప్పటికీ చాలామందిలో ఒక సందేహం ఉంది.. అసలు ఒక ఎలక్ట్రిక్ కారును 500 కిలోమీటర్లు నడపాలంటే ఎంత ఖర్చవుతుంది? పెట్రోల్ కారుతో పోలిస్తే ఇది ఎంతవరకు లాభం? ఈ లెక్కలన్నీ వివరంగా తెలుసుకుందాం.

ఎలక్ట్రిక్ కార్ల డిమాండ్ ఎందుకు పెరుగుతోంది?

భారత మార్కెట్లో ఎలక్ట్రిక్ కార్ల అమ్మకాలు జెట్ స్పీడ్‌తో దూసుకుపోతున్నాయి. ఏప్రిల్ 2025లో 13,409 యూనిట్లు అమ్ముడవగా, ఏప్రిల్ 2026 నాటికి ఆ సంఖ్య 23,265కి చేరింది. అంటే దాదాపు 73 శాతం పెరుగుదల నమోదైంది. దీనికి ప్రధాన కారణం వీటి రన్నింగ్ కాస్ట్ చాలా తక్కువగా ఉండటమే. కారు కొనేటప్పుడు ధర కొంచెం ఎక్కువైనా, వాడే కొద్దీ ఆ డబ్బు మొత్తం ఆదా అయిపోతుందని కస్టమర్లు గుర్తిస్తున్నారు.

500 కిలోమీటర్ల ప్రయాణానికి ఎన్ని యూనిట్ల కరెంటు పడుతుంది?

దీనిని అర్థం చేసుకోవడానికి టాటా హారియర్ ఈవీని ఉదాహరణగా తీసుకుందాం. ఇందులో సుమారు 75 kWh బ్యాటరీ ఉంటుంది. అంటే దీనిని ఫుల్ ఛార్జ్ చేయడానికి 75 యూనిట్ల కరెంటు అవసరం. అయితే ఛార్జింగ్ సమయంలో కొంత విద్యుత్ వృథా అవుతుంది కాబట్టి, దాదాపు 80 నుంచి 85 యూనిట్ల వరకు ఖర్చవుతుంది. ఒక యూనిట్ ధర రూ.8 అని అనుకుంటే, 500 కిలోమీటర్లు తిరగడానికి అయ్యే ఖర్చు కేవలం రూ.600 నుంచి రూ.700 మాత్రమే. అంటే కిలోమీటరుకు రూ.1.50 కంటే తక్కువ ఖర్చు పడుతుంది.

పెట్రోల్, డీజిల్ కార్లతో పోలిస్తే ఎంత ఆదా?

ఒక పెట్రోల్ ఎస్‌యూవీ సగటున లీటరుకు 15 కి.మీ మైలేజీ ఇస్తుందని అనుకుందాం. 500 కిలోమీటర్లు వెళ్లడానికి 33 లీటర్ల పెట్రోల్ కావాలి. లీటర్ రూ.100 అనుకుంటే మొత్తం ఖర్చు రూ.3,300 అవుతుంది. అదే డీజిల్ కారు అయితే రూ.2,500 వరకు ఖర్చవుతుంది. ఇక్కడ గమనించాల్సిన విషయం ఏంటంటే.. పెట్రోల్ కారుతో పోలిస్తే ఈవీ ఖర్చు 5 రెట్లు తక్కువ. డీజిల్ కారు కంటే 3 నుంచి 4 రెట్లు తక్కువ. అంటే ప్రతి లాంగ్ ట్రిప్‌లోనూ మీరు వేల రూపాయలు ఆదా చేయవచ్చు.

తక్కువ మెయింటెనెన్స్.. ఎక్కువ లైఫ్

ఎలక్ట్రిక్ కార్లలో ఇంజిన్ ఉండదు. దీనివల్ల ఇంజిన్ ఆయిల్ మార్చడం, క్లచ్ సర్వీసింగ్, గేర్‌బాక్స్ రిపేర్లు వంటి గొడవలే ఉండవు. పార్ట్స్ తక్కువగా ఉండటం వల్ల మెయింటెనెన్స్ ఖర్చు కూడా చాలా తక్కువ. ప్రారంభంలో కారు ధర కొంచెం భారంగా అనిపించినా, మూడు నాలుగు ఏళ్లలో మీరు ఆదా చేసే ఇంధన ఖర్చుతో కారు ధరలో సగానికి పైగా వెనక్కి వచ్చేస్తుంది. అందుకే భవిష్యత్తు అంతా ఎలక్ట్రిక్ వాహనాలదే అనడంలో ఎలాంటి అతిశయోక్తి లేదు.