Honda : రూ.2.01 లక్షలకే బుల్లెట్‌కి చెక్.. హోండా CB 350 C వచ్చేసింది, ఫీచర్లు అదుర్స్

Honda : భారతీయ మిడ్-సైజ్ మోటార్‌సైకిల్ సెగ్మెంట్లో తన స్థానాన్ని బలోపేతం చేసుకోవడానికి, హోండా మోటార్‌సైకిల్ అండ్ స్కూటర్ ఇండియా సంస్థ, అత్యంత ఆకర్షణీయమైన CB 350 C స్పెషల్ ఎడిషన్ బైక్‌ను విడుదల చేసింది. ఈ కొత్త బైక్ ప్రారంభ ఎక్స్-షోరూమ్ ధర రూ.2.01 లక్షలుగా నిర్ణయించబడింది. బైక్ బుకింగ్‌లు ఇప్పటికే ప్రారంభం కాగా, అక్టోబర్ మొదటి వారం నుంచే వినియోగదారులకు డెలివరీలు మొదలవుతాయని కంపెనీ ఆశాభావం వ్యక్తం చేసింది.

హోండా CB 350 మోడల్‌ను రీబ్రాండ్ చేస్తూ తెచ్చిన ఈ CB 350 C ఎడిషన్, క్లాసిక్ బైక్ లవర్స్‌ను లక్ష్యంగా చేసుకుంది. డిజైన్ పరంగా చూస్తే, ఈ బైక్ ప్రత్యేకమైన స్పెషల్ ఎడిషన్ స్టిక్కర్‌తో కూడిన CB 350 C బ్యాడ్జ్ ను ఫ్యూయల్ ట్యాంక్‌పై కలిగి ఉంది. ట్యాంక్ ప్రాంతంలో ఉన్న స్ట్రిప్ గ్రాఫిక్స్ ఈ బైక్‌కు ప్రీమియం లుక్ ఇస్తాయి. రెట్రో స్టైలింగ్‌ను మరింత పెంచేందుకు, బైక్‌కు క్రోమ్ గ్రాబ్ రైల్స్, బ్లాక్ లేదా బ్రౌన్ లెదర్‌లాంటి సీట్లు ఇచ్చారు. ఇది రెబెల్ రెడ్, మ్యాట్ ట్యూన్ బ్రౌన్ అనే రెండు ఆకర్షణీయమైన రంగుల్లో లభిస్తుంది.

ఈ క్లాసిక్ మోటార్‌సైకిల్‌లో అడ్వాన్సుడ్ టెక్నాలజీ ఫీచర్లు పుష్కలంగా ఉన్నాయి. ఇందులో డిజిటల్ అనలాగ్ ఇన్‌స్ట్రుమెంట్ క్లస్టర్ ఉంది. అంతేకాకుండా, హోండా స్మార్ట్‌ఫోన్ వాయిస్ కంట్రోల్ సిస్టమ్ వంటి కనెక్టివిటీ ఫీచర్ కూడా ఉంది. ఇది రైడర్‌లకు నావిగేషన్, నోటిఫికేషన్‌లను సులభతరం చేస్తుంది. భద్రత కోసం డ్యుయల్ ఛానల్ ఏబీఎస్తో పాటు, అసిస్ట్, స్లిప్పర్ క్లచ్, హోండా సెలెక్టబుల్ టార్క్ కంట్రోల్ వంటి అదనపు భద్రతా ఫీచర్లను జోడించారు.

ఇక పవర్‌ట్రైన్ విషయానికి వస్తే, హోండా CB 350 C లో 348.36 సీసీ సింగిల్ సిలిండర్, ఎయిర్-కూల్డ్ ఇంజిన్ ఉంది. ఈ ఇంజిన్ E20 పెట్రోల్‌కు అనుకూలంగా రూపొందించబడింది. ఇది గరిష్టంగా 15.5 కిలోవాట్ శక్తిని, 29.5 ఎన్ఎమ్ టార్క్‌ను ఉత్పత్తి చేయగలదు. ఈ పవర్ఫుల్ ఇంజిన్ 5-స్పీడ్ గేర్‌బాక్స్‌తో జత చేయబడింది. ఈ బైక్ సిటీ రైడింగ్‌తో పాటు హైవే ప్రయాణాలకు కూడా అనుకూలంగా ఉంటుంది. వినియోగదారులు ఆన్‌లైన్‌లో లేదా దేశవ్యాప్తంగా ఉన్న బిగ్‌వింగ్ డీలర్‌షిప్‌ల ద్వారా బుక్ చేసుకోవచ్చు.

భారత మార్కెట్‌లో ఈ కొత్త బైక్, రాయల్ ఎన్‌ఫీల్డ్ బైక్‌లకు గట్టి పోటీని ఇవ్వడం ఖాయంగా కనిపిస్తోంది. రాయల్ ఎన్‌ఫీల్డ్ బైక్‌లకు భారీ ఆదరణ ఉన్నప్పటికీ, హోండా బ్రాండ్ యొక్క విశ్వసనీయత మరియు మెరుగైన సాంకేతికత కారణంగా, చాలా మంది బైక్ ప్రియులు ఈ CB 350 C ని కొనుగోలు చేయడానికి మొగ్గు చూపవచ్చని మార్కెట్ నిపుణులు అంచనా వేస్తున్నారు. ఈ ప్రత్యేక ఎడిషన్ విజయం సాధించి, ఈ సెగ్మెంట్‌లో హోండా తన స్థానాన్ని మరింత పటిష్టం చేసుకోవడంలో సహాయపడుతుందని భావిస్తున్నారు.